ក្រោយការសម្ពោធស្មាតហ្វូនស៊េរីថ្មី Oppo R11 Plus កាលពីដើមខែនេះ នៅទីបំផុតស្មាតហ្វូនស៊េរីថ្មីនេះ នឹងប្រកាសដាក់លក់ជាផ្លូវការនៅថ្ងៃទី 30 ខែមិថុនាសប្តាហ៍ក្រោយនេះហើយ។ ស្មាតហ្វូន Oppo R11 Plus និង ស្មាតហ្វូន Oppo R11 មានការរចនារូបរាងដូចគ្នា ខុសគ្នាតែទៅលើអេក្រង់ និងលក្ខណៈសម្បត្តិតិចតួចប៉ុណ្ណោះ ជាពិសេសស្មាតហ្វូន Oppo R11 ដាក់លក់នៅលើទីផ្សារមុន។
បើទោះបីជាស្មាតហ្វូនទាំងពីរស៊េរីម៉ូដែលនេះ បំពាក់នូវបន្ទះឈីប Snapdragon 660SoC ចុងក្រោយបំផុតក្តី ស្មាតហ្វូនស៊េរីថ្មី Oppo R11 Plus ភ្ជាប់ជាមួយនឹងរ៉េមទំហំដល់ទៅ 6GB ខណៈពេលដែល Oppo R11 បំពាក់រ៉េមទំហំ 4GB ប៉ុណ្ណោះ។ Oppo R11 Plus បំពាក់ថាមពលថ្មខ្លាំងកម្លាំង 3880mAh ចំនែកស្មាតហ្វូន Oppo R11 បំពាក់ថាមពលថ្មកម្លាំង 2900mAh ។ ស្មាតហ្វូនទាំងពីរនេះបំពាក់នូវប្រព័ន្ធកាមេរ៉ាដូចគ្នា គឺកាមេរ៉ាភ្លោះខាងក្រោយ 20MP + 16MP និងកាមេរ៉ាខាងមុខទំហំ 20MP ។ ស្មាតហ្វូនស៊េរីថ្មី Oppo R11 Plus នេះមាន 3 ពណ៌សម្រាប់ជ្រើសរើសគឺពណ៌មាស ពណ៌ផ្កាឈូក និងពណ៌ខ្មៅ ហើយតម្លៃរបស់វាគឺ 3699 យ័ន (ប្រហែលជា 540 ដុល្លារអាមេរិច).។ សំរាប់ប្រទេសកម្ពុជា នៅមិនទាន់មានព័តមានច្បាស់ ពីក្រុមមហ៊ុុន Oppo ស្តីពីការចេញលក់ស្មាតហ្វូនសេ៊រីថ្មីនេះ ជាផ្លូវការនៅឡើយទេ រង់ចាំតាមដានជាមួយនិងក្រុមការងារយើងខ្ញុំទាំងអស់គ្នា៕