នៅថ្ងៃនេះ ក្រុមហ៊ុន ASUS បានទទួលបាននូវពានរង្វាន់ Red Dot Awards 2021 ចំនួន 37 ទៅលើផលិតផលឆ្នើមរបស់ខ្លួន ដែលនេះ គឺជាសមិទ្ធិផលថ្មី ដែលក្រុមហ៊ុននេះ ទទួលបាននូវនៅក្នុងការឈ្នះពានរង្វាន់ Red Dot Awards នៅក្នុងឆ្នាំនេះ។ ពានរង្វាន់នេះ គឺបានឆ្លុះបញ្ចាំងអំពីការប្តេជ្ញាចិត្តរបស់ក្រុមហ៊ុននេះ នៅក្នុងការផ្តល់នូវបទពិសោធន៍ក្នុងការប្រើប្រាស់ដែលមិនគួរអោយជឿនោះទេតាមរយៈរបកគំហើញថ្មីៗ ការច្នៃប្រឌិត និងការឌីស្សាញផលិតផលយ៉ាងពិសេសថែមទៀតផង។
លោក Mitch Yang ដែលជាប្រធានផ្នែកឌីស្សាញរបស់ក្រុមហ៊ុន ASUS បាននិយាយថា “យើងពិតជាមានកិត្តិយសណាស់ដែលត្រូវបានទទួលស្គាល់ និងឈ្នះពានរង្វាន់ Red Dot ជាថ្មីម្តងទៀតនៅក្នុងឆ្នាំនេះ ហើយខ្ញុំមានមោទនៈភាពណាស់ចំពោះក្រុមការងារទាំងអស់របស់ក្រុមហ៊ុន ASUS ដែលអាចបំបែកនូវកំណត់ត្រាមួយនេះបាន។ ជាមួយនឹងទស្សនៈវិជ្ជានៃការឌីស្សាញដែលអស្ចារ្យសម្រាប់អ្នកប្រើប្រាស់ប្រកបដោយភាពច្នៃប្រឌិតខ្ពស់នោះ យើងខិតខំក្នុងការបង្កើតនូវផលិតផលថ្មីៗជាច្រើនសម្រាប់អ្នកប្រើប្រាស់ប្រកបដោយការពេញចិត្ត និងបទពិសោធន៍ដ៏អស្ចារ្យ។ ”
លោកសាស្រ្តចារ្យ Peter Zec ដែលជាស្ថាបនិក និងនាយកប្រតិបត្តិរបស់ស្ថាប័ន Red Dot បាននិយាយថា “អ្នកឈ្នះពានរង្វាន់ Red Dot Award: Product Design 2021 ពិតជាគួរអោយចាប់អារម្មណ៍ខ្លាំងណាស់នៅក្នុងឆ្នាំនេះ។ ការឌីស្សាញទៅលើផលិតផលជាច្រើនរបស់ពួកគេពិតជាអស្ចារ្យណាស់ទាំងផ្នែកសោភ័ណភាព និងមុខងារក្នុងការប្រើប្រាស់។ វាពិតជាមិនងាយស្រួលនោះទេក្នុងការឈ្នះនូវពានរង្វាន់ទាំងអស់នេះ។ ជាលទ្ធផល ខ្ញុំសូមអបអរសាទរចំពោះភាពជោគជ័យរបស់អ្នកឈ្នះទាំងអស់គ្នា។”
ពានរង្វាន់ Red Dot Award គឺជាពានរង្វាន់មួយនៅក្នុងចំណោមពានរង្វាន់នៃការប្រកួតប្រជែងផ្នែកឌីស្សាញដ៏ធំបំផុតរបស់ពិភពលោកដែលមានក្រុមហ៊ុនសរុបចំនួន 18,000 ចូលរួមហើយពានរង្វាន់នេះមាន 3 ក្រុមគឺ Red Dot Award: Product Design, Red Dot Award: Brands & Communication Design និង Red Dot Award: Design Concept ។ អស់រយៈពេលជាង 60 ឆ្នាំនេះ គណៈកម្មាធិការជំនាញអន្តរជាតិជាច្រើនបានធ្វើការជ្រើសរើសនូវការឌីស្សាញដ៏ល្អបំផុតនៅក្នុងដំណើរការនៃការវិនិច្ឆ័យយ៉ាងម៉ត់ចត់ជាច្រើនថ្ងៃ និងផ្តោតទៅលើចំណុចសំខាន់ៗមួយចំនួនដូចជាកម្រិតនៃភាពច្នៃប្រឌិត មុខងារក្នុងការប្រើប្រាស់ គុណភាព រយៈពេលនៃការប្រើប្រាស់ និងភាពស៊ីវិល័យថែមទៀត។
សូមជំរាបផងដែរថា ASUS គឺជាក្រុមហ៊ុនមួយដែលមានភាពល្បីល្បាញបំផុតរបស់ពិភពលោកដែលមានកេរ្តិ៍ឈ្មោះទៅលើផលិតផលជាច្រើនដូចជា motherboards, PCs ក្រាហ្វិកកាត ម៉ូនីទ័រ និងរ៉ោតទ័រ ហើយវាក៏មានកុំព្យូទ័រយួរដៃជាច្រើនស៊េរីដែលល្អបំផុតនៅក្នុងឆ្នាំ 2020 កន្លងទៅនេះផងដែរ។ នៅក្នុងការពង្រីកទៅលើដំណោះស្រាយនៃការលេងហ្គេម ភាពច្នៃប្រឌិតទៅលើ Content និងដំណោះស្រាយទៅលើ AIoT នោះ ក្រុមហ៊ុន ASUS បាននាំមុខគេទៅលើឧស្សាហកម្មនេះតាមរយៈការឌីស្សាញទៅលើផលិតផលជាច្រើនប្រកបដោយភាពច្នៃប្រឌិតខ្ពស់ប្រកបដោយសោភ័ណ្ឌភាព ភាពឆ្លាតវៃ និងជីវិតឆ្លាតវៃសម្រាប់អ្នកគ្រប់គ្នា។
ក្រុមហ៊ុននេះ គឺមានអ្នកជំនាញផ្នែកស្រាវជ្រាវ និងការអភិវឌ្ឍចំនួន 5,000 នាក់ ហើយក្រុមហ៊ុន ASUS គឺក្លាយជាក្រុមហ៊ុនសហគ្រាសដែលនាំមុខគេទៅលើភាពច្នៃប្រឌិតខ្ពស់ជាមួយនឹងបច្ចេកវិទ្យាឈានមុខគេរបស់ពិភពលោកថែមទៀត។ ជាមួយនឹងការជម្រុញដោយម៉ាកសញ្ញា In Search of Incredible នោះ ក្រុមហ៊ុន ASUS បានឈ្នះពានរង្វាន់ច្រើនជាង ១១ ជារៀងរាល់ថ្ងៃនៅក្នុងឆ្នាំ 2020 នេះ ហើយក្រុមហ៊ុននេះជាប់ចំណាត់ថ្នាក់នៅក្នុងទស្សនាវដ្តី Forbes’ World’s Best Regarded Companies ជាក្រុមហ៊ុនដែលល្អបំផុតរបស់ពិភពលោក និងទស្សនាវដ្តី Fortune’s World’s Most Admired Companies ជាក្រុមហ៊ុនដែលមានការកោតសរសើរខ្លាំងបំផុតរបស់ពិភពលោកថែមទៀតផង៕
