ថ្មីៗនេះក្រុមហ៊ុន ASUS របស់តៃវ៉ាន់បានប្រកាសចេញម៉ាស៊ីនកុំព្យូទ័រយួរដៃស៊េរីថ្មីចំនួនពីរម៉ូដែលនៅទឹកដីប្រទេសចិន។ កុំព្យូទ័រយួរដៃស៊េរីថ្មីចុងក្រោយទាំងពីរម៉ូដេលនោះរួមមាន Asus Lingyao Pro 14 និង Lingyao Pro 16 ហើយពេលនេះ Asus ក៏បានប្រកាសចេញលក់ជាផ្លូវការណ៍ផងដែរសម្រាប់កុំព្យូទ័រយួរដៃស៊េរីថ្មីទាំងពីរម៉ូដែលនេះនៅទីផ្សារប្រទេសចិន។
ដូចគ្នាទៅនឹងកន្ទុយឈ្មោះម៉ូដែលរបស់ពួកវាដែរ ដោយកុំព្យូទ័រយួរដៃស៊េរីថ្មីទាំងពីរនេះបានបំពាក់មកជាមួយអេក្រង់ទំហំ 14 អ៊ីញ និង 16 អ៊ីញ។ ហើយសម្រាប់បន្ទះអេក្រង់ដែលបំពាក់នូវលើកុំព្យូទ័រយួរដៃស៊េរីថ្មីទាំងពីរនេះ គឺជាបន្ទះអេក្រង់ OLED ដូចគ្នា គ្រាន់តែម៉ូដែល 14 អ៊ីញគាំទ្រល្បឿន refresh rate 90Hz និងកម្រិតបង្ហាញបានដល់ 2.5K ខណៈម៉ូដែល 16 អ៊ីញគាំទ្រល្បឿន refresh rate 120Hz និងកម្រិតបង្ហាញឡើងដល់ 4K។ បន្ទះអេក្រង់របស់ Asus Lingyo Pro 14 និង Pro 16 គាំទ្រនូវបច្ចេកវិទ្យាចាក់ទឹកពណ៌កម្រិត 100% DCI-P3 color gamut ជាមួយមុខងារ HDR ផងដែរ។
ចូលមកដល់កំលាំងម៉ាស៊ីនវិញ Asus Lingyao Pro 14 និង Pro 16 មានជម្រើសពីរផ្សេងគ្នា គឺជម្រើស ប្រើអង្គ CPU ស៊េរី AMD Ryzen 7 លេខ 5800H និងជម្រើសប្រើអង្គ CPU ស៊េរី AMD Ryzen 9 លេខ 5900H។ ប៉ុន្តែម៉ូដែល Lingyao Pro 14 ប្រើប្រាស់អង្គ GPU ស៊េរី NVIDIA GeForce RTX3050 ទំហំ 4GB ចំនែកម៉ូដែល Lingyao Pro 16 ប្រើប្រាស់អង្គ GPU ស៊េរី NVIDIA GeForce RTX3050 Ti ទំហំ 4GB។ ម៉ាស៊ីនកុំព្យូទ័រយួរដៃស៊េរីថ្មីទាំងពីរម៉ូដែលនេះមានដំឡើងមកជាមួយប្រព័ន្ធកង្ហាលត្រជាក់ Dual-Fan Cooling និងមានបំពងសារធាតុត្រជាក់ Dual heat pipes ដើម្បីជួយបន្សាបកំដៅក្នុងម៉ាស៊ីននៅពេលប្រើអូសការងារធំៗក្នុងរយះពេលយូរ។ នៅលើម៉ាស៊ីនរបស់ Lingyao Pro 14 និង Pro 16 មានភ្ជាប់មកជាមួយ RAM ទំហំ 16GB និងថាសរឹងផ្ទុកទិន្នន័យប្រភេទ SSD ទំហំ 256GB។
Asus Lingyao Pro 14 និង Pro 16 មានភ្ជាប់មកជាមួយបច្ចេកវិទ្យាស្កែនក្រយ៉ៅម្រាមដៃដោះសោរសុវត្ថិភាពស្ថិននៅលើប៊ូតុង Power និងគាំទ្រមុខងារ Windows Hello Login ផងដែរ។ កុំព្យូទ័រស៊េរីថ្មីនេះមានផ្ទាំងក្តារ Touchpad ធំទូលាយ និងផ្ទាំង Keyboard ភ្ជាប់មកជាមួយ numpad ថែមទៀតផង។ នៅលើម៉ូដែល Lingyao Pro 14 មានថ្មទំហំ 63Wh និងនៅលើ Lingyao Pro 16 មានថ្មទំហំ 54Wh។ កុំព្យូទ័រយួរដៃស៊េរីថ្មីចុងក្រោយទាំងពីរម៉ូដែលនេះត្រូវបាន Asus ប្រកាសចេញលក់នៅទីផ្សារប្រទេសចិនជាផ្លូវការណ៍ជាមួយតម្លៃខ្ទង់ប្រហែល $1,082 និងថ្លៃបំផុតខ្ទង់ប្រហែល $1,391៕