តាមការបញ្ជាក់របស់ក្រុមហ៊ុននៅថ្ងៃទី 7 ខែមករានេះ ក្រុមហ៊ុន Samsung Electronics កំពុងតែពន្លឿនទៅលើការអភិវឌ្ឍន៌មនុស្សយន្ត Robots ជាច្រើនប្រភេទ ដែលសម្រាប់ប្រើប្រាស់ទៅលើការងារផ្សេងៗគ្នា ហើយវាថែមទាំងបំពាក់នូវបច្ចេកវិទ្យា AI របស់ក្រុមហ៊ុននេះថែមទៀតផង។ នៅក្នុងអំឡុងពេលនៃសន្និសីទសាកលមួយដែលធ្វើឡើងនៅក្នុងសណ្ឋាគារ Mandalay Bay Hotel នៅក្នុងទីក្រុង Las Vegas មួយថ្ងៃ មុនការបើកព្រឹត្តិការណ៍ Consumer Electronics Show 2019 នោះ ក្រុមហ៊ុន Samsung ក៏បានប្រកាសជាលើកដំបូងបំផុតនៃបច្ចេកវិទ្យាឆ្លាតវៃ AI ចំនួន 3 ផ្សេងគ្នាសម្រាប់ប្រើប្រាស់នៅលើមនុស្សយន្ត Robots ជាច្រើនដែលក្រុមហ៊ុនSamsung ដាក់ឈ្មោះហៅថា Samsung Bot ហើយសម្រាប់មនុស្សយន្តដែលអាចពាក់បានចំនួន 3ផ្សេងទៀតដែលមានការពង្រឹងជាមួយនឹងប្រព័ន្ធលើកទឹកចិត្ត គឺមានការប្រើប្រាស់សម្រាប់ទ្រទ្រង់ទៅលើការស្តារនីតិសម្បទា។
ក្រុមហ៊ុន Samsung ក៏ធ្វើការផ្តល់នូវ “អនាគតនៃការរស់នៅតភ្ជាប់គ្នា” តាមរយៈការបង្ហាញនូវការអភិវឌ្ឍចុងក្រោយជាច្រើននៅលើ Platforms នៃមនុស្សយន្ត Robots ។ វាមាន versions ចំនួន 3 នៃ Samsung Bot ដែលប្រើប្រាស់នូវ AI ដែលផ្តល់នូវសេវាកម្មជាច្រើនសម្រាប់មនុស្ស សេវាកម្មសម្រាប់គុណភាពខ្យល់នៅក្នុងផ្ទះ និងសេវាកម្មអតិថិជននៅហាងលក់រាយផងដែរ។ Samsung Bot Care យកចិត្តទុកដាក់ទៅលើព័ត៌មានសុខភាពរបស់អ្នកប្រើប្រាស់ ឬការថែទាំដូចជាសម្ពាធឈាម ចង្វាក់បេះដូង ការដកដង្ហើម និងគុណភាពនៃការគេង និងការតាមដានទៅលើកាលវិភាគនៃការទទួលទានថ្នាំរបស់អ្នកប្រើប្រាស់ថែមទៀត។ ប្រសិនបើអ្នកប្រើប្រាស់ដួល ឬប្រឈមមុខទៅនឹងស្ថានភាពគ្រោះថ្នាក់បន្ទាន់នោះដូចជាការគាំងបេះដូង មនុស្សយន្ត Robot នេះអាចធ្វើការខលទៅកាន់រថយន្តសង្គ្រោះបន្ទាន់ និងជូនដំណឹងទៅកាន់ក្រុមគ្រួសារបានថែមទៀត។
Samsung Bot Air បំពាក់ជាមួយនឹងបច្ចេកវិទ្យាមូលដ្ឋានីយកម្ម និងផែនទីក្នុងពេលដំណាលគ្នាដែលអាចរកឃើញនូវតំបន់កខ្វក់ជាច្រើននៅក្នុងផ្ទះ និងការរក្សានូវគុណភាពខ្យល់បានស្អាតជានិច្ច។ Samsung Bot Retail ទ្រទ្រង់ទៅលើការកម្មង់ទិញ ការបំរើអតិថិជនជាច្រើន និងការទូទាត់ប្រាក់នៅហាងទំនិញជាច្រើនទៀត។ ផលិតផលនេះ ក៏មានផ្តល់នូវផលិតផល និងព័ត៌មាននៃការទិញទំនិញនៅលើអេក្រង់ផងដែរ។
ការអភិវឌ្ឍទៅលើមនុស្សយន្តដែ លបំពាក់នូវបច្ចេកវិទ្យាឆ្លាតវៃ AI នេះត្រូវដឹកនាំដោយក្រុមហ៊ុន Samsung Research ដែលគ្រប់គ្រងទៅលើផ្នែកស្រាវជ្រាវ និងការអភិវឌ្ឍទៅលើបច្ចេកវិទ្យា AI របស់ក្រុមហ៊ុនយក្ស Samsung។ នៅក្នុងការតាំងពិពរណ៍របស់ក្រុមហ៊ុននៅក្នុងព្រឹត្តិការណ៍ CES 2019 ក្រុមហ៊ុន Samsung ក៏ដាក់បង្ហាញនូវ GEMS ដែលជា Robot ពាក់បានសម្រាប់ការស្តារនីតិសម្បទារដែលត្រូវបានអភិវឌ្ឍដោយវិទ្យាស្ថានស្រាវជ្រាវកម្រិតខ្ពស់ Samsung Advanced Research Institute។
Samsung GEMS ជួយអ្នកប្រើប្រាស់ជាច្រើនដែលមានបញ្ហាពិបាកដើរដោយសារតែខ្សោយសាច់ដុំ ជម្ងឺ ឬការរងរបួសនោះ។ វានឹងជួយអោយពួកគេអាចដើរបានយ៉ាងស្រួលជាមួយនឹងការដំណើរការឡើងវិញនៃសាច់ដុំបាន។ វិទ្យាស្ថាននេះពេលនេះកំពុងតែអភិវឌ្ឍទៅលើ GEMS ចំនួន ៣ ប្រភេទផ្សេងគ្នាសម្រាប់ត្រគាក ជង្គង់ និងកជើង។ វិទ្យាស្ថាននេះនិយាយថា “ក្រុមហ៊ុនបច្ចេកវិទ្យា Samsung នឹងបន្តក្នុងការប្រកាសបង្ហាញនូវប្រភេទក្រុមថ្មីជាច្រើននៃមនុស្សយន្ត Robots ដែលនឹងផ្តល់នូវជីវិតរស់នៅថ្មីសម្រាប់អ្នកប្រើប្រាស់ ការបំពេញនូវតម្រូវការរបស់សង្គមជាមួយនឹងគុណភាពនៃការរស់នៅកាន់តែប្រសើរនោះ។”
លោក Kim Hyun-suk អគ្គនាយក និង CEO នៃអង្គភាពគ្រឿងអេឡិចត្រូនិចសម្រាប់អ្នកប្រើប្រាស់នៅក្រុមហ៊ុន Samsung បាននិយាយថា “ឆ្នាំ 2019 នេះគឺជាខួបលើកទី 50 របស់ក្រុមហ៊ុន Samsung Electronics ហើយសម្រាប់ 5 ទសវត្សន៍មុននេះ យើងប្តេជ្ញាក្នុងការនាំយកនូវរបកគំហើញនៃបច្ចេកវិទ្យាថ្មីៗដ៏អស្ចារ្យសម្រាប់អ្នកប្រើប្រាស់ជាច្រើនគ្រប់ទីកន្លែងនៅលើពិភពលោក។” រហូតមកទល់ពេលនេះ ក្រុមហ៊ុន Samsung នៅតែបដិសេធថាខ្លួនកំពុងតែអភិវឌ្ឍទៅលើមនុស្សយន្ត Robots ជាច្រើន។ យ៉ាងណាមិញ ក្រុមហ៊ុន LG កាលពីឆ្នាំមុននេះ ក៏បានបញ្ជាក់ថា ខ្លួននឹងផ្តោតទៅលើការអភិវឌ្ឍមនុស្សយន្ត Robot ដែលជាអាជីវកម្មថ្មីមួយ ដែលមានសន្ទុះកើនឡើងខ្លាំងជាមួយនឹងក្តីសង្ឃឹមក្នុងការស្វែងរកនូវប្រាក់ចំណេញយ៉ាងច្រើនពីមនុស្សយន្ត Robots នេះនៅក្នុងរយៈពេល 3 ឆ្នាំ៕