បន្ទាប់ពីបានបង្ហាញអំពីបន្ទះឈីបស៊េរីថ្មីរបស់ខ្លួន Snapdragon 845 នៅក្នុងកិច្ចប្រជុំកំពូលបច្ចេកវិទ្យា Tech Summit កាលពីថ្ងៃទី 6 ខែធ្នូកន្លងទៅថ្មីៗនេះ ក្រុមហ៊ុន Qualcomm ដែលជាក្រុមហ៊ុនផលិតបន្ទះឈីបដ៏ធំមួយនេះ បានបញ្ជាក់ថា បន្ទះឈីបថ្មី គឺនឹងមានអានុភាពខ្លាំងជាងមុន ហើយនឹងកាន់តែទំនើបជាងមុនទៀតផង។ ក្រុមហ៊ុន Qualcomm បានបញ្ជាក់យ៉ាងដូច្នេះថា បន្ទះឈីប Snapdragon 845 ថ្មីនេះ គឺជាលទ្ធផលដ៏ធំមួយនៃកិច្ចសហប្រតិបត្តិការរវាងក្រុមហ៊ុន Qualcomm និងក្រុមហ៊ុន Samsung។
យោងតាមប្រសាសន៍របស់លោក ES Jung ដែលជាអគ្គនាយក និងអ្នកគ្រប់គ្រងទូទៅរបស់ក្រុមហ៊ុន Samsung Electronics បានបញ្ជាក់ថា ក្រុមហ៊ុន របស់លោក ពិតជាបានផលិតបន្ទះឈីប Snapdragon 845 ជាមួយនឹង Qualcomm ពិតមែន ហើយនេះ គឺជាសមិទ្ធផលដ៏ធំមួយរវាងដៃគូយើងទាំងពីរ។ លោក Lei Jun ដែលជាស្ថាបនិកអគ្គនាយក និងអ្នកគ្រប់គ្រងទូទៅរបស់ក្រុមហ៊ុន Xiaomi ដែលបានស្ថិតនៅក្នុងចំណោមភ្ញៀវកិត្តិយសចូលរួមនៅក្នុងព្រឹតិ្តការណ៍នៃកិច្ចប្រជុំកំពូលបច្ចេកវិទ្យា Tech Summit ដែរ ក៏បានចេញមកប្រកាសថា ស្មាតហ្វូនជំនាន់ចុងក្រោយរបស់ក្រុមហ៊ុន Xiaomi គឺនឹងប្រើប្រាស់បន្ទះឈីប Snapdragon 845 នេះ។
ជាមួយគ្នានេះ យោងតាមការព្យាករណ៍របស់អ្នកវិភាគជាច្រើន បានបញ្ជាក់ថា បន្ទះឈីប Snapdragon 845 ថ្មីនេះ ក្រៅតែពីប្រើនៅលើស្មាតហ្វូនស៊េរីថ្មី Xiaomi Mi 7 ហើយវាក៏នឹងបំពាក់នៅលើស្មាតហ្វូនស៊េរីថ្មីរបស់ក្រុមហ៊ុន Samsung សម្រាប់ត្រកូល Galaxy S-Series ជំនាន់ថ្មីផងដែរ។ ក្រុមអ្នកវិភាគទាំងនោះ ក៏បានបញ្ជាក់បន្ថែមទៀតថា ក្រុមហ៊ុន Sony, HTC និង LG ក៏នឹងប្រើប្រាស់នូវបន្ទះឈីបសេរីថ្មីនេះ ដូចគ្នាដែរសំរាប់ស្មាតហ្វូនថ្នាក់ខ្ពស់របស់ពួកគេ៕