យោងតាមរបាយការណ៍ថ្មីមួយ បានបញ្ជាក់ថា ក្រុមហ៊ុនបច្ចេកវិទ្យាយក្សកូរ៉េខាងត្បូង Samsung Electronics បានប្រារព្ធព្រឹត្តិការណ៍លក្ខណៈឯកជនភាព ដើម្បីធ្វើការប្រកាសបង្ហាញនូវទូរទស្សន៍ស្មាតធីវីស៊េរីថ្មីប្រភេទ QLED TV ដែលជាទូរទស្សន៍ស៊េរីចុងក្រោយបំផុតបំពាក់បច្ចេកវិទ្យាអេក្រង់បង្ហាញពណ៌ភាពខ្មៅបានដិតខ្លាំងបំផុតក្នុងថ្ងៃព្រឹត្តិការណ៍ CES2018 ឆ្នាំនេះ។ ក្នុងរបាយការណ៍ បានអះអាងថា បច្ចេកវិទ្យាអេក្រង់ទូរទស្សន៍ស្មាតធីវីរបស់ Samsung អាចបង្ហាញចេញផ្ទៃពណ៌ខ្មៅបានដិតខ្លាំងបំផុតបើធៀបនឹងជំនាន់មុនដោយក្រុមហ៊ុនបានធ្វើការបង្កើននូវបច្ចេកវិទ្យាកញ្ចក់អេក្រង់ QLED ដើម្បីធ្វើការអភិវឌ្ឍន៍ទូរទស្សន៍ជំនាន់ក្រោយរបស់ខ្លួនអោយកាន់តែមានភាពអស្ចារ្យបំផុត។
Samsung Electronics បានបង្ហាញទូរទស្សន៍ស្មាតធីវីដ៏អាថកំបាំង “Mystery QLED TV” នេះនៅក្នុងបន្ទប់ផ្ទាល់ខ្លួនហៅថា “Qlounge” នៅជាប់ស្តង់តាំងបង្ហាញ CES2018 ហើយមានតែអតិថិជនរបស់ខ្លួន និងសមាជិកនៃប្រព័ន្ធផ្សព្វផ្សាយបរទេសមួយចំនួនប៉ុណ្ណោះដែលត្រូវបានអនុញ្ញាត្តិអោយចូលក្នុងបន្ទប់នោះ។ ដោយឡែកសម្រាប់ប្រព័ន្ធផ្សព្វផ្សាយកូរ៉េខាងត្បូងមិនត្រូវបានអនុញ្ញត្តិអោយចូលនោះទេ ហើយ Samsung ក៏មិនបានបញ្ជាក់ហេតុផលជុំវិញការហាមប្រព័ន្ធផ្សព្វផ្សាយក្នុងប្រទេសរបស់ខ្លួននោះដែរ។ អ្នកទស្សនាមួយរូបបាននិយាយថា បច្ចេកវិទ្យាបង្ហាញពណ៌ខ្មៅនៃទូរទស្សន៍ QLED TV របស់ Samsung ពិតជាបង្ហាញចេញមកប្រហែលគ្នាទៅនឹងអេក្រង់ OLED TV ដែរ ហើយកម្រិតមុំបង្ហាញរបស់វាក៏ត្រូវបានកែប្រែថ្មីបើធៀបនឹងទូរទស្សន៍ស៊េរីមុនៗ។
បច្ចេកវិទ្យាអេក្រង់ OLED និង QLED មានមូលដ្ឋានបង្ហាញខុសពីគ្នា។ គ្រាប់ភិចសែលនៅក្នុងកញ្ចក់អេក្រង់ OLED panel វាប្រើប្រាស់ពន្លឺចេញពីផ្ទៃរបស់វាផ្ទាល់តែម្តង ខណៈដែរគ្រាប់ភិចសែលនៅក្នុងកញ្ចក់អេក្រង់ QLED វាត្រូវការពន្លឺ LED backlight ក្នុងការបញ្ចេញកម្រិតភាពច្បាស់របស់វា។ ម៉្លោះហើយទើបធ្វើអោយកញ្ចក់អេក្រង់ OLED panel មានសមត្ថភាពបង្ហាញចេញពណ៌ខ្មៅបានដិតខ្លាំង និងពន្លឺភ្លឺច្បាស់ខ្លាំងជាមួយកម្រិត Contrast ratio ខ្ពស់បំផុត។
ទោះបីជាបែបនេះក្តីក្រុមហ៊ុន Samsung Electronics បាននឹងកំពុងធ្វើការអភិវិឌ្ឍន៍បន្ថែមទៀតនៅលើបច្ចេកវិទ្យាអេក្រង់ QLED របស់ខ្លួនអោយកាន់តែមានភាពអាចប្រគូតប្រជែងជាមួយ OLED របស់ LG។ ទូរទស្សន៍ស្មាតធីវី QLED TV ដែល Samsung បានបង្ហាញស្ងាត់ៗបែបលាក់លៀមមួយនេះគឺបង្ហាញពីការផ្តោតសំខាន់ទៅលើការបង្កើននៃបច្ចេកវិទ្យាអេក្រង់ QLED ហើយប្រហែលជានៅជិតដំណាច់ឆ្នាំ 2018 នេះស្មាតធីវី QLED TV ស៊េរីថ្មីនឹងបង្ហាញវត្តមានផ្លូវការណ៍ជាក់ជាមិនខាន៕
