នៅថ្ងៃនេះ ក្រុមហ៊ុន HMD Global បាននឹបបន្ថែមនូវម៉ាកយីហោពាណិជ្ជកម្ម (Trademark) ថ្មីមួយទៀត ដែលជាកម្មសិទ្ធិបញ្ញារបស់ខ្លួនចុះបញ្ជីទៅក្នុងការិយាល័យ IP Office នៅក្នុងសហភាពអ៊ឺរ៉ុប។ សម្រាប់ម៉ាកយីហោពាណិជ្ជកម្ម (Trademark)ថ្មីនេះ ត្រូវការពារដោយការប្រើប្រាស់ពាក្យថា “HMD Global” និង “TARMO” ហើយក្រុមហ៊ុន HMD ក៏ទទួលនូវការប្រើប្រាស់ម៉ាកយីហោ Asha ផងដែរ។
ម៉ាកយីហោពាណិជ្ជកម្ម (Trademark) ASHA ត្រូវបានបង្កើតឡើងនៅ EUIPO ក្នុងខែវិច្ឆិកាឆ្នាំ 2011 ពីរឆ្នាំមុនពេលដែលក្រុមហ៊ុន Microsoft ទិញយកផ្នែក D&S របស់ក្រុមហ៊ុន Nokia ។ Trademark នេះក៏ត្រូវផ្ទេរទៅកាន់ផ្នែកមួយដែលគ្រប់គ្រងដោយក្រុមហ៊ុន Microsoft ប៉ុន្តែពេលនេះ ASHA ត្រឡប់ស្ថិតនៅក្រោមការគ្រប់គ្រងរបស់ហ្វាំងឡង់វិញម្តងហើយ គឺក្រោមក្រុមហ៊ុន HMD ។ ទូរស័ព្ទដែលប្រើប្រាស់ឈ្មោះ Asha មានច្រើនស៊េរីដូចជាទូរស័ព្ទតម្លៃថោក និងស្មាតហ្វូន “Asha Touch” ។ ទូរស័ព្ទទាំងនេះ គឺមានការរចនារូបរាងស្រស់ស្អាត ហើយវាមានការពេញនិយមខ្លាំងដែរនៅក្នុងទីផ្សារកំពុងអភិវឌ្ឍ។ ក្រុមហ៊ុន Microsoft បានធ្វើការលុបចោលនូវស៊េរី ASHA ដោយសារតែ ASHA មានការប្រកួតប្រជែងជាមួយនឹងទូរស័ព្ទថ្នាក់ទាប Lumia 435 ។
ប្រសិនបើលោកអ្នកនៅចងចាំ កាលពីខែតុលា ឆ្នាំ 2016 នោះ ទូរស័ព្ទតម្លៃធូរថ្លៃ Nokia Asha មានឈ្មោះហៅថា Asha 308A ដំណើរការនូវ Nokia Asha Software Platform ហើយវាប្រើប្រាស់នូវក្តារចុច T9 keyboard ។ សម្រាប់ UI របស់ឧបករណ៍នេះ គឺមានការទាក់ទាញខ្លាំងមែនទែន។
សម្រាប់ការផ្ទេរកម្មសិទ្ធិនេះ មិនមែនមានន័យថា ក្រុមហ៊ុន HMD នឹងប្រកាសចេញនូវទូរស័ព្ទស៊េរីថ្មីដែលមានម៉ាកយីហោ ASHA នោះទេ ប៉ុន្តែនេះគ្រាន់តែជាការផ្ទេរម្ចាស់គ្រប់គ្រងប៉ុណ្ណោះ។ មានការព្យាករណ៍ថា ប្រហែលជាទូរស័ព្ទតម្លៃថោក 4G ដែលមានលេខម៉ូដែល TA-1047 នឹងប្រើប្រាស់ក្តារចុច QWERTY keyboard ដែលក្រុមហ៊ុនបានបង្ហាញចេញពីថ្ងៃមុននោះ អាចនឹងប្រើប្រាស់ម៉ាកយីហោ ASHA នេះហើយមើលទៅ៕
