ថ្មីៗនេះ ក្រុមហ៊ុន Meizu ទើបតែផលិតបានស្មាតហ្វូនស៊េរីថ្មីមួយទៀតដែលមានឈ្មោះហៅថា Meizu M6T ដែលគ្រោងនឹងបង្ហាញវត្តមាននៅថ្ងៃទី 29 ខែឧសភាខាងមុខនេះ។ មុនថ្ងៃប្រកាសបង្ហាញខ្លួនជាផ្លូវការនេះ ស្មាតហ្វូននេះ ក៏បង្ហាញខ្លួននៅលើ Geekbench ហើយពេលនេះ លក្ខណៈសម្បត្តិសំខាន់ៗ របស់វាក៏បង្ហាញខ្លួននៅលើអ៊ីនធើណិតផងដែរ។ ស្មាតហ្វូន Meizu M6T ដំណើរការនូវប្រព័ន្ធប្រតិបត្តិការ Android 7.1.1 Nougat និងរ៉េម ទំហំ 2GB ។ ស្មាតហ្វូននេះ ដំណើរការនូវបន្ទះឈីប SC9850 ដែលជាបន្ទះឈីបរបស់ក្រុមហ៊ុន Spreadtrum ។ បន្ទះឈីបនេះ មានល្បឿន 1.3GHz និងមានអង្គគណនា 4-Cores ផងដែរ។
យោងទៅតាមព័ត៌មាននៅលើវេបសាយរបស់ក្រុមហ៊ុន Spreadtrum នោះ SC9850 គឺជាបន្ទះឈីប 28nm ដែលដំណើរការជាមួយនឹងក្រាហ្វិកកាតប្រភេទ Mali 820MP1 GPU និងការទ្រទ្រង់នូវវីដេអូកម្រិត 1080p video playback កាមេរ៉ាខាងក្រោយទំហំ 13MP Sensor និងអេក្រង់កម្រិត HD+ Panel ផងដែរ។ ស្មាតហ្វូននេះ ក៏ប្រហែលជានឹងបង្ហាញខ្លួនជាមួយនឹងទំហំ 3GB+32GB និង 2GB+16GB ផងដែរ។ បើនិយាយអំពីកម្លាំងរបស់ស្មាតហ្វូននេះវិញ Meizu M6T មានពិន្ទុ 460 សម្រាប់ single-core និងពិន្ទុ 1284 សម្រាប់ multi-core៕
