ក្រុមហ៊ុនបច្ចេកវិទ្យាយក្ស Samsung Electronics ទំនងជាខកខានក្នុងការសម្រេចនូវគោលដៅក្នុងការនាំចេញស្មាតហ្វូនរបស់ខ្លួនដល់ទៅចំនួន 350 លានគ្រឿងសម្រាប់ប្រចាំឆ្នាំ នេះបើតាមការបញ្ជាក់អំពីប្រភពដែលដឹងរឿងនេះ ដែលបានផ្សាយនៅក្នុងអាទិត្យនេះ។
ប្រភពខាងក្នុងបញ្ជាក់ប្រាប់សារព័ត៌មាន The Investor ថា “គោលដៅរបស់ក្រុមហ៊ុន Samsung ក្នុងការនាំចេញស្មាតហ្វូនចំនួន 350 លានគ្រឿងនោះ គឺមានចំនួនខ្ពស់ជាងការរាយការណ៍តាំងពីដំបូងទៀត ហើយក៏មានការទាបជាងការរំពឹងទុកអំពីការលក់ទៅលើស្មាតហ្វូន Galaxy S9 ជាពិសេសក្រុមហ៊ុន ក៏ខិតខំក្នុងការតស៊ូទៅលើអាជីវកម្មស្មាតហ្វូននៅក្នុងប្រទេសចិន ហើយវាក៏មានការឆ្ងាយពីគោលដៅកាន់តែខ្លាំងផងដែរ។”
គោលដៅដំបូងរបស់ក្រុមហ៊ុនបច្ចេកវិទ្យាយក្ស Samsung គឺការនាំចេញស្មាតហ្វូនចំនួន 320 លានគ្រឿង ប៉ុន្តែជាមួយនឹងការកម្មង់ទិញមុនដ៏ខ្លាំងក្លាទៅលើស្មាតហ្វូន Galaxy S9 នៅក្នុងត្រីមាសទី 1 នៅក្នុងឆ្នាំនេះ ធ្វើអោយក្រុមហ៊ុនមានគោលដៅកាន់តែខ្ពស់ជាងមុនថែមទៀត។ ក្រុមហ៊ុនផលិតស្មាតហ្វូនកំពូលៗ ជាច្រើនដែលមានដូចជា Apple និង Samsung ក៏មានការធ្លាក់ចុះទៅលើតម្រូវការទីផ្សារស្មាតហ្វូនរបស់ខ្លួននៅក្នុងប៉ុន្មានឆ្នាំចុងក្រោយនេះ ដោយសារតែវាមានការប្រកួតប្រជែងទីផ្សារកាន់តែច្រើន ហើយវាក៏មានកំណើននៃស្មាតហ្វូនដែលមានតម្លៃថោកជាច្រើនចេញពីប្រទេសចិនផងដែរ។
គោលដៅនៃការលក់ស្មាតហ្វូនចំនួន 350 លានគ្រឿង របស់ក្រុមហ៊ុន Samsung គឺខ្ពស់ជាងចំនួននៃការនាំចេញរបស់ក្រុមហ៊ុននៅក្នុងប៉ុន្មានឆ្នាំនេះផងដែរ។ ក្រុមហ៊ុនបច្ចេកវិទ្យាយក្សរបស់កូរ៉េនេះ មានការនាំចេញស្មាតហ្វូនបានចំនួន 319.7 លានគ្រឿងនៅក្នុងឆ្នាំ 2015 ការនាំចេញស្មាតហ្វូនបានចំនួន 309.4 លានគ្រឿងនៅក្នុងឆ្នាំ 2016 និងចំនួន 319.8 លានគ្រឿងនៅក្នុងឆ្នាំ 2017 នេះបើតាមរបាយការណ៍ចេញពីក្រុមហ៊ុន Strategy Analytics ។ នៅក្នុងត្រីមាសទី 1 នៅឆ្នាំនេះ ក្រុមហ៊ុននាំចេញស្មាតហ្វូនបានចំនួន 78 លានគ្រឿងប៉ុណ្ណោះ។
លោក Noh Geun-chang អ្នកវិភាគរបស់ក្រុមហ៊ុន HMC Investment & Securities បញ្ជាក់ថា “ការនាំចេញស្មាតហ្វូនរបស់ក្រុមហ៊ុន Samsung នៅក្នុងត្រីមាសទី 2 ប្រហែលជាមានចំនួន 73 លានគ្រឿងសម្រាប់រយៈពេលពីខែមេសាដល់ខែមិថុនាខណៈពេលដែលស្មាតហ្វូន Galaxy S9 និង Galaxy S9 Plus គឺមានចំនួននៃការនាំចេញទាប។”
ក្រុមហ៊ុន Shinhan Investment និង Korea Investment & Securities ទស្សន៍ទាយថា ស្មាតហ្វូននេះនឹងមានប្រាក់ចំណេញដល់ទៅ 2.3 trillion won ដែលមានការទាបជាងពីឆ្នាំមុនដល់ទៅ 43.3% ខណៈពេលដែលក្រុមហ៊ុន EBEST Investment & Securities រំពឹងថា ប្រាក់ចំណេញនៃការលក់គឺមានត្រឹមតែ 2.25 trillion won ប៉ុណ្ណោះ។ គួបញ្ជាក់ផងដែរថា ភាគហ៊ុនរបស់ក្រុមហ៊ុន Samsung នៅក្នុងប្រទេសចិនមានការធ្លាក់ចុះជិត 20% នៅក្នុងឆ្នាំ 2013 និងតិចជាង 1% កាលពីឆ្នាំមុននេះ។