ស្មាតហ្វូនដែលអាចបត់បាន Motorola Razr គឺត្រឡប់មកវិញហើយ ដែលមានការបន្ថែមនូវការឌីស្សាញកាន់តែមានភាពស្រស់ស្អាត និងទាន់សម័យខ្លាំងមែនទែន។ ស្មាតហ្វូនជំនានថ្មីនៃត្រកូលនេះ នឹងបង្ហាញខ្លួននៅក្នុងរយៈពេលប៉ុន្មានម៉ោងទៀតប៉ុណ្ណោះ នៅថ្ងៃនេះ នៅក្នុងទំរង់ជាស្មាតហ្វូនដែលអាចបត់បានប៉ុន្តែការបត់នេះ គឺជាទម្រង់បញ្ឈរ ហើយវានៅតែរក្សានូវការឌីស្សាញដូចទៅនឹងម៉ូឌែលជំនាន់មុនរបស់វាដែរ។ ខណៈពេលដែលស្មាតហ្វូន Razr ស៊េរីថ្មីនេះ គឺជាស្មាតហ្វូនដំបូងបំផុតដែលមានការឌីស្សាញបត់បញ្ឈរនោះ វាប្រហែលជាមិនរក្សានូវតំណែងនេះយូរនោះទេ។
ដូចគ្នានេះដែរក្រុមហ៊ុន Samsung ក៏ទើបតែបង្ហាញនូវស្មាតហ្វូន ដែលមានការឌីស្សាញជាទម្រង់បត់បញ្ឈរកាលពីខែមុននេះ ស្មាតហ្វូននេះអាចជា Samsung W20 5G។ នៅមិនទាន់មានការបញ្ជាក់ជាផ្លូវការអំពីឈ្មោះផ្លូវការរបស់ស្មាតហ្វូនដែលអាចបត់បញ្ឈរបាននៅឡើយទេ ប៉ុន្តែយើងដឹងថា ក្រុមហ៊ុន Samsung ក៏កំពុងតែធ្វើការនៅលើស្មាតហ្វូននេះផងដែរ។ ប៉ុន្តែ Samsung មិនមែនជាក្រុមហ៊ុនបន្ទាប់ដែលមានគម្រោងក្នុងការបញ្ចេញនូវស្មាតហ្វូនដែលអាចបត់បញ្ឈរនេះនោះទេ។
ក្រុមហ៊ុន Xiaomi ក៏ទទួលបាននូវប៉ាតង់សម្រាប់ស្មាតហ្វូន ដែលអាចបត់បានបញ្ឈរបាននេះផងដែរ។ ប៉ាតង់នេះមានការស្នើនៅក្នុងខែសីហា ឆ្នាំ 2018 នេះ នៅមុនពេលដែលទទួលបាន និងចេញផ្សាយនៅខែមុននេះ។ សម្រាប់គំរូរបស់ស្មាតហ្វូននេះ គឺមានអេក្រង់តូចមួយនៅផ្នែកខាងលើនៅពេលដែលវាបត់នោះ។ អេក្រង់នេះ មានការបង្ហាញនូវព័ត៌មានសំខាន់ៗដូចជាម៉ោង អ្នកខល និងសាររំលឹកថែមទៀត។
សម្រាប់ផ្នែកខាងក្រោមពាក់កណ្តាលរបស់ស្មាតហ្វូននេះវិញ គឺមានភ្ជាប់ជាមួយនឹងកាមេរ៉ាភ្លោះដែលមានការឌីស្សាញបញ្ឈរយ៉ាងស្រស់ស្អាត។ វាហាក់ដូចជាដាក់នៅកន្លែងដែលខុសហើយដោយសារតែវាកន្លែងនេះគួរតែជាកន្លែងដែលអ្នកដាក់ម្រាមដៃរបស់អ្នកនោះទេ។ យ៉ាងណាមិញ នៅពេលដែលអ្នកដាក់ស្មាតហ្វូននេះផ្តេកនោះ អ្នកអាចធ្វើការថតរូបភាពនេះបានដោយមិនប៉ះទៅលើ Lens នោះទេ។
នៅពេលដែលបើក អេក្រង់គោល (Main Display) របស់ស្មាតហ្វូននេះមានរូបរាងដូចជាបន្ទះស្កគ្រាប់។ ស្មាតហ្វូននេះ មិនមានគែម Bezels នោះទេនៅគែមសងខាងរបស់វាដោយសារតែវាសន្សំកន្លែងសម្រាប់ដាក់នូវកាមេរ៉ាភ្លោះ រន្ធស្រូបសំឡេង និងសេនស័រមួយទៀតនៅផ្នែកខាងលើនេះ។ នេះគឺគ្រាន់តែជាប៉ាតង់ប៉ុណ្ណោះ ហើយវាមិនទាន់មានការបញ្ជាក់នៅឡើយទេពីក្រុមហ៊ុននេះ។ កាលពីដើមឆ្នាំនេះ ក្រុមហ៊ុនបច្ចេកវិទ្យាយក្សរបស់ចិននេះក៏បង្ហាញថា ខ្លួនកំពុងតែធ្វើការនៅលើគំរូរបស់ស្មាតហ្វូនមួយដែលអាចបត់បានពីរទម្រង់ ប៉ុន្តែស្មាតហ្វូននេះនៅមិនទាន់ប្រកាសបង្ហាញខ្លួននៅឡើយទេ៕
