OPPO Find X2 គឺជាស្មាតហ្វូនមួយនៅក្នុងចំណោមស្មាតហ្វូនដែលមានការទន្ទឹងរង់ចាំជាច្រើន នៅក្នុងប្រទេសចិន នៅក្នុងឆ្នាំនេះ។ ស្មាតហ្វូននេះ នឹងក្លាយជាស្មាតហ្វូនជំនាន់បន្ទាប់របស់ស្មាតហ្វូន Find X 2018 ដែលធ្វើអោយពិភពលោកមានការភ្ញាក់ផ្អើលនោះ។ មុនពេលដែលស្មាតហ្វូននេះ ប្រកាសបង្ហាញខ្លួននោះ លក្ខណៈសម្បត្តិជាច្រើនរបស់ស្មាតហ្វូននេះ ក៏មានការបែកធ្លាយផងដែរ។
នៅថ្ងៃនេះ អ្នកទម្លាយនៅក្នុងប្រទេសចិន ក៏មានការទម្លាយបង្ហាញអំពីអេក្រង់របស់ស្មាតហ្វូននេះផងដែរ។ កាលពីខែមុននេះ មានការបញ្ជាក់ថា ស្មាតហ្វូន Find X2 នេះ នឹងបង្ហាញខ្លួននៅក្នុងឆ្នាំនេះ លោក Brian Shen អនុប្រធានរបស់ក្រុមហ៊ុន OPPO បានទម្លាយថា ស្មាតហ្វូននេះ នឹងមានអេក្រង់ដែលមានលក្ខណៈប្រសើរជាងស្មាតហ្វូនជំនាន់មុននេះ។
តាមការបញ្ជាក់របស់ Digital Chat Station បានអោយដឹងថា អេក្រង់របស់ស្មាតហ្វូន Find X2 នឹងមានកម្រិតភាពច្បាស់ QHD+ និងកម្រិតអេក្រង់ 120Hz refresh rate។ កម្រិតភាពច្បាស់របស់ស្មាតហ្វូននេះគឺ 3168x1440 ហើយអេក្រង់របស់វាគឺជាអេក្រង់គែមកោង OLED ដែលធ្វើការផលិតដោយក្រុមហ៊ុន Samsung។ គាត់បន្ថែមថា អេក្រង់របស់ស្មាតហ្វូននេះ គឺមានអេក្រង់ទំហំ 6.5 អ៊ីង ហើយវាមានរន្ធប្រហោងមួយនៅផ្នែកខាងលើខាងឆ្វេងសម្រាប់កាមេរ៉ា Selfie ថែមទៀតផង។OPPO នឹងអនុញ្ញាតអោយអ្នកប្រើប្រាស់ជាច្រើនធ្វើការផ្លាស់ប្តូរពីកម្រិតភាពច្បាស់ FHD+ និង QHD+ ហើយអ្នកប្រើប្រាស់ជាច្រើនអាចធ្វើការផ្លាស់ប្តូរនៅចន្លោះអេក្រង់ 60Hz refresh rate ឬ 120Hz refresh rate បានថែមទៀតផង។
ប្រភពខាងលើបញ្ជាក់ថា អ្នកគាំទ្រជាច្រើនរបស់ក្រុមហ៊ុន Samsung ពិតជាមិនសប្បាយចិត្តនោះទេ ចាប់តាំងពីស្មាតហ្វូន Galaxy S20 series នឹងអាចធ្វើការផ្លាស់ប្តូរទៅកាន់ 120Hz នៅពេលដែលកម្រិតអេក្រង់របស់វាគឺ FHD+។ ខណៈពេលដែលការរួមបញ្ជូលគ្នានៃកម្រិតភាពច្បាស់ QHD+ និងកម្រិតអេក្រង់ 120Hz refresh rate នេះ នឹងធ្វើអោយអស់ថាមពលថ្មច្រើន។ ស្មាតហ្វូន OPPO Find X2 នឹងមានបន្ទះឈីប Snapdragon 865 និងម៉ូដឹម Snapdragon X55 modem សម្រាប់ការទ្រទ្រង់ទៅលើបច្ចេកវិទ្យា 5G network ថែមទៀតផង។ មានការរំពឹងថា ស្មាតហ្វូននេះ នឹងបង្ហាញខ្លួននៅក្នុងត្រីមាសនេះ ដូចនេះ យើងរំពឹងថា នឹងមានការបែកធ្លាយកាន់តែច្រើនបន្ថែមទៀតនាពេលឆាប់ៗនេះ៕