នៅថ្ងៃទី 26 ខែមីនា ឆ្នាំ 2020 នេះ ក្រុមហ៊ុន Huawei បានបង្ហាញនូវស្មាតហ្វូន Flagship P 40 Series ម៉ូឌែលចុងក្រោយបំផុតរបស់ខ្លួនដែលមានឈ្មោះហៅថា Huawei P40, P40 Pro និង P40 Pro+។ ស្មាតហ្វូនចំនួន 2 ម៉ូឌែលមានលក្ខណៈសម្បត្តិខ្លាំងក្លា និងតម្លៃខ្ពស់ផងដែរគឺតម្លៃជាង $1,000។ សម្រាប់ពេលនេះ តម្លៃរបស់ស្មាតហ្វូននេះ នៅក្នុងទីផ្សាររបស់ចិនក៏មានការបែកធ្លាយផងដែរ ដែលមានការបញ្ជាក់ថា តម្លៃរបស់ស្មាតហ្វូននេះ គឺអាចនឹងទាបជាងទីផ្សារពិភពលោកដល់ទៅ 30% ឯណោះ។
តាមការបញ្ជាក់នៅក្នុងរបាយការណ៍ថ្មីនេះ បានអោយដឹងថា ស្មាតហ្វូន Huawei P40 ដែលមានរ៉េមទំហំ 8GB និងម៉េមូរីទំហំ 128GB គឺដាក់លក់នៅក្នុងតម្លៃ 4,488 Yuan (632$) ប៉ុណ្ណោះ។ សម្រាប់តម្លៃនេះ គឺទាបជាងតម្លៃទីផ្សារនៅក្នុងអ៊ឺរ៉ុប គឺមានតម្លៃ 799 Euros (6,195 Yuan)។ ស្រដៀងគ្នានេះផងដែរ ស្មាតហ្វូន Huawei P40 Pro 8GB+128GB នឹងលក់នៅក្នុងតម្លៃ 5,788 Yuan (815$) ខណៈពេលដែលទំហំ 8GB+256GB គឺមានតម្លៃ 6,288 Yuan (885$)។
សម្រាប់តម្លៃនេះ គឺពិតជាថោកជាងតម្លៃរបស់ស្មាតហ្វូននៅក្នុងទីផ្សារបរទេសដែលស្មាតហ្វូន Huawei P40 Pro នេះ គឺមានតម្លៃ 999 EUR សម្រាប់ម៉ូឌែល 256GB។ ចំនែកស្មាតហ្វូន Huawei P40 Pro នេះ គឺមានតម្លៃ 7,988 Yuan (1,125$) ដែលមាមនតម្លៃថោកជាងនៅក្នុងទីផ្សារអ៊ឺរ៉ុបដែលមានតម្លៃ 1,399 EUR(10,845 Yuan)។ យោងតាមតម្លៃដែលបានបែកធ្លាយនេះ បានបង្ហាញថា ស្មាតហ្វូន Huawei P40 series នេះ គឺមានតម្លៃថោកជាងទីផ្សារដល់ទៅ 30% បើធៀបជាមួយនឹងទីផ្សារបរទេស៕
