ស្មាតហ្វូនដែលអាចបត់បាន Huawei Mate X របស់ក្រុមហ៊ុន Huawei ត្រូវបានចុះបញ្ជីជាយូរមកហើយនៅលើការគ្រប់គ្រងការចូលប្រើបណ្តាញនៃឧបករណ៍ទូរគមនាគមន៍(TENAA)។ នៅថ្ងៃនេះ ស្មាតហ្វូននេះ បានបង្ហាញខ្លួនសារជាថ្មីនៅលើ TENAA ហើយវាក៏មានការផ្លាស់ប្តូរមួយចំនួនផងដែរ។ សម្រាប់ការបញ្ចេញស្មាតហ្វូននេះ ជាផ្លូវការនៅក្នុងប្រទេសចិនក៏ជិតដល់ហើយ។ បើក្រឡេកមើលទៅលើរូបភាពទាំងនេះ ស្មាតហ្វូននេះ គឺមានការផ្លាស់ប្តូរមួយចំនួនទៅលើប៊ូតុង Power របស់វាផងដែរ។
ស្មាតហ្វូននេះ មានរាងសំប៉ែត ធំជាងមុនថែមទៀត បន្ថែមពីនេះទៀត ស្មាតហ្វូននេះ ក៏មានការពង្រឹងទៅលើត្រចៀករបស់ខ្លួនអោយកាន់តែរឹងមាំថែមទៀតផងដែរ។ សម្រាប់ការបង្ហាញស្មាតហ្វូន Huawei Mate X នេះជាផ្លូវការ គឺមានការពន្យារពេល 2 ដងហើយ។ ទោះជាយ៉ាងណាក៏ដោយនោះ សម្រាប់ការបង្ហាញវត្តមាននៅលើ TENAA នៅពេលនេះ មានបញ្ជាក់ថា ស្មាតហ្វូននេះ នឹងបង្ហាញខ្លួននៅក្នុងប្រទេសចិននៅក្នុងពេលឆាប់ៗនេះ។
គួរបញ្ជាក់ថា Huawei Mate X គឺជាស្មាតហ្វូនដែលអាចបត់បាន ហើយគឺពិតជាស្អាតមែនទែននៅពេលដែលវាបត់នោះ។ Power និង Fingerprints Keys របស់ស្មាតហ្វូននេះ គឺពិតជាស្តើងស្រស់ស្អាតមែនទែនសម្រាប់ប្រើប្រាស់។ ស្មាតហ្វូននេះមានអេក្រង់ 8-inch OLED Display ជាមួយនឹងកម្រិតភាពច្បាស់ 2480×2200។ MateX ប្រើប្រាស់នូវបន្ទះឈីប Kirin 980 រួមជាមួយនឹង 7nm 5G Balong 5000 ដំបូងបំផុតរបស់ក្រុមហ៊ុន Huawei។ ចំពោះថាមពលថ្មរបស់ស្មាតហ្វូននេះ គឺមានទំហំ 4500 mAh និងទ្រទ្រង់នូវបច្ចេកវិទ្យាបញ្ចូលថាមពលថ្មលឿន 55W Super Fast Charge ថែមទៀត។ តាមការបញ្ជាក់ជាផ្លូវការនោះ ស្មាតហ្វូន Mate X នេះ អាចធ្វើការបញ្ចូលថ្មបាន 85% នៅក្នុងរយៈពេល 30 នាទី។ បច្ចេកវិទ្យានេះ គឺលឿនជាង iPhone XS Max ដល់ទៅ 600%។ បន្ថែមពីនេះទៀត ស្មាតហ្វូន Huawei Mate X នាំយកនូវបទពិសោធន៍ប្រើប្រាស់កាន់តែអស្ចារ្យ និងអេក្រង់កាន់តែមានភាពច្នៃប្រឌិតខ្ពស់សម្រាប់ការដំណើរការកម្មវិធី 2 ក្នុងពេលជាមួយគ្នាថែមទៀត៕