ស្មាតហ្វូនជំនាន់ថ្មីរបស់ក្រុមហ៊ុន OPPO ម៉ូដែល Reno 5 ត្រូវបានគេដឹងថា នឹងប្រកាសចេញក្នុងពេលឆាប់ៗនេះ ហើយស្មាតហ្វូនជំនាន់ថ្មីនេះក៏មានព័ត៌មានចចាមអារាមបានចុះផ្សាយនិយាយពីវាមិនដាច់កន្ទុយផងដែរ។ ដូចនៅថ្ងៃនេះ អីចឹងបើតាមរយះបណ្តាញ Weibo blogger មួយបាននិយាយថា “ស្មាតហ្វូនជំនាន់ថ្មី Reno 5 Series នឹងបង្ហាញខ្លួនជាមួយនឹងបច្ចេកវិទ្យាសាកភ្លើងល្បឿនលឿនកំលាំង 65W Flash Charge”។ ប្រភពដដែលនេះក៏បានបន្ថែមទៀតថា Reno 5 Series នឹងមានការរចនារូបរាងឡើងជាមួយអេក្រង់កោងប្រភេទបន្ទះបង្ហាញ AMOLED Punch-Hole Display និងមានភ្ជាប់នូវកម្រិត refresh rate ខ្ពស់ថែមទៀតផង។
ស្មាតហ្វូនជំនាន់ថ្មីនេះ នឹងបង្ហាញខ្លួនមកជាមួយជម្រើសបីម៉ូដែល និងប្រើប្រាស់បន្ទះបីស៊េរីផ្សេងគ្នាផងដែរគឺមានម៉ូដែលប្រើបន្ទះឈីប Snapdragon 750G 5G មានលេខកូដ ms7250, ម៉ូដែលប្រើឈីប Snapdragon 865 មានលេខកូដ ms8250 និងម៉ូដែលប្រើឈីប MediaTek Dimensity 1000 មានលេខកូដ mt6889។ ទោះជាយ៉ាងណាកាលពីខែមុននេះគេក៏ធ្លាប់បានប្រទះឃើញស្មាតហ្វូនជំនាន់ថ្មីរបស់ OPPO ចំនួនពីរម៉ូដែលផងដែរនៅលើបញ្ចីស្ថាប័ន Ministry of Industry and Information Technology ដែលមានលេខកូដសំគាល់ PEGT00 និង PEGM00 ហើយម៉ូដែលទាំងពីរនេះក៏បានបង្ហាញវត្តមាននៅលើបញ្ចីអាជ្ញាប័ណ្ណ 3C ផងដែរ ព្រមទាំងបង្ហាញថាពួកវាទ្រទ្រង់បច្ចេកវិទ្យាសាកភ្លើងល្បឿនលឿនកំលាំង 65W។
យ៉ាងណាមិញបើតាមប្រភពរបាយការណ៍ព័ត៌មានចចាមអារ៉ាមដែលបានលេចលឺមកថ្មីៗនេះបានបង្ហើបអោយដឹងថា ស្មាតហ្វូនជំនាន់ថ្មី OPPO Reno 5 Series នឹងមានអេក្រង់កម្រិត Full-HD+ ទំហំ 6.43 អ៊ីញជាប្រភេទបន្ទះបង្ហាញ AMOLED Punch-Hole Display, វាប្រើប្រាស់បន្ទះឈីបដែលមានអង្គ CPU កម្រិត Octa-Core ល្បឿន 2.4GHz ភ្ជាប់ដោយរ៉េមទំហំ 8GB/12GB ជាមួយអង្គផ្ទុកទិន្នន័យទំហំ 128GB និង 256GB។ ស្មាតហ្វូនជំនាន់ថ្មីនេះនឹងដំឡើងមកជាមួយប្រតិបត្តិការ Android 11 ចេញពីក្នុងប្រអប់តែម្តង។
បន្ថែមពីនេះពូកវាក៏នឹងដំឡើងមកជាមួយនូវប្រព័ន្ធកាមេរ៉ាក្រោយចំនួន 4 គ្រាប់ប្រើប្រាស់សែនស័រទំហំ 64MP Main Lens + 8MP Ultra-wide lens + 2MP Macro Lens + 2MP Depth Sensor ជាមួយនឹងកាមេរ៉ាសែលហ្វីទំហំ 32MP។ សម្រាប់ទំហំថ្មរបស់ពូកវាវិញគឺមានទំហំ 4200mAh ចែកជាពីរគ្រាប់ដោយមួយគ្រាប់មានទំហំ 2,100mAh ហើយស្មាតហ្វូនជំនាន់ថ្មីនេះ ត្រូវបានគេរំពឹងទុកថា នឹងមានការទ្រទ្រង់ប្រព័ន្ធសេវា 5G ទាំងអស់។ ទោះជាយ៉ាង ណាសម្រាប់កាលបរិច្ឆេទក្នុងការប្រកាសចេញ គឺមិនទាន់បង្ហើបអោយដឹងនៅឡើយទេ៕