បន្ទាប់ពីក្រុមហ៊ុន Qualcomm ប្រកាសបង្ហាញចេញនូវបន្ទះឈីបជំនាន់ថ្មីស៊េរី Snapdragon 870 ត្រឹមតែមួយម៉ោងប៉ុណ្ណោះ ស្រាប់តែក្រុមហ៊ុនផលិតស្មាតហ្វូនម៉ាក Motorola បានប្រកាសបញ្ជាក់ថា ស្មាតហ្វូនជំនាន់ថ្មីរបស់ខ្លួនម៉ាក Motorola Edge S ដែលត្រូវបង្ហាញខ្លួននៅថ្ងៃទី 26 ខែមករា សប្តាហ៍ក្រោយនេះ និងបំពាក់នូវបន្ទះឈីបជំនាន់ថ្មីនេះ។ កាលពីថ្ងទី 11 ខែមករា កន្លងទៅក្រុមហ៊ុន Motorola បានបង្ហោះសារមួយនៅលើគណនី Weibo របស់ខ្លួនដែលបានបញ្ជាក់ថា ស្មាតហ្វូនជំនាន់ថ្មីនឹងបង្ហាញវត្តមានក្នុងពេលឆាប់ៗនេះ នឹងប្រើប្រាស់បន្ទះឈីបនាគរាជជំនាន់ថ្មីរបស់ Qualcomm គឺ Snapdragon 800 Series។
សម្រាប់បន្ទះឈីបជំនាន់ថ្មីរបស់ Qualcomm ត្រូវបានក្រុមហ៊ុនប្រកាសថា វាមានល្បឿន Overclock លឿនជាងស៊េរីមុនៗដោយបន្ទះឈីបជំនាន់ថ្មីនេះត្រូវបានផលិតឡើងដោយប្រើនូវប្រព័ន្ធល្បឿន Kryo 585 Series ជាមួយការកែប្រែថ្មីនៅលើអង្គគណនា Cortex-A77 ដោយមានល្បឿនរត់ឡើងដល់ 3.2GHz។ ហើយបន្ទះឈីបនាគរាជជំនាន់ថ្មី Snapdragon 870 ត្រូវបានផលិតឡើងតាមប្រព័ន្ធស្តង់ដារ TSMC 7nm Processor មានអង្គ CPU ចំនួន 8-Core ចែកល្បឿនរត់ចេញជាបីផ្នែកផ្សេងគ្នាដោយក្នុងនោះ CPU ដែលមានល្បឿនបំផុត Super-Fast CPU មានចំនួន 1-core និង 3-core ដែលអូសដោយប្រព័ន្ធ Cortex-A77 CPU រីឯល្បឿនរត់មធ្យមមានចំនួន 4-core អូសដោយ Cortex-A55 CPU។
ងាកមកទូរស័ព្ទជំនាន់ថ្មី Motorola Edge S វិញត្រូវបានប្រភពបញ្ជាក់ថា នឹងមានគុណសម្បត្តិប្រហាក់ប្រហែលនឹងម៉ូដែល Motorola Edge+ ដែរ ដោយក្នុងនោះមានដូចជា ការប្រើនូវបន្ទះអេក្រង់កោង Curved-OLED Display ដែលមានកម្រិតបង្ហាញ Full-HD+ ទំហំ 6.7 អ៊ីញជាមួយកម្រិត refresh rate 105Hz មានកាមេរ៉ាក្រោយចំនួន 4 គ្រាប់ភ្ជាប់ដោយលែនគោលទំហំ 64MP មានថ្មទំហំ 5,000mAh និងដំឡើងមកជាមួយប្រតិបត្តិការ Android 11 ចេញពីប្រអប់ស្រាប់ថែមទៀតផង៕
