នៅពេលនេះ ក្រុមហ៊ុន Samsung បាននឹងកំពុងតែធ្វើការនៅលើស្មាតហ្វូនលំដាប់ថវិកា ហើយនិងស្មាតហ្វូនថ្នាក់កណ្តាលឆ្នាំ 2021 របស់ខ្លួនជាច្រើន។ Galaxy A52 គឺជាស្មាតហ្វូនមួយនៅក្នុងចំណោមស្មាតហ្វូនថ្មីៗទាំងនោះ ដែលមានលក្ខណៈសម្បត្តិគួរអោយចាប់អារម្មណ៍ជាច្រើន។ កន្លងមក យើងប្រាកដជាបានដឹងអំពីលក្ខណៈសម្បត្តិជាច្រើនរបស់ស្មាតហ្វូននេះ ជាពិសេស គឺ ការឌីស្សាញរបស់ស្មាតហ្វួននេះតែម្តង។ សម្រាប់ការបែកធ្លាយជាច្រើនទៀតកន្លងមក គឺបានធ្វើអោយយើងចាប់អារម្មណ៍ផងដែរ។
នៅថ្ងៃនេះ មានរូបភាពជាច្រើនសន្លឹករបស់ស្មាតហ្វូននេះ បែកធ្លាយនៅលើអ៊ីនធឺរណិតផងដែរ។ អ្នកប្រើប្រាស់នៅលើ Twitter ដែលមានឈ្មោះហៅថា Ahmed Qwaider បានបង្ហោះនូវរូបភាពជាច្រើនរបស់ស្មាតហ្វូន Galaxy A52 នេះ។ រូបភាពជាច្រើនមានការបង្ហាញអំពីគែមរបស់ស្មាតហ្វូននេះ និងប្រអប់របស់ស្មាតហ្វូននេះផងដែរ។ ស្មាតហ្វូននេះ គឺមានផ្នែកខាងក្រោយដែលទាក់ទាញមែនទែន។ នៅផ្នែកខាងក្រោយ ស្មាតហ្វូននេះគឺមានកាមេរ៉ាខាងក្រោយ 4 គ្រាប់។
នៅផ្នែកខាងមុខនោះ ស្មាតហ្វូននេះ មានកាមេរ៉ានៅកណ្តាលអេក្រង់របស់ស្មាតហ្វូននេះ។ ស្មាតហ្វូន Galaxy A52 LTE នេះនឹងមានអេក្រង់កម្រិត 90Hz refresh rate ខណៈពេលដែលស្មាតហ្វូនយ 5G គឺមានអេក្រង់កម្រិត 120Hz high refresh rate ផងដែរ។ នេះមានន័យថា ស្មាតហ្វូននេះ ល្អនៅក្នុងការអូសនៅលើអេក្រង់ និងបទពិសោធន៍នៃការលេងហ្គេមយ៉ាងរលូនថែមទៀតផង។
ស្មាតហ្វូននេះនឹងមានកាមេរ៉ាគោលដែលមានទំហំ 64MP ជាមួយនឹង Optical Image Stabilization ឬ OIS ។ ស្មាតហ្វូននេះក៏មានភ្ចាប់ជាមួយនឹង IP67 សម្រាប់ការពារធូលី និងទឹកផងងដែរ។ ស្មាតហ្វូន Samsung Galaxy A52 នេះនឹងប្រើប្រាស់នូវបន្ទះឈីប Snapdragon 720G៕
