ព័ត៌មានថ្មីបញ្ជាក់ថា កាមេរ៉ាសម្រាប់ប្រើប្រាស់នៅលើ iPhone 13 Series គឺបានធ្វើការផលិតទ្រង់ទ្រាយធំរួចរាល់ហើយ!

ជារៀងរាល់ឆ្នាំ ក្រុមហ៊ុន Apple តែងតែប្រកាសចេញនូវស្មាតហ្វូន iPhones របស់ខ្លួននៅពាក់កណ្តាលខែកញ្ញា។ ប៉ុន្តែ កាលពីឆ្នាំមុននេះ ដោយសារតែមេរោគរាតត្បាតនោះ បានធ្វើអោយក្រុមហ៊ុនអាមេរិកាំងមួយនេះ ធ្វើការពន្យារពេលក្នុងការប្រកាសចេញស្មាតហ្វូន iPhone 12 ដល់ទៅ 1 ខែឯណោះ។ ប៉ុន្តែសម្រាប់វត្តមានរបស់ស្មាតហ្វូន iPhone 13 Series នេះ ក្រុមហ៊ុន Apple ត្រូវបានគេរំពឹងថា អាចនឹងត្រឡប់មកកាន់ស្ថានភាពធម្មតាវិញ សម្រាប់ការបង្ហាញស្មាតហ្វូនរបស់ខ្លួន។

យោងតាមប្រភពជាច្រើនបានបញ្ជាក់ថា ក្រុមហ៊ុននេះ បានធ្វើការផលិតនូវសមាសភាគសំខាន់ៗរបស់ខ្លួនរួចហើយសម្រាប់ស្មាតហ្វូនជាច្រើននាពេលខាងមុខរបស់ខ្លួននោះ។ ស្មាតហ្វូន iPhone 13 នេះ មើលទៅមានរូបរាងដូចគ្នាទៅនឹងស្មាតហ្វូន  iPhone 12 អញ្ចឹងដែរ។ ក្រុមហ៊ុននេះ នឹងបញ្ចេញនូវស្មាតហ្វូនចំនួន 4 ម៉ូឌែលនោះគឺ  iPhone 13, iPhone 13 Pro, iPhone 13 Pro Max និង  iPhone 13 mini នៅលើទីផ្សារ។ នៅក្នុងពេលនេះ ស្មាតហ្វូននេះ នឹងមាន notch ដែលមានទំហំតូចជាងមុនដោយសារតែបច្ចេកវិទ្យាថ្មីដែលប្រើប្រាស់ដោយក្រុមហ៊ុន Apple នេះ។ 

បន្ថែមពីនេះ ក៏មានការអះអាងថា ស្មាតហ្វូន iPhone 13 នេះនឹងមានការ upgrade ទៅលើកាមេរ៉ារបស់វាផងដែរនៅឆ្នាំនេះ។ ព័ត៌មាននេះគឺចេញពីអ្នកផ្គត់ផ្គង់ជាច្រើនដែលផលិតនូវសមាសភាគសម្រាប់ក្រុមហ៊ុន Apple នោះ។ របាយការណ៍មួយចេញពី Digitimes បាននិយាយថា ក្រុមហ៊ុន Huawei គឺបានធ្វើការកម្ម៉ង់ទៅលើសមាសភាគកាមេរ៉ាតិច បន្ទាប់ពីការដាក់ទណ្ឌកម្មរបស់សហរដ្ឋអាមេរិក។ ប៉ុន្តែក្រុមហ៊ុន OPPO, Xiaomi និង vivo គឺបង្កើននូវចំនួននៃការបញ្ជាទិញរបស់ខ្លួន៕