បន្ទាប់ពីទទួលបាននូវភាពជោគជ័យទៅលើការបញ្ចេញនូវប្រព័ន្ធប្រតិបត្តិការ HarmonyOS រួចមក នៅពេលនេះ ក្រុមហ៊ុន Huawei ដែលជាអតីតអ្នកគ្រប់គ្រងទីផ្សារស្មាតហ្វូនបានងាកមកធ្វើការនៅលើផលិតផលថ្មីៗវិញម្តង។ នៅថ្ងៃនេះ យោងតាមការបញ្ជាក់នៅក្នុងប៉ាតង់ថ្មីមួយរបស់ក្រុមហ៊ុន Huawei គឺបានទម្លាយអំពីស្មាតហ្វូនមួយដែលមានអេក្រង់អាចរមូរបាន ដែលនេះគឺជាសមិទ្ធិផលថ្មីមួយទៀតសម្រាប់ក្រុមហ៊ុននេះបន្ទាប់ពីត្រដាបត្រដួសអស់ពេលជាងពីរឆ្នាំមកនេះ។
នៅក្នុងប៉ាតង់នេះ គឺមានការបង្ហាញថា ស្មាតហ្វូនថ្មីនេះ គឺនឹងមានការទ្រទ្រង់នូវមុខងារគ្រប់គ្រង Air Gesture ផងដែរ។ បើ តាមការបញ្ជាក់នៅក្នុងរបាយការណ៍ចេញពី LetsGoDigital បានអោយដឹងថា ក្រុមហ៊ុនបច្ចេកវិទ្យាយក្សរបស់ចិនបានស្នើសុំនូវប៉ាតង់មួយទៅកាន់ការិយាល័យ World Intellectual Property Organization (WIPO សម្រាប់ស្មាតហ្វូនដែលមានអេក្រង់អាចគ្រប់គ្រងបាន។ ស្មាតហ្វូននេះ នឹងមានអេក្រង់អាចរមូរបាន ហើយវាអាចនឹងក្លាយជាស្មាតហ្វូនជំនាន់ថ្មីនាពេលអនាគតរបស់ស្មាតហ្វូន Mate Series។
ប្រភពដដែកនេះ បានបន្តថា នៅក្នុងប៉ាតង់នេះ គឺអនុញ្ញាតអោយអ្នកប្រើប្រាស់អាចប្រើប្រាស់នូវ Air Gestures ក្នុងការគ្រប់គ្រងទៅលើអេក្រង់របស់ស្មាតហ្វូនថ្មីនេះ។ ដើម្បីអាចគ្រប់គ្រងទៅលើ Air Gesture នេះបាន គឺត្រូវគ្រប់គ្រងដោយប្រើប្រាស់នូវ Motion Sensor និងកាមេរ៉ា។ បន្ថែមពីនេះទៀតនោះ ក្រុមហ៊ុន Huawei អាចនឹងអនុញ្ញាតអោយអ្នកប្រើប្រាស់គ្រប់គ្រងទៅលើល្បឿននៃអេក្រង់នេះផងដែរ៕