Mi Mix Fold គឺជាស្មាតហ្វូនបត់បានរបស់ក្រុមហ៊ុន Xiaomi ដែលបានបង្ហាញវត្តមាននៅប្រទេសចិន កាលពីខែមេសាកន្លងទៅនេះ ហើយក៏បានស្ងាត់ទៅវិញអស់រយៈពេលយ៉ាងយូរ ដោយរហូតមកដល់ ពេលនេះយើងនៅទាន់មានដំណឹងស្តីពីការចេញលក់ស្មាតហ្វូនបត់បាននេះនៅលើទីផ្សារសកលនៅឡើយទេ។
នៅថ្ងៃនេះ មានដំណឹងមួយដែលមានប្រភពចេញពីប្រទេសចិនថា ក្រុមហ៊ុន Xiaomi បាននឹង កំពុង តែធ្វើការលើស្មាតហ្វូនបត់បាននេះហើយ ដោយថែមទាំងមានការបញ្ជាក់ថា ស្មាតហ្វូននេះនឹងមាន ការអាប់ដែតកាន់តែពិសេសជាងមុនទៀតផង។ ប្រភពខាងលើនេះ បានបន្តថា ស្មាតហ្វូនថ្មីនេះ គឺមិនមែនជាជំនាន់ទីពីររបស់ Mix Fold នោះទេ វាគ្រាន់តែ មានការអាប់ដែតពីជំនាន់មុនតែប៉ុណ្ណោះ។
ស្មាតហ្វូនបត់បានថ្មីនេះ គឺនឹងមានការអាប់ដែតទៅលើអេក្រង់ ដោយម៉ូដែលថ្មីនេះ និងមានប្រើប្រាស់ នូវអេក្រង់ផ្នែកខាងក្នុងល្បឿន 90Hz និងអេក្រង់ខាងក្រៅល្បឿន 120Hz ខណៈដែលម៉ូដែលមុន គឺអេក្រង់ខាងក្នុងមានល្បឿនត្រឹមតែ 60Hz និងអេក្រង់ខាងក្រៅប្រើប្រាស់ ត្រឹមតែ 90Hz ប៉ុណ្ណោះ។ បន្ថែមពីនេះ ក៏មានការបញ្ជាក់ថា ស្មាតហ្វូននេះ ក៏នឹងប្រើប្រាស់នូវកាមេរ៉ាក្រោមអេក្រង់ផងដែរ បើទោះបី ជាអ្នកទម្លាយព័ត៌មានមិនបាននិយាយពីរឿងនេះក៏ដោយ។ ស្មាតហ្វូនបត់បាននេះ នឹងមានថាមពលថ្មទំហំ 5,000mAh និងមានការទ្រទ្រង់ជាមួយនឹងឆ្នាំងសាកកម្លាំង 120W fast charging ថែមទៀតផង។
