យើងដឹងរួចហើយថា Apple គឺប្រើប្រាស់រន្ធដោតសាកថ្ម ឬចម្លងទិន្នន័យចេញចូលនៅលើផលិតផល iDevices របស់ខ្លួនអស់រយះពេលជាច្រើនទសវត្សរ៍មកហើយ បើទោះបីជាក្រុមហ៊ុនផលិតស្មាតហ្វូន Android បានឡើងមកប្រើរន្ធប្រភេទ USB-C ស្ទើរទាំងអស់ហើយក្តី។ ហើយឧបករណ៍ថ្មីចុងក្រោយរបស់ Apple ដែលបានប្រើរន្ធ USB-C គឺជា iPad mini ចំនែកទូរស័ព្ទ iPhone Series គឺនៅតែបន្តប្រើរន្ធ Lightning Port ដដែល។
ខណៈពេលដែល Apple មិនទាន់សម្រេចចិត្តងាកមកប្រើរន្ធ USB-C ជំនួសឲ្យ Lightning Port នៅលើ iPhone របស់ខ្លួន ស្រាប់តែបែកធ្លាយវីដេអូនៅលើ Youtube ដោយបានបង្ហាញពីម្ចាស់ iPhone X ម្នាក់ដែលគេដឹងថាមានឈ្មោះ Ken Pillonel បានបង្ហាញពីដំណើរការដោះដូរពីរន្ធ Lightning Port របស់ iPhone X មកដាក់រន្ធ USB-C ជំនួសវិញ។ បើតាមវីដេអូបានបង្ហាញថា ក្រោយពីបានធ្វើការផ្លាស់ប្តូររួចហើយ គឺការសាកថ្មនៅលើ iPhone X និងការភ្ជាប់ក្នុងការផ្ទេរទិន្នន័យជាមួយកុំព្យូទ័រតាមរយះខ្សែចម្លង USB-C គឺអាចដំណើរការបាន 100%។ ជាមួយគ្នានេះគេមិនឃើញមានលោតសារប្រមាណពី Apple Repair Terms & Condition ប៉ុន្តែ បញ្ហានេះត្រូវបានគេដឹងថា iPhone X នេះ គឺហួសកំនត់ការធានា (Out-of-Warranty) ពីក្រុមហ៊ុន Apple ហើយ។
Pillonel បានធ្វើការផ្លាស់ប្តូរខែ្ស Apple C94 Connector ចេញ និងបានបង្កើតបន្ទះសៀគ្វីថ្មី (PCB) ដើម្បីភ្ជាប់ជាមួយរន្ធ USB-C បន្ទាប់មកលោកក៏បានជៀរកាត់ផ្នែកខាងក្រោមដើម្បីធ្វើជារន្ធដាក់បញ្ចូលក្បាល USB-C ចូលទៅក្នុង iPhone។ បើតាមរបាយការណ៍បានបញ្ជាក់ថា លោក Pillonel បានធ្វើការស្រាវជ្រាវក្នុងការផលិតបន្ទះសៀគ្វីថ្មីដើម្បីធ្វើការផ្លាស់ប្តូររន្ធ Lightning Port លើ iPhone មករន្ធ USB-C អស់រយះពេលជាច្រើនខែមកហើយ។
បើយោងតាមរបាយការណ៍ចេញពី AppleInsider បានឲ្យដឹងថា លោក Ken Pillonel គឺជាវិស្វករគ្រឿងអេឡិចត្រូនិក ដោយលោកបានបញ្ចប់ការសិក្សាថ្នាក់អនុបណ្ឌិតផ្នែកផលិតមនុស្សយន្តពីវិទ្យាស្ថានបច្ចេកវិទ្យា Swiss Federal Institute of Technology, EPFL។ ដូចនេះមានន័យថាមិនមែនមនុស្សធម្មតាទូទៅគ្រប់គ្នាអាចធ្វើផ្លាស់ប្តូរបច្ចេកវិទ្យាមួយនេះបាននៅលើឧបករណ៍របស់ពួកគេនោះ៕
