ក្រុមហ៊ុនបច្ចេកវិទ្យា Xiaomi ទើបតែសហការជាមួយនឹងក្រុមហ៊ុន Lumilan ដែលជាក្រុមហ៊ុនជំនាញក្នុងផ្នែកស្រាវជ្រាវ និងអភិវឌ្ឍ (R&D) ក្នុងការផលិត ការលក់ និងផ្តល់សេវាកម្មទៅលើគ្រឿងសម្ភារៈសម្រាប់ OLED។ យោងតាមការបញ្ជាក់ចេញពី អ្នលទម្លាយ DCS បានអោយដឹងថា ក្រុមហ៊ុន Xiaomi មានគោលដៅក្នុងការកែលម្អរទៅលើបច្ចេកវិទ្យានៃសម្ភារៈសម្រាបើប្រើប្រាស់នៅលើអេក្រង់ថ្មីនេះ នៅក្នុងការស្រាវជ្រាវទៅលើការអភិវឌ្ឍនៃគ្រឿងបន្លាស់សំខាន់ៗនៃ OLED នេះ។ សូមជំរាបថា មកដល់ពេលនេះ ក្រុមហ៊ុន Xiaomi នៅមិនទាន់អាចផលិតផលិតផលចុងក្រោយ ឬអេក្រង់ Panels ដោយខ្លួនឯងនៅឡើយទេ។
គួរបញ្ជាក់ថា មកទល់នឹងពេលនេះ នៅលើទីផ្សារប្រទេសចិន មានក្រុមហ៊ុនផលិតអេក្រង់ជាច្រើន ដូចជា BOE ដែលផលិតនូវបន្ទះអេក្រង់ OLED panels ដ៏អស្ចារ្យដែលមានភាពច្បាស់ជាងមុន និងមានគុណភាពល្អជាងមុនក្នុងការប្រើប្រាស់។ ដូច្នេះ នៅក្នុងការវិនិយោគទៅលើបច្ចេកវិទ្យាថ្មីៗនេះ គឺបង្ហាញកាន់តែច្បាស់ពីការពង្រឹងទៅលើផលិតផលចុងក្រោយកាន់តែប្រសើរឡើងបន្ថែមទៀតទៅលើអេក្រង់។ កាលពេលថ្មីៗនេះ ក្រុមហ៊ុន Xiaomi ក៏ទើបតែប្រកាសនូវព្រឹត្តិការណ៍ “Xiaomi-Lumilan OLED Key Materials and Devices Joint Laboratory” នៅក្នុងទីក្រុង Ningbo ដែលជាមជ្ឈមណ្ឌលឧស្សាហកម្មមួយនៅក្នុងប្រទេសចិនផងដែរ។
នៅក្នុងព្រឹត្តិការណ៍នៃការដាក់បង្ហាញនូវមន្ទីរពិសោធន៍នេះ លោក Wu Cangzhi ដែលជាអ្នកគ្រប់គ្រងទូទៅរបស់ក្រុមហ៊ុន Xiaomi បាននិយាយថា “គោលដៅរបស់ក្រុមហ៊ុន Xiaomi នៅក្នុងទសវត្សន៍ថ្មីនេះ គឺការវិនិយោគយ៉ាងខ្លាំងទៅលើបច្ចេកវិទ្យាស្នូលជាច្រើន ដើម្បីក្លាយជាក្រុមហ៊ុននាំមុខគេជាសកលទៅលើបច្ចេកវិទ្យា hard-core technology ជំនាន់ថ្មីនេះ។” ការបណ្តាក់ទុនរួមគ្នាជាមួយនឹងក្រុមហ៊ុន Lumilan នឹងផ្តោតទៅលើឧស្សាហកម្មOLED និងការពង្រឹងទៅលើគ្រឿងបន្លាស់នៃផលិតផលអេក្រង់នេះកាន់តែប្រសើរ៕