ក្រុមហ៊ុន realme ទើបតែបានប្រកាសចេញស្មាតហ្វូនជំនាន់ថ្មីចុងក្រោយរបស់ខ្លួនម៉ូដែល GT Neo 6SE នៅទីផ្សារប្រទេសចិន។ ស្មាតហ្វូនជំនាន់ថ្មីនេះ គឺជាអ្នកស្នងដំណែងបន្តពីម៉ូដែល GT Neo 5 SE ដែលចេញកាលពីឆ្នាំ 2023។ នៅលើស្មាតហ្វូនជំនាន់ថ្មីនេះ មានការធ្វើឲ្យប្រសើរឡើងនៅលើមុខងារមួយចំនួន ក្នុងនោះមានដូចជាបច្ចេកវិទ្យាអេក្រង់ដែលមានកម្រិតពន្លឺខ្ពស់បំផុតដល់ 6,000nits និងដំណើរការដោយបន្ទះឈីបជំនាន់ថ្មី Qualcomm Snapdragon 7+ Gen 3 ជាដើម។
Realme GT Neo 6SE បានបំពាក់នូវបន្ទះអេក្រង់ទំហំ 6.78-inch ជាប្រភេទអេក្រង់ OLED Display ដែលបំពាក់នូវបច្ចេកវិទ្យា S1 luminescent material របស់ក្រុមហ៊ុន BOE ហើយក៏ជាបច្ចេកវិទ្យាអេក្រង់ដំបូងពីក្រុមហ៊ុនដែលមានកម្រិតពន្លឺខ្ពស់ដល់ 6,000nits។ បន្ថែមពីនេះកម្រិតពន្លឺ6,000nits peak brightness នៅលើអេក្រង់ GT Neo 6SE ក៏គាំទ្រជាមួយនឹងការបង្ហាញមាតិកា HDR ថែមទៀតផង។ ទោះជាយ៉ាងណាបច្ចេកវិទ្យាអេក្រង់នេះ គឺអាចបង្ហាញនូវកម្រិតពន្លឺខ្ពស់ជាអតិបរមាទូទៅបានដល់ 1,600nits និងកម្រិតពន្លឺប្រើការទូទៅប្រចាំថ្ងៃដល់ 1,000nits។
ទន្ទឹមនឹងនេះ អេក្រង់របស់ realme GT Neo 6 SE គាំទ្រកម្រិតបង្ហាញបាន 2780 x 1264px ជាមួយល្បឿន 120Hz និងប្រើបច្ចេកវិទ្យាបង្ហាញ 8T LTPO Technology ព្រមទាំងគាំទ្រសំពាធសំគាល់បានដល់ 2,500Hz។ លើសពីនេះទៅទៀតអេក្រង់របស់ Neo GT 6SE នៅគាំទ្រមុខងារ 2160Hz high-frequency PWM dimming និងបច្ចេកវិទ្យា 3+1 Pulse DC-like low-stroboscopic technology ដែលផ្តល់នូវការបង្ហាញចេញប្រកបដោយប្រសិទ្ធិភាពខ្ពស់ និងមានផាសុខភាពក្នុងការទស្សនា។ អេក្រង់របស់ស្មាតហ្វូនជំនាន់ថ្មីនេះ មានស្រោបការពារដោយកញ្ចក់់ Gorilla Glass Victus 2 ហើយនិងមានគែមអេក្រង់តូចស្តើងបំផុតត្រឹម 1.36mm តែប៉ុណ្ណោះ ដែលធ្វើឲ្យផ្ទៃអេក្រង់មានភាពស្រឡះល្អ។
លើសពីនេះទៅទៀត realme ក៏បានបន្ថែមនៅបច្ចេកវិទ្យាថ្មី Greenfield AI eye protection technology និងAI gaming eye protection technology ដោយក្រុមហ៊ុនបានបញ្ជាក់ថា GT Neo 6 SE គឺជាស្មាតហ្វូនដែលដំបូងរបស់ខ្លួនដែលមានមុខងារពិសេសសម្រាប់ការពារភ្នែកហៅថ “Active eye protection solution”។ realme GT Neo 6 SE មានជម្រើសពីរពណ៌ គឺពណ៌ទឹកប្រាក់ និងពណ៌បៃតង ជាមួយការប្រើប្រាស់បច្ចេកវិទ្យារួមផ្សំ nano mirror coating និង AG technology ដែលធ្វើឲ្យតួររបស់ស្មាតហ្វូនមើលទៅដូចស្រោបដោយសារធាតុ Titanium អីចឹង។
Realme GT Neo 6 SE បំពាក់បន្ទះឈីប Snapdragon 7+ Gen 3 ភ្ជាប់ដោយរ៉េមទំហំចាប់ពី 8GB ដល់ 16GB ជាមួយអង្គផ្ទុកទិន្នន័យទំហំចាប់ពី 256GB ដល់ 512GB។ ស្មាតហ្វូននេះ មានថ្មទំហំ 5,500mAh ភ្ជាប់ជាមួយឈីប SuperVOOC S Power Management ដើម្បីបង្កើនអាយុកាលប្រើប្រាស់របស់ថ្មបានរយះពេលយូរអង្វែង។ ទោះជាមានថ្មទំហំធំ ប៉ុន្តែទំងន់ស្មាតហ្វូនស្រាលត្រឹម 191 ក្រាមប៉ុណ្ណោះ។ សម្រាប់ការសាកភ្លើងវិញ គឺគាំទ្របច្ចេកវិទ្យាសាកភ្លើងល្បឿនលឿនកំលាំង 100W Wired Fast Charging ដែលសាកពី 0% ទៅ 50% ប្រើពេលខ្ទង់ប្រមាណ 12 នាទីប៉ុណ្ណោះ។ realme បានបញ្ជាក់ថា សម្រាប់ថ្មរបស់ realme GT Neo 6SE មានអាយុកាលប្រើប្រាស់បានដល់ទៅជាង 4 ឆ្នាំឯណោះ។
ចំពោះប្រព័ន្ធកាមេរ៉ាថតរូប និងវីដេអូវិញ realme GT Neo 6SE មានកាមេរ៉ាក្រោយចំនួន 2 គ្រាប់ដោយមានសែនស័រមេទំហំ 50MP Sony IMX882 មានមុខងារ OIS រួមនឹងសែនស័រ Ultrawide ទំហំ 8MP Sony IMX355 និងមានកាមេរ៉ាសែលហ្វីទំហំ 32MP Sony IMX615 ជាលែនទំលុះថ្ងាសអេក្រង់។ សម្រាប់មុខងារសំខាន់ៗជាច្រើនទៀតរបស់ GT Neo 6SE រួមមាន IR blaster, X-axis linear motor សម្រាប់មុខងារ haptic feedback, all-round NFC សម្រាប់ការទូទាត់ប្រាក់ និងការតភ្ជាប់ផ្សេង, ប្រព័ន្ធdual-frequency GPS, IP65 dust and water resistance, in-display fingerprint sensor, ក៏ដូចជាគាំទ្រការដំឡើងមកជាមួយ Realme UI 5.0 ចុងក្រោយចេញប្រអប់ស្រាប់ជាដើម។
Realme GT Neo 6SE នឹងត្រូវចេញលក់ផ្លូវការណ៍នៅទីផ្សារប្រទេសចិននៅថ្ងៃទី 17 ខែមេសា ខាងមុខនេះ នៅគ្រប់បណ្តាញលក់ក្នុងប្រទេសចិនដែលមានតម្លៃចាប់ពីខ្ទង់ប្រហែល $250/$260/$290 ដល់ $330 ទៅតាមជម្រើសរ៉េម និងទំហំផ្ទុកក្នុងម៉ាស៊ីន៕
