ស្មាតហ្វូនថ្នាក់ប្រណិតជំនាន់ថ្មីរបស់ក្រុមហ៊ុន Samsung គឺបានត្រៀមខ្លួនក្នុងការប្រកាសចេញជាផ្លូវការនៅក្នុងពេលប៉ុន្មានខែខាងមុខនេះហើយ។ បើតាមសេចក្តីរាយការណ៌កន្លងមកបាននិយាយថា ក្រុមហ៊ុន Samsung នឹងបង្ហាញនូវស្មាតហ្វូនបត់បានជំនាន់ថ្មីរបស់ខ្លួននៅក្នុងខែកក្កដាខាងមុខនេះ។ ស្មាតហ្វូនអេក្រង់បត់បាននេះ នឹងមាន 2 ម៉ូដែល រួមមានដូចជា Galaxy Z Flip 6 និង Galaxy Z Fold 6។ គិតចាប់តាំងពីការចេញព័ត៌មានថា ក្រុមហ៊ុន Samsung បានត្រៀមខ្លួនក្នុងការផលិតទៅលើស្មាតហ្វូន Galaxy Z Flip 6 នេះមក មានរបាយការណ៌ថ្មីមួយបានបញ្ជាក់ថា ការរៀបចំផលិតទៅលើស្មាតហ្វូននេះ គឺស្ថិតនៅក្នុងការបង្កើនល្បឿនហើយ។
ថ្មីៗនេះ ក្រុមហ៊ុន Samsung ទើបតែជ្រើសរើសយកក្រុមហ៊ុន Econy ដែលជាអ្នកផ្គត់ផ្គង់ទៅលើកញ្ចក់ប្រភេទ ultra-thin glass ដែលនឹងប្រើប្រាស់នៅលើស្មាតហ្វូនបត់បាន Galaxy Z Flip 6 របស់ខ្លួន ដោយសារតែសមាសភាគនេះ គឺជាតម្រូវការមុននឹងចាប់ផ្តើមដំណើរការនៃការផលិតទៅលើស្មាតហ្វូននេះ។ សម្រាប់កញ្ចក់ ultra-thin glass របស់ស្មាតហ្វូនបត់បាន Galaxy Z Fold 6 នេះដែរ ក្រុមហ៊ុន Samsung ក៏នូវតែបន្តការធ្វើការជាមួយនឹងក្រុមហ៊ុនកុងត្រា Dowoo Insys សម្រាប់ដំណើរការ back-end processing ដដែលផងដែរ។
សម្រាប់ដំណើរការ Back-end processing ទៅលើកញ្ចក់ ultra-thin glass នេះ គឺដើម្បីធ្វើអោយការផលិតកាន់តែមានភាពងាយស្រួល។ ក្រុមហ៊ុនផ្តល់សេវាកម្មទាំងនេះ ទទួលបាននូវកុងត្រានៃការផលិត ultra-thin glass ហើយក្រុមហ៊ុននេះ ត្រូវធ្វើយ៉ាងណាកាត់អេក្រង់នេះ អោយត្រូវសក្តិសមទៅនឹងអេក្រង់របស់ស្មាតហ្វូន។ ក្រុមហ៊ុន Samsung នៅមិនទាន់ធ្វើការផ្លាស់ប្តូរទៅលើផ្នែកនេះសម្រាប់ខ្សែសង្វាក់ផ្គត់ផ្គង់នោះទេ។
ទាំងក្រុមហ៊ុន Econy និង Dowoo Insys គឹមានកុងត្រារបស់ខ្លួនក្នុងការផលិតនេះចាប់តាំងពីឆ្នាំ 2021 ដែលក្រុមហ៊ុនទាំងនេះធ្វើការផលិតទៅលើស្មាតហ្វូន Galaxy Z Flip និង Galaxy Z Fold។ សម្រាប់ស្មាតហ្វូន Galaxy Z Flip ក៏មានការផលិតស្រទាប់អេក្រង់ចេញពីក្រុមហ៊ុន Corning ហើយស្មាតហ្វូន Galaxy Z Fold គឺមានការផលិតចេញពីក្រុមហ៊ុន Schott។ យ៉ាងណាមិញ នៅមិនទាន់មានការប្រកាសជាផ្លូវការនោះទេអំពីស្មាតហ្វូនបត់បានរបស់ក្រុមហ៊ុន Samsung នេះ ប៉ុន្តែការប្រកាសជាផ្លូវការអាចនឹងចាប់ផ្តើមនៅក្នុងខែកក្កដាឆ្នាំ 2024 នេះ៕