ក្រុមហ៊ុន Apple នឹងធ្វើការប្រកាសចេញ iPad Air ដែលមានអេក្រង់ទំហំ 12.9-អ៊ីង ដំបូងក្នុងពេលឆាប់ខាងមុខនេះ ជាមួយគ្នានេះបើតាមអ្នកជំនាញផ្នែកអេក្រង់មកពីស្ថាប័ន DSCC លោក Ross Young បាននិយាយថា Apple នឹងធ្វើការបង្កើនសមត្ថភាពបច្ចេកវិទ្យាអេក្រង់របស់ iPad Air ជំនាន់ថ្មីនេះ។ ដែលនេះនឹងធ្វើឲ្យ iPad Air មានសមត្ថភាពកាន់តែជិតជាមួយ iPad Pro 12.9-អ៊ីង លើផ្នែកបច្ចេកវិទ្យាអេក្រង់។
សម្រាប់ iPad Air 10.9-inch បច្ចុប្បន្ន គឺប្រើបច្ចេកវិទ្យាអេក្រង់ LCD Panel។ ហើយចំពោះ iPad Air ជំនាន់ថ្មីនឹងប្តូរទៅប្រើបច្ចេកវិទ្យាអេក្រង់ mini-LED Display ដើម្បីជួយបង្កើននូវគុណភាពពន្លឺកាន់តែខ្ពស់សម្រាប់មាតិកាកម្សាន្តកម្រិត HDR។ បន្ថែមពីនេះវា ក៏នឹងជួយបង្កើនកម្រិតពណ៌ខ្មៅកាន់តែដិតខ្លាំង និងប្រើថាមពលថ្មតិចជាងមុនដើម្បីរក្សាថាមពលថ្មប្រើបានយូរ។ បច្ចុប្បន្នបច្ចេកវិទ្យាអេក្រង់ mini-LED Display នេះ គឺមានប្រើនៅលើ iPad Pro 12.9-អ៊ីង និង MacBook Pro ប៉ុណ្ណោះ។ គុណសម្បត្តិនៃបច្ចេកវិទ្យាអេក្រង់ទំហំ 12.9-អ៊ីង Mini-LED Display ដែលនឹងត្រូវប្រើនៅលើ iPad Air ជំនាន់ថ្មី ត្រូវបានគេដឹងថា គឺដូចគ្នានឹងបច្ចេកវិទ្យាអេក្រង់ដែលប្រើនៅលើ iPad Pro 12.9-អ៊ីង បច្ចុប្បន្ន។
ដោយក្នុងនោះមានដូចជាប្រព័ន្ធ 2D backlight system with full-array local dimming zones, គាំទ្រកម្រិតបង្ហាញ 2732 x 2048px ជាមួយកម្រិតដង់ស៊ីតេភាពច្បាស់ 264ppi គាំទ្រមុខងារ ProMotion adaptive refresh rate technology ជាមួយកម្រិតពន្លឺខ្ពស់ដល់ 1,600nits សម្រាប់មាតិកាកម្សាន្តកម្រិត HDR ជាដើម។ នៅខណៈពេលដែលមានព័ត៌មានទាក់ទងនឹងការធ្វើបច្ចុប្បន្នភាពបច្ចេកវិទ្យាអេក្រង់ mini-LED Display នៅលើ iPad Air 12.9-អ៊ីង ក៏មានព័ត៌មានចចាមអារ៉ាមលើកឡើងថា Apple ក៏នឹងប្រើនូវបច្ចេកវិទ្យាអេក្រង់កម្រិតខ្ពស់ OLED Display ជំនូសឲ្យ Mini-LED Display សម្រាប់ iPad Pro Series ជំនាន់ថ្មីដែលបង្ហាញវត្តមានក្នុងឆ្នាំនេះផងដែរ។
បើតាមប្រភពព័ត៌មានចចាមអារ៉ាមបាននិយាយថា iPad Pro Series ជំនាន់ថ្មីឆ្នាំ 2024 នឹងបំពាក់បន្ទះឈីបជំនាន់ថ្មី Silicon M3 និងប៊ិចជំនាន់ថ្មី Apple Pencil 3 រួមនឹងបច្ចេកវិទ្យាអេក្រង់ថ្មីដែលមានគែមកាន់តែតូចស្តើង ជាមួយកម្រាស់កាន់តែស្តើងជាងជំនាន់មុន។ ប្រភពក៏បានបញ្ជាក់ថា Apple នឹងធ្វើការប្រកាសចេញ iPad ជំនាន់ថ្មីរបស់ខ្លួននៅខែឧសភា ឆ្នាំនេះ អាចជានឹងក្នុងសប្តាហ៍ទីពីរ៕