vivo X100 Ultra ត្រូវបានបញ្ជាក់ហើយថា នឹងមានការប្រកាសចេញនៅក្នុងខែឧសភាខាងមុខនេះ

vivo X100 series គឺជាស្មាតហ្វូនជំនាន់ថ្មី ដែលត្រូវបានក្រុមហ៊ុនធ្វើការប្រកាសសម្ពោធជាផ្លូវការនៅលើទីផ្សារប្រទេសចិនកាលពីខែវិច្ឆិកាឆ្នាំមុននេះ។ សម្រាប់វត្តមានរបស់ X100 lineup នេះ គឺមានម៉ូដែលស្តង់ដារ ហើយនិង ម៉ូដែល Pro ដោយក្រុមហ៊ុននេះមិនទាន់មានការបញ្ជាក់ពីដំណឹងរបស់ម៉ូដែល Pro+ ដូចឆ្នាំមុនៗនោះទេ។

យោងតាមការទម្លាយជាច្រើនកាលពីមុននេះ បានអោយដឹងថា សម្រាប់វត្តមាន X100 Pro+ អាចនឹងមានការផ្លាស់ប្តូរឈ្មោះមកជាម៉ូដែល X100 Ultra វិញ ស្របពេលជាមួយគ្នានេះដែរ កាលពីប៉ុន្មានថ្ងៃមុននេះ អគ្គនាយករងក្រុមហ៊ុន នេះ ក៏មានការទម្លាយពីការបង្ហាញវត្តមានរបស់ស្មាតហ្វូនជំនាន់ថ្មីនេះផងដែរ។

បើតាមការបង្ហោះនៅលើបណ្តាញ Weibo ពីអ្នកទម្លាយ Digital Chat Station បានអោយដឹងថា ស្មាតហ្វូនជំនាន់ថ្មីនេះ គឺមានឈ្មោះថា Thanos ហើយក៏មានការបញ្ជាក់ច្បាស់ហើយថា គឺជាម៉ូដែល Vivo X100 Ultra។ ស្មាតហ្វូនថ្មីនេះ ត្រូវបានគេនិយាយថា នឹងមានវត្តមាននៅលើទីផ្សារប្រទេសចិននាខែឧសភាខាងមុខនេះផងដែរ។ ដូច្នេះ យើងនឹងអាចដឹងព័ត៌មានថ្មីៗជាច្រើនទៀតនៅពេលដ៏ខ្លី។ ទាក់ទងនឹងព័ត៌មាននេះ អគ្គនាយករងក្រុមហ៊ុននេះ ក៏បានបង្ហោះស្រដៀងគ្នានេះដែរ។  

សូមជំរាបថា កាលពីពេលមុននេះ មានពាក្យចចាមអារ៉ាមជាច្រើនបាននិយាយថា ស្មាតហ្វូនជំនាន់ថ្មី Vivo X100 Ultra នឹងមានការបំពាក់នូវអេក្រង់ E7 AMOLED display កម្រិត QHD+ resolution និងមានល្បឿន 120Hz refresh rate ហើយស្មាតហ្វូននេះ ក៏ជាស្មាតហ្វូនដំបូងគេរបស់ក្រុមហ៊ុន Vivo ដែលមានការបំពាក់មកជាមួយនូវបន្ទះឈីប Snapdragon 8 Gen 3 ផងដែរ។ ស្មាតហ្វូននេះ នឹងមានកាមេរ៉ាគោលទំហំ 50MP LYT-900 និងគ្រាប់ទីពីរមានទំហំ 200MP periscope lens ហ៊្សូមបាន 200x digital zoom។ ក្រុមហ៊ុន Vivo ត្រូវបានគេរាយការណ៌ថា ក៏បានធ្វើការងារនៅលើស្មាតហ្វូន X100s និង X100s Pro ផងដែរ។