កាលពីប៉ុន្មានសប្តាហ៌មុននេះ ក្រុមហ៊ុន Huawei បានប្រកាសពន្យានូវការង្ហាញចេញជាផ្លូវការនូវស្មាតហ្វូនជំនាន់ថ្មីរបស់ខ្លួន Huawei P70 Series បន្ទាប់ពីការជូនដំណឹងថា ស្មាតហ្វូននេះ នឹងសម្ពោធជាផ្លូវការកាលពីខែមីនា។ នៅថ្ងៃនេះ ក្រុមហ៊ុនបច្ចេកវិទ្យាយក្សចិនមួយនេះ បានចេញមកបញ្ជាក់សារជាថ្មីហើយថា ស្មាតហ្វូនថ្នាក់ប្រណិតម៉ូដែល P-Series នេះ នឹងមានការផ្លាស់ប្តូរឈ្មោះទៅជា “Pura” វិញម្តងហើយ។ ដូច្នេះ សម្រាប់ការបង្ហាញវត្តមានស្មាតហ្វូននេះ នឹងមានឈ្មោះថា Huawei Pura 70 series។
យោងតាមរបាយកាណ៌ដែលបញ្ជាក់ចេញពីហាងផ្លូវការរបស់ក្រុមហ៊ុន Huawei ដែលមានមូលដ្ឋាននៅទីក្រុងប៉េកាំង បានបញ្ជាក់ថា ស្មាតហ្វូន Pura 70 series នឹងបង្ហាញខ្លួនជាផ្លូវការនៅចុងខែមេសានេះហើយ។ បើតាមការសាកសួរទៅកាន់បុគ្គលិកនៅក្នុងហាងលក់ស្មាតហ្វូន Huawei-authorized experience store នៅប៉េកាំងនេះ បាននិយាយថា ស្មាតហ្វូនជំនាន់ថ្មី Huawei Pura 70 series អាចនឹងមានប្រកាសចេញជាផ្លូវការនៅថ្ងៃទី 18 ខែមេសាខាងមុខនេះហើយ។
.
របាយការណ៌ខាងលើនេះបន្តថា ស្មាតហ្វូននេះ គឺមានការដាក់អោយបញ្ជាទិញ Blind ordering events ហើយនៅលើទីផ្សារប្រទេសចិន ដោយនៅក្នុងនោះ អ្នកដែលចង់បានស្មាតហ្វូននេះ គ្រាន់តែធ្វើការចុះឈ្មោះ និងលេខទូរស័ព្ទទៅកាន់ហាងតែប៉ុណ្ណោះ។ នៅពេលដែលស្មាតហ្វូននេះ បង្ហាញវត្តមាននោះ ក្រុមការងាររបស់ក្រុមហ៊ុននឹងខលជូនដំណឹងភ្លាម ប៉ុន្តែមិនមានការបញ្ជាក់ថា ទទួលបានទាំងអស់គ្នានោះទេ។
គួរបញ្ជាក់ថា កាលពីពេលមុននេះ មានការពាក្យចចាមអារ៉ាមនិយាយថា ស្មាតហ្វូនជំនាន់ថ្មី Huawei P-Series នេះ នឹងមានចំនួន 4 ម៉ូដែល រួមមានដូចជា Pura 70, Pura 70 Pro, Pura 70 Pro+ និង Pura 70 Ultra។ កន្លងមកអ្នកទម្លាយ Digital Chat Station ក៏ធ្លាប់បានចែកចាយនូវព័ត៌មាន ពណ៌ រ៉េម និងអង្គចងចាំរបស់ស្មាតហ្វូណ Pura 70 series រួចហើយផងដែរ។ ជាមួយគ្នានេះ ក៏មានការទម្លាយនូវវីដេអូខ្លី ដែលបង្ហាញពីម៉ូឌុលកាមេរ៉ារបស់ស្មាតហ្វូនជំនាន់ថ្មីនេះទៀតផង។
