Snapdragon 8 Gen 4 នឹងក្លាយជាបន្ទះឈីបដ៏ខ្លាំងក្លា និងឆ្លាតវៃបំផុតរបស់ក្រុមហ៊ុន Qualcomm សម្រាប់ស្មាតហ្វូននាពេលខាងមុខនេះ។ បន្ទះឈីបនេះ នឹងមានសមត្ថភាពកាន់តែខ្លាំងក្លា បើធៀបជាមួយនឹងបន្ទះឈីបជំនាន់មុន Snapdragon 8 Gen 3 ទាក់ទងទៅលើកម្លាំងម៉ាស៊ីន និងមុខងារ AI។ ក្រុមហ៊ុនផលិតបន្ទះឈីប ដែលមានមូលដ្ឋាននៅក្នុងសហរដ្ឋអាមេរិកនេះ ក៏បានបញ្ជាក់ថា បន្ទះឈីប Snapdragon 8 Gen 4 របស់ខ្លួន នឹងបង្ហាញខ្លួននៅក្នុងខែតុលានេះនៅក្នុងព្រឹត្តិការណ៍ Snapdragon Summit ។ យ៉ាងណាមិញ យើងបានដឹងនូវព័ត៌មានជាច្រើនអំពីស្មាតហ្វូននេះផងដែរ។
ខណៈពេលដែលព័ត៌មានជាច្រើននៃបន្ទះឈីប Snapdragon 8 Gen 4 ស្ថិតនៅក្នុងអាថ៌កំបាំងនោះ ការបែកធ្លាយជាច្រើនថ្មីៗនេះ នៅលើ X ក៏មានការបង្ហាញនូវព័ត៌មានរបស់បន្ទះឈីបថ្មីនេះផងដែរ។ ការទម្លាយខាងលើនេះ គឺចេញពី Don McGuire ដែលជា CMO របស់ក្រុមហ៊ុន Qualcomm ដោយបាននិយាយថា បន្ទះឈីបថ្មីនេះ នឹងមានបំពាក់នូវ Oryon CPU Cores។ សម្រាប់ CPU cores នេះ គឺប្រើប្រាស់នៅលើបន្ទះឈីប Snapdragon X Elite សម្រាប់កុំព្យូទ័រ។ នេះគឺជាបន្ទះឈីបដ៏ខ្លាំងក្លាសម្រាប់ប្រើប្រាស់នៅលើកុំព្យូទ័រ ហើយវវាក៏មានការបង្កើនទៅលើសមត្ថភាព មុខងារ AI និងប្រសិទ្ធិភាពនៃថាមពលកាន់តែប្រសើរថែមទៀត។
ជាមួយគ្នានេះមានពាក្យចចាមអារ៉ាមជាច្រើន បានទម្លាយថា បន្ទះឈីប Snapdragon 8 Gen 4 នេះ នឹងមានអង្គគណនា 6 Oryon Cores។ សម្រាប់ Prime Cores របស់វា គឺមានល្បឿន 4GHz (vs 3.30 GHz )។ បន្ទះឈីបថ្មី Snapdragon ថ្មីនេះអាចនឹងប្រើប្រាស់នូវដំណើរការ 3nm របស់ក្រុមហ៊ុន TSMC។ ស្មាតហ្វូនដែលអាចនឹងប្រើប្រាស់នូវបន្ទះឈីប Snapdragon 8 Gen 4 ថ្មីនេះ អាចនឹងមានដូចជា Xiaomi 15 & 15 Pro, OnePlus 13, iQOO 13 & 13 Pro, Galaxy S25 Pro & S25 Ultra និង Redmi K80 Pro ផងដែរ៕