នៅថ្ងៃនេះ ក្រុមហ៊ុនស្រាវជ្រាវទីផ្សារ International Data Corporation (IDC) បានទម្លាយនូវព័ត៌មានថ្មីស្តីពីចំណែកទីផ្សារស្មាតហ្វូនសម្រាប់ត្រីមាសទី 1 ឆ្នាំ 2024 នេះ។ យិោងតាមការបញ្ជាក់នៅក្នុងរបាយការណ៍ខាងលើនេះ ក្រុមហ៊ុន Honor និង Huawei បានកាន់កាប់ទៅលើតំណែងកំពូលនៅលើទីផ្សារនៅក្នុងប្រទេសចិន។
របាយការណ៌ខាងលើនេះបញ្ជាក់ថា ការលក់ស្មាតហ្វូននៅលើទីផ្សារក្នុងប្រទេសចិន គឺទទួលបានចំនួន 69.26 លានគ្រឿង នៅក្នុងត្រីមាសទី 1 ឆ្នាំនេះ ដែលមានកំនើនចំនួន 6.5% បើធៀបទៅនឹងឆ្នាំមុននេះ នៅក្នុងការលក់ស្មាតហ្វូនរយៈពេលដូចគ្នានេះ។ ក្រុមហ៊ុន Honor គឹមានចំនែកទីផ្សារចំនួន 17.1% ដែលមានការកើនឡើងចំនួន 13.2% បើធៀបទៅនឹងឆ្នាំមុននេះ។ ក្រុមហ៊ុននេះ មានស្មាតហ្វូនអេក្រង់បត់បានជាច្រើន រួមជាមួយនិងស្មាតហ្វូន Honor Magic 6 ដែលជាម៉ូដែលថ្មីមួយ ដែលអាចប្រកួតប្រជែងជាមួយនឹងក្រុមហ៊ុនធំៗបាននៅលើទីផ្សារនេះបានផង។
អ្វីដែលគួរអោយកត់សម្គាល់នោះ ក្រុមហ៊ុន Huawei បានដណ្តើមនូវទីផ្សាររបស់ខ្លួន បានលឿនលឿនបន្ទាប់ពីការបង្ហាញវត្តមានរបស់ស្មាតហ្វូន Huawei Mate 60 series កាលពីខែសីហាឆ្នាំមុននេះ។ នៅក្នុងត្រីមាសទី 1 ឆ្នាំ 2024 នេះ ក្រុមហ៊ុន Huawei គឺស្ទើរតែមានការប្រកួតជាមួយនឹងក្រុមហ៊ុន Honor ដែលមានចំនែកទីផ្សារចំនួន 17% ដែលកៀកទៅនឹងចំនែកទីផ្សារចំនួន 17.1% របស់ក្រុមហ៊ុននេះ។ ក្រុមហ៊ុននេះ មានកំនើនទីផ្សារចំនួន 110% បើធៀបទៅនឹងឆ្នាំមុននេះ។ ស្មាតហ្វូន Nova 12 series នេះ គឺមានការនាំចេញដល់ទៅ 1 ភាគ 3 នៃត្រីមាសនេះ។
ប្រភពខាងលើនេះបន្តថា ពេលនេះ បញ្ហានៃខ្សែសង្វាក់ផ្គត់ផ្គង់នៅតែកើតមាន ហើយក៏មានការកំណត់ទៅលើទំហំនៃសមត្ថភាពរបស់ក្រុមហ៊ុន Huawei នៅក្នុងការបំពេញនូវតម្រូវការទៅលើទីផ្សារផង។ ថ្មីៗនេះ យើងបានឃើញនូវវត្តមានរបស់ស្មាតហ្វូន Pura 70 Series ដែលទើបតែ បង្ហាញវត្តមានក្នុងពេលឆាប់ៗនេះ។ ស្មាតហ្វូន Series នេះ អាចនឹងផ្តល់នូវតួរលេខដ៏ខ្លាំងក្លាដល់ចុងត្រីមាសទី 2 ឆ្នាំ 2024 នេះផងដែរ។ សម្រាប់ក្រុមហ៊ុនចំណាត់ថ្នាក់ទី 3 គឺ OPPO និង Apple ដែលមានចំណែកទីផ្សារចំនួន 15.7% និង 15.6% នៅក្នុងត្រីមាសទី 1 នេះ។ ក្រុមហ៊ុន vivo ជាប់ចំណាត់ថ្នាក់លេខរៀងទី 5 ជាមួយនឹងចំណែកទីផ្សារចំនួន 14.6% ដែលមានកំណើន 4.8% ធៀបទៅនឹងឆ្នាំមុននេះ៕