Samsung Galaxy S24 FE បានបង្ហាញខ្លួននៅលើបញ្ជីរបស់ក្រុមហ៊ុនចែកចាយមួយនៅចក្រភពអង់គ្លេស

ក្រុមហ៊ុន Samsung ត្រូវបានគេរំពឹងថា នឹងប្រកាសចេញនូវស្មាតហ្វូនម៉ូដែលពិសេស Galaxy S24 FE ដែលជាសមាជិកចុងក្រោយ និងតម្លៃសមរម្យរបស់ស្មាតហ្វូន Galaxy S24 Series នៅក្នុងពេលឆាប់ៗនេះហើយ។ មកដល់ពេលនេះ បើទោះបីជាក្រុមហ៊ុន Samsung មិនទាន់បានបញ្ជាក់ជាផ្លូវការអំពីស្មាតហ្វូននេះនៅឡើយក៏ដោយ ស្មាតហ្វូននេះ ត្រូវបានគេប្រទះឃើញថា បានបង្ហាញវត្តមាននៅលើបញ្ជី Database របស់ក្រុមហ៊ុនចែកចាយមួយនៅក្នុងចក្រភពអង់គ្លេសហើយ។

នៅលើបញ្ជី Database បានបង្ហាញថា ស្មាតហ្វូនម៉ូដែលពិសេសេលេខកូដ SM-721U ។ 

គួរបញ្ជាក់ថា កាលពីពេលថ្មីៗនេះ ស្មាតហ្វូនម៉ូដែលពិសេសនេះ ក៏ត្រូវបានគេមើលឃើញថា បានបង្ហាញវត្តមាននៅលើ  សាររព័ត៌មាន Android Headlines ជាមួយនឹងលេខម៉ូដែលជាច្រើនផងដែរ ក្នុងនោះមានដូចជា SM-S721B, SM-S721W, SM-S721N និង SM-721U។ សម្រាប់លេខកូដ SM-S721B នេះ គឺជាប្រភេទម៉ូដេលសម្រាប់ដាក់លក់នៅលើទីផ្សារសកល ខណៈពេលដែលលេខកូដ  SM-S721W, SM-S721N និង SM-721U គឺជាម៉ូដែលសម្រាប់ដាក់នៅក្នុងទីផ្សារអាមេរិក កូរ៉េ និងកាណាដា។ 

សូមជំរាបថា មកដល់ពេលនេះ នៅមិនទាន់មានព័ត៌មានលម្អិតជាច្រើនទៀតអំពីស្មាតហ្វូន Galaxy S24 FE ត្រូវបានចែករំលែកតាមរយៈប្រភពនេះទេ។ ប៉ុន្តែការបែកធ្លាយមុននេះ បានបញ្ជាក់ថា ស្មាតហ្វូននេះមានអេក្រង់ 6.1-អ៊ីង AMOLED display, រ៉េមទំហំ 12GB និងម៉េមូរីទំហំ 128GB ទៅ 256GB ។

ជាមួយគ្នានេះ ក៏មានពាក្យចចាមអារ៉ាមជាច្រើន បានបញ្ជាក់ថា ស្មាតហ្វូននេះមានថាមពលថ្មទំហំ 4,500mAh ។ លក្ខណៈ សម្បត្តិរបស់ស្មាតហ្វូន S24 FE នេះ នៅមិនទាន់ដឹងនៅឡើយទេ ប៉ុន្តែលក្ខណៈសម្បត្តិជាច្រើនរបស់ស្មាតហ្វូននេះ នឹងមានភាពស្រដៀងគ្នាច្រើនទៅនឹងស្មាតហ្វូន Galaxy S24 ផងដែរ៕