Xiaomi 16 ដែលជាស្មាតហ្វូន Flagship ជំនាន់ថ្មីរបស់ក្រុមហ៊ុនបច្ចេកវិទ្យា Xiaomi ត្រូវបានគេរាយការណ៌ នឹងក្លាយជាស្មាតហ្វូនដែលអានុភាពខ្លាំងប្រៀបធៀបជាមួយម៉ូដែលមុន។ តាមការបែកធ្លាយចុងក្រោយបំផុតដែលមានប្រភពចេញពីប្រទេសចិននាពេលថ្មីៗនេះ បានបញ្ជាក់ថា ស្មាតហ្វូនជំនាន់ថ្មីនេះ នឹងមានថាមពលថ្មធំជាងស្មាតហ្វូនជំនាន់មុនថែមទៀតផង។ ស្មាតហ្វូនជំនាន់ថ្មី Xiaomi 16 អាចនឹងក្លាយជាស្មាតហ្វូនដ៏ខ្លាំងក្លានៅក្នុងចំណោមស្មាតហ្វូន Flagship ដែលមានរូបរាងតូចជាច្រើនទៀត។
យោងតាមពាក្យចចាមអារ៉ាមថ្មីចេញពីប្រទេសចិន បានបញ្ជាក់ថា ស្មាតហ្វូនស៊េរីថ្មី Xiaomi 16 នេះ នឹងមានថាមពលថ្មទំហំ 7,000 mAh ដែលទំហំនេះមានការកើនឡើងខ្ពស់ជាងដែលប្រើប្រាស់នៅលើស្មាតហ្វូន Xiaomi 15 មានត្រឹមតែ 5,240mAh ប៉ុណ្ណោះ។ តាមការបែកធ្លាយថ្មីចេញពីអ្នកទម្លាយ ‘Wisdom Pikachu’ នៅលើ Weibo ក៏បានបង្ហើបអំពីទំហំថាមពលថ្មរបស់ស្មាតហ្វូននេះដែលស្រដៀងគ្នាផងដែរ។ ស្មាតហ្វូនជំនាន់ថ្មីនេះ អាចនឹងមានទំហំចាប់ពី 6.3-អ៊ីង ទៅ 6.39-អ៊ីង កញ្ចក់រាបស្មើរ Flat OLED display។ ទំហំអេក្រង់នេះ ពិតជាតូចងាយស្រួលដាក់នៅក្នុងហោប៉ៅ។
ក្រៅពីថាមពលថ្មធំ ស្មាតហ្វូនជំនាន់ថ្មី Xiaomi 16 នេះ នឹងមានបន្ទះឈីបជំនាន់ថ្មី Snapdragon 8 Elite 2 ជំនាន់ថ្មីរបស់ក្រុមហ៊ុន Qualcomm។ បន្ទះឈីបជំនាន់ថ្មីរបស់ក្រុមហ៊ុន Qualcomm នេះ អាចបង្កើនទៅលើកម្លាំងម៉ាស៊ីនកាន់តែខ្លាំងក្លា និងប្រសិទ្ធិភាពខ្ពស់ទៅលើមុខងារ AI ជាច្រើនទៀតសម្រាប់ការងារ Multitasking។ ស្មាតហ្វូនថ្មីនេះ នឹងមានកាមេរ៉ាគោលទំហំ 50MP ហ៊្សូម 3x និងមានគាំទ្រដោយសិនស័រទំហំ 1/1.3-អ៊ីង។ ស្មាតហ្វូនថ្មីនេះ ត្រូវបានក្រុមហ៊ុនដាក់ដំណើរការនូវ HyperOS 3.0 នៅលើ Android 16 ថែមទៀតផង។
នៅក្នុងការបង្ហាញខ្លួននៅក្នុងប្រទេសចិននៅចុងខែកញ្ញាខាងមុខនេះ ស្មាតហ្វូនជំនាន់ថ្មី Xiaomi 16 នេះ អាចនឹងក្លាយជាស្មាតហ្វូន Flagship ដែលមានរូបរាងតូច។ ស្មាតហ្វូនថ្មីនេះ ត្រូវបានគេជឿជាក់ថា អាចនឹងប្រជែងបានជាមួយនឹងស្មាតហ្វូន Galaxy S26 Ultra ឬ iPhone 17 Pro បានផងដែរ ប្រសិនបើការទម្លាយខាងលើនេះ គឺជាការពិតនោះ៕
