ថ្មីៗនេះមានសេចក្តីរាយការណ៌ថា ស្មាតហ្វូនបត់បាន 3 តង់របស់ក្រុមហ៊ុន Samsung អាចនឹងបង្ហាញខ្លួននៅក្នុងប្រទេសចិនននាពេលឆាប់ៗនេះហើយ។ តាមដំណឹងចុងក្រោយនាពេលនេះ បានបញ្ជាក់ថា ស្មាតហ្វូនបត់បានស៊េរីថ្មីនេះ ក៏បង្ហាញខ្លួននៅលើវិញ្ញាបនបត្រមួយចំនួនរួចហើយផងដែរ ដោយក្នុងនោះក៏មានការបង្ហើបអំពីបច្ចេកវិទ្យាសាកថ្ម ដែលនឹងធ្វើអោយអ្នកប្រើប្រាស់ជាច្រើនមានការខកចិត្តផងដែរ។ ស្មាតហ្វូនថ្មីនេះ ត្រូវបានគេព្យាករណ៍ថា នឹងមានការឌីស្សាញរូបរាងប្រកបដោយភាពច្នៃប្រឌិតថ្មីបំផុត។
បើតាមការបែកធ្លាយនៅលើវិញ្ញាបនបត្រ 3C របស់ប្រទេសចិន នាពេលថ្មីៗនេះ បានបង្ហាញថា ស្មាតហ្វូនបត់បាន 3 តង់របស់ក្រុមហ៊ុនបច្ចេកវិទ្យាយក្ស Samsung នេះ គឺមានភ្ជាប់មកជាមួយនឹងលេខកូដ SM-F9680 ហើយស្មាតហ្វូននេះ ត្រូវគេដឹងថាគឺជាម៉ូដែល 5G ទៀតផង។ ប្រភពខាងលើនេះ បន្តថា ក្រុមហ៊ុន Samsung នឹងប្រើប្រាស់នូវឆ្នាំងសាក EP-TA800 charging adapter ដែលបច្ចេកវិទ្យាសាកនេះ គឺមានកម្លាំងត្រឹមតែ 25W wired fast charging ប៉ុណ្ណោះ។
បច្ចេកវិទ្យាសាកនេះ គឺដូចគ្នាទៅនឹងការប្រើប្រាស់នៅលើស្មាតហ្វូន Galaxy S25 Edge អញ្ចឹងដែរ។ នៅក្នុងវិញ្ញាបនបត្រ 3C ដដែលនេះ បានបង្ហើបទៀតថា ស្មាតហ្វូនបត់បាន 3 តង់នេះ នឹងបង្ហាញខ្លួននៅក្នុងទីផ្សាររបស់ប្រទេសចិនផងដែរ។ ស្មាតហ្វូន Huawei Mate XT Ultimate គឺជាស្មាតហ្វូនបត់បាន 3 តង់ ដែលបង្ហាញខ្លួននៅលើទីផ្សារមុនគេ ខណៈពេលដែលក្រុមហ៊ុន Samsung អាចនឹងបញ្ចេញនូវស្មាតហ្វូនបត់បាន ៣ តង់របស់ខ្លួនតាមក្រោយ។ សម្រាប់ពេលនេះ ក្រុមហ៊ុននេះក៏ត្រៀមបញ្ចេញស្មាតហ្វូននេះទៅកាន់ទីផ្សារសកលនៅក្នុងពេលឆាប់ៗនេះផងដែរ។
គួរបញ្ជាក់ថា មុននេះមានព័ត៌មានជាច្រើនធ្លាប់បានបង្ហើបអំពីស្មាតហ្វូន Galaxy Z Flip 7 Ultra ប៉ុន្តែមកដល់ពេលនេះ មិនមានការទម្លាយថ្មីៗពីស្មាតហ្វូននេះនោះទេ។ សម្រាប់ព្រឹត្តិការណ៌ខាងមុខនេះ ក្រុមហ៊ុន Samsung អាចនឹងមានការប្រកាចេញនូវស្មាតហ្វូន Flagship Galaxy Z Fold 7 និង Galaxy Z Flip 7 ហើយក៏អាចនឹងភ្ជាប់មកជាមួយនឹងស្មាតហ្វូន Galaxy Z Flip 7 FE ដែលជាម៉ូដែលថ្មី មានតម្លៃសមរម្យផងដែរ៕
