នៅទីបំផុត ក្រុមហ៊ុន vivo បានចាប់ផ្តើមយុទ្ធនាការសម្រាប់ផ្សព្វផ្សាយទៅលើស្មាតហ្វូនអេក្រង់បត់បាន vivo X Fold 5 នៅក្នុងប្រទេសចិនហើយ។ ស្មាតហ្វូនថ្មីនេះ ត្រូវបានគេមើលឃើញថា ក្រុមហ៊ុនឌីស្សាញកាន់តែស្តើងជាងមុន ដោយមានកម្រាស់ស្តើងជាងស្មាតហ្វូន iPhone 16 Pro ទៀតផង នៅពេលដែលបើក។ តាមរយៈនៃការលេចចេញនៅថ្ងៃនេះដែរ ក្រុមហ៊ុន vivo បានបញ្ជាក់នូវព័ត៌មានលម្អិតជាច្រើនទាក់ទងទៅនឹងស្មាតហ្វូននេះ។ ស្មាតហ្វូន vivo X Fold 5 នេះ នឹងក្លាយជាស្មាតហ្វូនបត់បានមុនគេនៅក្នុងឧស្សាហកម្មនេះ ដែលមានសមត្ថភាពការពារទៅលើ 3 ចំណុចនោះគឺទឹក ធូលី និងការធ្លាក់។
នៅលើស្មាតហ្វូនអេក្រង់បត់បាននេះ នឹងមានការប្រើប្រាស់នូវ IP5X ដែលជាកម្រិតខ្ពស់បំផុតនៃការការពារទៅលើធូលីនៅក្នុងឧស្សាហកម្មនេះ ហើយបើមើលទៅលើប្រព័ន្ធកាពារទឹកវិញ ស្មាតហ្វូនថ្មីនេះ មានការប្រើប្រាស់នូវ IPX8 ដែលអាចទប់ទល់ទៅនឹងទឹកជម្រៅដល់ទៅ 3 ម៉ែត្រផងដែរ ដែលខ្លាំងជាងស្មាតហ្វូន Samsung Z Fold 6 ដែលអាចទប់ទល់នឹងទឹកត្រឹមតែ 1.5 ម៉ែត្រប៉ុណ្នោះ។ បន្ថែមពីនេះ ស្មាតហ្វូនអេក្រង់បត់បាននេះ ក៏នឹងមានប្រើប្រាស់នូវ IPX9 សម្រាប់ធន់ទៅនឹងសម្ពាធទឹកខ្ពស់ និង IPX9+ ដែលធន់ទៅនឹងការបត់ក្រោមទឹកថែមទៀតផង។ ក្រុមហ៊ុន vivo បានអះអាងថា ស្មាតហ្វូនអេក្រង់បត់បាននេះអាចបើក និងបត់បានដល់ទៅ 1000 ដងនៅក្រោមជម្រៅទឹក 1 ម៉ែត្រ។
សូមជំរាបថា កន្លងមកមានមានការទម្លាយនូវលក្ខណៈសម្បត្តិរបស់ស្មាតហ្វូនថ្មីនេះផងដែរ ដោយក្នុងនោះមានការបញ្ជាក់ថា ស្មាតហ្វូនថ្មីនេះ នឹងមានអេក្រង់ខាងក្រៅទំហំ 6.53-អ៊ីងLTPO outer display និងអេក្រង់ខាងក្នុងទំហំ 8.03-អ៊ីង កម្រិត 2K+ AMOLED ដែលមានល្បឿនកម្រិត 120Hz refresh rates។ ស្មាតហ្វូនបត់បាននេះមានបន្ទះឈីប Qualcomm Snapdragon 8 Gen 3, រ៉េមទំហំ 16GB និងម៉េមូរីទំហំ 512GB ។
ស្មាតហ្វូនអេក្រង់បត់បាននេះ មានថាមពលថ្មទំហំ 6,000mAh ជាមួយនឹងបច្ចេកវិទ្យាសាកថ្មលឿន 90W wired និង 30W wireless charging។ ស្មាតហ្វូននេះមានកាមេរ៉ាខាងមុខទំហំ 32-Megapixel selfie ផងដែរ។ ផ្នែកខាងក្រោយរបស់ស្មាតហ្វូននេះ មានកាមេរ៉ាប្រភេទ Zeiss Triple Lens ដែលកាមេរ៉ាគោលមានទំហំ 50MP Sony IMX921, 50MP ultra-wide និង 50MP periscope lens ជាមួយនឹងកម្រិត 3x optical zoom ៕
