នៅពេលដែលយើងគិតអំពីរថយន្តមួយនោះ រូបភាពពិតដែលតែងតែស្ថិតនៅក្នុងខួរក្បាលរបស់យើងនោះ គឺភ្ជាប់ជាមួយនឹងកង់ 4 គ្រាប់ទៅនឹងតួខ្លួនរបស់វា។ ទោះបីជាយ៉ាងណាក៏ដោយ ក្រុមហ៊ុនផលិតរថយន្ត Hyundai Motor របស់ប្រទេសកូរ៉េខាងត្បូង បានបញ្ចេញនូវគំនិតដ៏អស្ចារ្យមួយទៀត គឺរថយន្តដែលអាចដើរបានឈ្មោះថា Elevate នៅខាងក្រៅព្រឹត្តិការណ៍ពិពរណ៍គ្រឿងអេឡិចត្រូនិច Consumer Electronics Show 2019 នៅក្នុងទីក្រុង Las Vegas នៅថ្ងៃទី 7 ខែមករានេះ។ Elevate គឺជារថយន្តដំបូងបំផុតរបស់ក្រុមហ៊ុនផលិត Hyundai ដែលមានកង់អាចធ្វើចលនាបានចំនួន 4 គ្រាប់ ដែលវាមានរូបរាងដូចជាសត្វល្អិតមួយអញ្ចឹង។ រថយន្តនេះ គឺមានការច្របាច់បញ្ចូលនូវបច្ចេកវិទ្យាដែលប្រើប្រាស់នៅលើរថយន្តអេឡិចត្រូនិច និងមនុស្សយន្ត Robots ដែលអនុញ្ញាតឱ្យវាធ្វើដំណើរឆ្លងកាត់នូវស្ថានភាពដែលពិបាក ការឡើងជណ្តើរ និងផ្លូវដែលរថយន្តធម្មតាមិនអាចធ្វើដំណើរបាន។
នៅក្នុងការដាក់ឈ្មោះដោយក្រុមហ៊ុន Hyundai ថា ជារថយន្ត “Ultimate Mobility Vehicle” នោះ Elevate ដំណើរការនូវ Platform អេឡិចត្រូនិច និងមានសមត្ថភាពក្នុងការផ្លាស់ប្តូរខ្លួនឯងទៅតាមស្ថានភាពជាក់ស្តែងផងដែរ។ សម្រាប់ជើងទាំង 4 របស់រថយន្តនេះ គឺមានគន្លាក់ចំនួន 5 ដែលផ្តល់នូវ Mode សម្រាប់ការធ្វើចលនាផ្សេងៗគ្នា ហើយវាអាចដើរបានស្រដៀងគ្នាទៅនឹងសត្វល្មូនដែរ។ មានន័យថា រថយន្តនេះ អាចធ្វើការផ្លាស់ទីនៅក្នុងទិសណាក៏បាន ហើយវារក្សានូវចលនាចល័តបានកាន់តែងាយស្រួល នេះបើតាមការបញ្ជាក់របស់ Hyundai ។ ដោយសារតែយន្តការមួយនេះ Elevate អាចឡើងជញ្ជាំងកម្ពស់បានដល់ទៅ 1.5m ឈានជំហានដល់ទៅ 1.5m និងការដើរនៅលើដៃដែលមានទទឹង 4.5m ខណៈពេលដែលតួខ្លួនរបស់វាគឺនៅតែរក្សាដដែល។
តាមការបញ្ជាក់របស់លោក John Suh ដែលជាអនុប្រធាន និងប្រធានផ្នែក Center for Robot-Augmented Design in Living Experiences របស់ក្រុមហ៊ុន Hyundai បាននិយាយថា “ប្រតិបត្តិការនៃការជួយសង្គ្រោះជាច្រើន នៅក្នុងស្ថានភាពដែលមានគ្រោះថ្នាក់នោះ និងការកើនឡើងនៃការចល័តសម្រាប់មនុស្សដែលមិនអាចផ្លាស់ទីបាន។” លោក Suh និយាយថា “នៅពេលដែលមានរលកយក្សស៊ូណាមិ ឬគ្រោះរញ្ជួយដី អ្នកបើកបរថយន្តជួយសង្គ្រោះជាច្រើនអាចដឹកជនរងគ្រោះនៅជ្រុងនៃកន្លែងដែលមានកំទេចកំទីប៉ុណ្ណោះ។ ពួកគេត្រូវបន្តដំណើរដោយថ្មើរជើង។ Elevate អាចបើកទៅកាន់កន្លែងនោះបាន និងអាចឡើងទៅលើកន្លែងដែលមានកំទេចកំទីដោយសារតែទឹកជំនន់នេះ ឬបេតុងដែលបាក់រលំផងដែរ។”“បច្ចេកវិទ្យានេះដំណើរការបានយ៉ាងល្អនៅក្នុងស្ថានភាពសង្គ្រោះបន្ទាន់។ មនុស្សដែលពិការអាចធ្វើដំណើរជាមួយនឹងរថយន្ត Hyundai Elevate ស្វ័យប្រវត្តិដែលអាចអាចជួយពួកគេដើរដល់ទ្វារមុខផ្ទះតែម្តង ហើយអនុញ្ញាតឱ្យពួកគេប្រើប្រាស់កៅអីរុញបានផងដែរ។”
ក្រុមហ៊ុន Hyundai បង្កើតនូវរថយន្ត Elevate នេះនៅក្នុងភាពជាដៃគូជាមួយនឹង Sundberg-Ferar ដែលជាស្ទូឌីយោសម្រាប់ធ្វើការឌីស្សាញ។ បន្ថែមពីការបង្ហាញនូវគំនិតរថយន្តដ៏អស្ចារ្យនេះ ក្រុមហ៊ុន Hyundai ក៏បញ្ចេញនូវផែនទីចក្ខុវិស័យរបស់ក្រុមហ៊ុនផលិតរថយន្តនេះនៅក្នុង 3 តំបន់ផ្សេងគ្នាគឹ ការបើកចំហរនៃភាពច្នៃប្រឌិត ការរៀបចំទៅលើរថយន្តអេឡិចត្រូនិច និងភាពជាអ្នកដឹកនាំពិភពលោកសម្រាប់រថយន្តដែលអាចភ្ជាប់ទំនាក់ទំនងជាមួយគ្នា។ គោលដៅរបស់ក្រុមហ៊ុន Hyundai គឺបានធ្វើការតភ្ជាប់នូវទំនាក់ទំនងសកម្មមនុស្ស 10 លាននាក់ នៅជុំវិញពិភពលោក និងការដាក់ដំណើរការនៃបច្ចេកវិទ្យាសម្រាប់ភ្ជាប់នៅលើរថយន្តនេះ ទៅកាន់រថយន្តជាច្រើនទៀត បានទៅក្នុងទីផ្សារពិភពលោកនៅដើមឆ្នាំ 2022 នេះ៕
