យោងតាមព័ត៌មានមួយ ដែលចេញផ្សាយដោយសារព័ត៌មាន theinvestors.com កាលពីថ្ងៃទី 15 ខែឧសភានេះ បានបញ្ជាក់ថា ក្រុមហ៊ុន Hyundai Motor នឹងផ្តល់នូវរថយន្តស៊េរីថ្មី Veloster ទៅកាន់បុរសវ័យ 46 ឆ្នាំម្នាក់ ដែលហ៊ានប្រថុយជីវិតរបស់គាត់ នៅក្នុងការបញ្ឈប់នូវរថយន្ត Pickup មួយដែល បានបើកដោយអ្នកបើកបរមនុស្សម្នាក់ ក្នុងសភាពសន្លប់ស្តូកស្តឹងម្នាក់កាលពីដើមខែនេះ។សកម្មភាព នៃវីរភាពរបស់គាត់នេះ ត្រូវគេទទួលស្គាល់យ៉ាងខ្លាំង បន្ទាប់ពីមានការបែកធ្លាយវីដេអូឃ្លីបចេញពីប្រអប់ខ្មៅទៅលើអ៊ីនធើណិត ដែលមានការចែកចាយតៗគ្នាច្រើននោះ។
បុរសក្លាហានម្នាក់នេះ គឺមានឈ្មោះថា Han ដោយគាត់បញ្ចេញសំឡេងស៊ឺប្លេរ ដើម្បីដាស់អោយអ្នកបើកបររថយន្ត Pick Up នោះ បានភ្ញាក់ ប៉ុន្តែអ្នកបើកបរមិនព្រមងើបនោះទេ ដោយសារតែគាត់លង់លក់ជាមួយនឹងការអត់ងងុយ។ បន្ទាប់មក លោក Han ក៏បានសម្រេចចិត្ត ឈប់កាក់នៅមុខរថយន្តនោះ ដើម្បីបញ្ឈប់រថយន្តនោះបានឈប់ដោយសារភាពក្លាហានរបស់គាត់ តែក្នុងករណីខាងលើនេះ គឺគ្មានអ្នកណារងគ្រោះនោះទេ។ លោក Han បានបើកបរនូវរថយន្ត Hyundai Tuscani sedan ដែលមានអាយុជាង 17 ឆ្នាំមកហើយ។ បន្ទាប់ពីហេតុការណ៍នេះ លោក Han ត្រូវបានគេហៅឈ្មោះថា “Tuscani Hero” ។
ដោយសារតែទង្វើរមួយនេះ ទើបក្រុមហ៊ុន Hyundai បានសម្រេចធ្វើការទាក់ទងទៅលោក Han ដើម្បីទូទាត់ថ្លៃសងការខូចខាតសម្រាប់ភាពអង់អាចក្លាហានជូនដល់គាត់ ដើម្បីបង្ហាញពីការចូលរួមលើកទឹកចិត្តនៃវីរៈភាពរបស់ Han ជាមួយនិងការផ្តល់ជូននូវរថយន្តស៊េរីថ្មី Veloster sedan ថ្មី ដែលមានតម្លៃប្រហែលជា US$18,500 ជូនដល់លោក Han។ អ្នកឃ្លាំមើលឧស្សាហកម្មនេះ បាននិយាយថា ការផ្តល់ជូននូវរថយន្ត Veloster ស៊េរីថ្មីនេះ ទៅកាន់ម្ចាស់រថយន្ត Tuscani គឺមានអត្ថន័យជានិមិត្តរូប។
គួរបញ្ជាក់ថា រថយន្ត Tuscani បានបង្ហាញខ្លួននៅក្នុងឆ្នាំ 2001 ហើយវាគឺជារថយន្ត Sedan ទីបីរបស់ក្រុមហ៊ុន Hyundai បន្ទាប់ពីរថយន្ត Scoupe នៅក្នុងឆ្នាំ 1990 និង Tiburon នៅក្នុងឆ្នាំ 1996 នោះ។ បើទោះបីជាការជម្រុញទៅលើរថយន្តប្រណាំងរបស់ក្រុមហ៊ុននេះ នៅមិនទាន់ជោគជ័យ ប៉ុន្តែរថយន្ត Veloster ដែលបានប្រកាសដាក់លក់នៅក្នុងឆ្នាំ 2011 នេះគឺពិតជាទទួលបានជោគជ័យនៅលើទីផ្សារខ្លាំងផងដែរ។ ទន្ទឹមគ្នានេះផងដែរ ក្រុមហ៊ុន LG Group ក៏បានសម្រេចចិត្តផ្តល់នូវរង្វាន់សម្រាប់លោក Han ដែលចូលរួមក្នុងយុទ្ធនាការជួយសង្គមដែលមានការផ្តល់ជូនទឹកប្រាក់ដល់ទៅ 500 លានវ៉ុនផងដែរ៕