កាលពីថ្ងៃទី 20 ខែកុម្ភៈ ឆ្នាំ 2021 នេះ លោក Yu Chengdong ដែលជានាយកប្រតិបត្តិរបស់ក្រុមហ៊ុន Huawei Consumer Business Group បានប្រកាសថា រថយន្តស៊េរីថ្មី Mercedes Benz S Class 2021 គឺនឹងមានភ្ជាប់ជាមួយនឹងសេវាកម្ម Huawei Mobile Services (HMS) សម្រាប់សេវាកម្មជាច្រើនដែលប្រើប្រាស់ជាមួយរថយន្តនេះ។ អ្នកប្រើប្រាស់ជាច្រើនអាចធ្វើការប្រើប្រាស់នូវកម្មវិធី Apps ជាច្រើននៅលើអេក្រង់នៅក្នុងប្រព័ន្ធរបស់រថយន្តនេះ ហើយក៏អាចរីករាយក្នុងមុខងារនៃការកម្សាន្តជាច្រើន ទៀតដូចជាការស្តាប់ព័ត៌មាន ការអានរឿង ការមើលវីដេអូ និងការលេងហ្គេមផងដែរ។
លោកបន្តថា សេវាកម្ម Huawei HMS នៅលើរថយន្តនេះ គឺជាដំណោះស្រាយចុងក្រោយបំផុតរបស់ក្រុមហ៊ុន Huawei ដែលផ្អែកនៅលើសេវាកម្មក្លោដសម្រាប់ប្រើប្រាស់នៅលើរថយន្តស្វ័យប្រវត្តិដែលផ្តល់នូវមុខងារជាច្រើន និង Smart Assistant ថែមទៀត។ កម្មវិធីជាច្រើនចុងក្រោយបំផុតរបស់រថយន្ត Mercedes Benz S Class នេះអនុញ្ញាតអោយអ្នកប្រើប្រាស់ជាច្រើនអាចប្រើប្រាស់នូវ App នៅលើប្រព័ន្ធរបស់រថយន្តនេះដោយមិនចាំបាច់តម្លើងវានោះទេ។
នៅក្នុងរូបភាពផ្សព្វផ្សាយនេះ គឺមានការបង្ហាញនូវ Icons នៃកម្មវិធីជាច្រើនដូចជា SF Express, Lychee, Bilibili និងជាច្រើនទៀត ដែលអាចប្រើប្រាស់បានយ៉ាងងាយស្រួល។ លោក Yu Chengdong បាននិយាយថា សម្រាប់ដំណោះស្រាយទៅលើសេវាកម្មក្លោដរថយន្តឆ្លាតវៃនេះគឺផ្តល់អោយអ្នកគ្រប់គ្នានូវគុណភាពនៃការធ្វើដំណើរដ៏អស្ចារ្យបំផុតជាមួយនឹងសេវាកម្ម Huawei Cloud ។
តាមការបញ្ជាក់នៅក្នុងព័ត៌មាននេះ សម្រាប់រថយន្ត Mercedes Benz S Class ឆ្នាំ 2021 នេះគឺមានរថយន្ត S400L, S450L និង S500L ។ សម្រាប់អេក្រង់ central control នេះគឺមានទំហំ 12.8-inch OLED ជាមួយនឹងកម្រិតភាពច្បាស់ 1888×1728 ។ រថយន្តនេះគឺមានមុខងារ Voice Assistant និងមុខងារ OTA remote upgrade ថែមទៀតផង៕
