Stelato ដែលជាម៉ាកយីហោរថយន្តប្រណិតដែលកកើតឡើងពីការសហាគ្នារវាងក្រុមហ៊ុនបច្ចេកវិទ្យា Huawei និងក្រុមហ៊ុនផលិតរថយន្ត BAIC BluePark ដែលជាក្រុមហ៊ុនបុត្រសម្ព័ន្ធរបស់ BAIC Auto បានធ្វើការដាក់តាំងបង្ហាញរថយន្តស៊េរីដំបូងរបស់ខ្លួនដែលជាប្រភេទរថយន្ត Sedan ម៉ូដែល Stelato S9 នៅក្នុងព្រឹត្តិការណ៍តាំងពិព័រណ៌រថយន្តប្រចាំឆ្នាំក្នុងទីក្រុងប៉េកាំងប្រទេសចិន 2024 Beijing Auto Show។ Stelato S9 គឺជាម៉ាកយីហោរថយន្តប្រណិតដែលផលិតឡើងដើម្បីធ្វើការប្រជែងទីផ្សារជាមួយរថយន្តប្រណិតល្បីៗដូចជា Mercedes-Benz S-Class និង BMW 7-Series។
រថយន្ត Sedan ដែលដំណើរការដោយថាមពលអគ្គិសនីសុទ្ធដំបូងរបស់ Stelato មួយនេះមានប្រវែងបណ្តោយ 5,160mm X ទទឹង 1,987mm X កម្ពស់ 1,486 និងមានគម្លាតកង់មុខទៅកង់ក្រោយ 3,050mm ព្រមទាំងមានទំនង់ចាប់ពី 2,216kg, 2,246kg ដល់ 2,366kg។ Stelato S9 មានជម្រើសប្រើម៉ូទ័រអគ្គិសនីមួយ Single-motor និងម៉ូទ័រអគ្គិសនីពីរ Dual-motor ដែលជាម៉ូទ័រផលិតដោយក្រុមហ៊ុន Huawei។ សម្រាប់ម៉ូដែល Single-motor មានថាមពល 227kW ខណៈម៉ូដែលប្រើម៉ូទ័រអគ្គិសនីពីរ Dual-motor អាចផលិតកំលាំងបាន 227kW សម្រាប់ម៉ូទ័រខាងក្រោយ និង 158kW សម្រាប់ម៉ូទ័រខាងមុខ។ សម្រាប់កញ្ចប់អាគុយដែលបំពាក់នៅលើរថយន្តប្រណិតនេះ គឺផ្គត់ផ្គង់ដោយក្រុមហ៊ុន CATL ប៉ុន្តែ ក្រុមហ៊ុនមិនបានបញ្ជាក់ពីទំហំថ្មនោះទេ។
សម្រាប់ទម្រង់នៃការឌីស្សាញរបស់ Stelato S9 គឺយកលំនាំតាមម៉ូដែល Luxeed S7 ដែលជាម៉ាករថយន្ត Sedan ដែលសហការផលិតដោយ Huawei និង Chery។ ដោយក្នុងនោះកញ្ចក់មើលក្រោយសងខាងត្រូវបានប្រើជាប្រភេទកញ្ចក់ Digital Mirror ហើយនិងមានដៃទ្វារលឹមចូលក្នុងហៅថា Hidden Door Handles ដែលធ្វើឲ្យរថយន្តមួយនេះមានភាពស្រឡះល្អសម្រាប់ផ្នែករូបរាងខាងក្រៅ។ ចំពោះយ៉ាន់កងវិញ Stelato S9 ប្រើប្រាស់យ៉ាន់ទំហំ 21-inch ដែលមានការរចនាជាមួយកាំកង់ញឹកស្អាតប្រហាក់ប្រហែលគ្នានឹងយ៉ាន់របស់រថយន្ត Mercedes-Benz S-Class និង BMW 7-Series ដែរ។ Stelato S9 គឺមានជម្រើសពណ៌ខាងក្រៅចំនួន 4 គឺខ្មៅ ស ក្រហម និងទឹកមាស។
សម្រាប់ចង្កៀងផ្នែកខាងមុខវិញ ត្រូវបានរចនាយកលំនាំស្រដៀងគ្នានឹង Luxeed S7 ដែរ ជាមួយការប្រើប្រាស់អំពូលប្រភេទ xPixel Headlight System, ប្រព័ន្ធចាប់សញ្ញា Lidar sensors, អេក្រង់កម្សាន្តធំ large central control screen ដែលដំណើរការដោយ HarmonyOS 4 ដែលជារបស់ Huawei, បន្ទះសាកថ្មទូរស័ព្ទឥតខ្សែចំនួនពីរ dual 50W wireless charging pad, និងកៅអីស្បែកពិសេសយ៉ាងប្រណិត luxurious leatherជាដើម។ រថយន្តអគ្គិសនី Sedan ដ៏ទំនើបប្រណិតរបស់ Huawei និង BAIC BluePark នេះ ត្រូវបានគេរំពឹងថា អាចនឹងមានលក់នៅក្នុងខែកក្តដា ឬខែសីហា ឆ្នាំ 2024 នេះ។
Stelato S9 អាចមានតម្លៃចាប់ពីខ្ទង់ $41,400 ទៅ $69,000 ដែលជាតម្លៃប្រកូតប្រជែងខ្ពស់ជាមួយនឹងម៉ូដែល Mercedes-Benz S-Class និង BMW 7-Series។ តម្លៃរបស់ Stelato S9 ក៏ជាតម្លៃប្រកូតប្រជែងខ្ពស់នៅក្នុងទីផ្សាររថយន្តប្រណិតរបស់ប្រទេសចិនដូចជា ម៉ូដែល Nio ET7, Geely Zeekr 001 និង Changan Avatr 12 ដែលប្រើប្រាស់ប្រព័ន្ធបច្ចេកវិទ្យាទំនើបរបស់ Huawei ផងដែរ៕