នេះគឺជាឡាន Aston Martin DBX S ស៊េរីឆ្នាំ 2026 ថ្មី ដែលទើបតែបានបង្ហាញខ្លួន នៅលើទីផ្សារបរទេស ដោយមាន Performance ខ្លាំង ហើយជាឡាន SUV ដែលមានល្បឿនលឿនបំផុត មានប្រើបច្ចេកវិទ្យាពីម៉ូដែល Aston Martin Valhalla នឹងចេញមកប្រជែងជាមួយ Ferrari Purosangue និង Lamborghini Urus ជាដើម។
ទោះបីជាយ៉ាងណាក៏ដោយ Aston Martin DBX S ថ្មីនេះ មិនប្រើម៉ាស៊ីន V12 ដូច Ferrari ឬ មានជំនួយពីប្រព័ន្ធ Hybrid ដូជ Lamborghini ឡើយ ដោយវាប្រើម៉ាស៊ីនសាំង ចំណុះ 4.0L ទំហំ V8 ស៊ីឡាំង ជាមួយនឹង Turbo ចំនួន 2 ពីម៉ូដែល Valhalla ដែលអាចបង្កើតកម្លាំងបានសរុប ដល់ទៅ 717 HP ខ្លាំងជាង Ferrari Purosangue ទៅទៀត។ ក្រុមហ៊ុន Aston Martin អះអាងថា DBX S ឆ្នាំ 2026 ថ្មីនេះ បានបំពាក់ប្រព័ន្ធស៊ីម៉ាំងថ្មី ហើយអាចរត់ស្ទុះពីកុងទ័រ 0-100 KM/H ប្រើពេលត្រឹមតែ 3.3 វិនាទីប៉ុណ្ណោះ ហើយមានល្បឿន Top Speed 200 KM/H។
អ្វីដែលរឹតតែពិសេសនោះគឺ DBX S ថ្មី បានអាប់ដេតទៅលើកាប៊ីនខាងក្នុង និិងបន្ថែម Option ដំបូល Carbon Fiber Roof ដែលធ្វើឲ្យវាមានទម្ងន់ស្រាលជាងមុន 18 គីឡូក្រាម។ លើសពីនេះទៅទៀត វាក៏មាន Option យ៉ាន់កង់ ទំហំ 23 អ៊ីញ ប្រភេទ Magnesium ដែលជួយកាត់បន្ថយទម្ងន់ 19 គីឡូក្រាម ទៀតផង។
សូមបញ្ជាក់ថា បើសិនជាជ្រើសរើសយក Option ដែលជួយកាត់បន្ថយទម្ងន់ទាំងអស់ នោះ DBX S ឆ្នាំ 2026 នឹងមានទម្ងន់ស្រាលជាងមុនសរុប 47 គីឡូក្រាមឯណោះ ដែលជាមូលហេតុធ្វើឲ្យវា មាន Performance កាន់តែប្រសើរជាងមុន។ យ៉ាងណាមិញ ក្រុមហ៊ុន Aston Martin មិនទាន់បានបង្ហាញតម្លៃផ្លូវការរបស់វាឡើយ ប៉ុន្តែគេរំពឹងថា DBX S ស៊េរីឆ្នាំ 2026 អាចមានតម្លៃលើសខ្ទង់ $250,000 សម្រាប់ទីផ្សារបរទេស៕
