នៅថ្ងៃនេះ ក្រុមហ៊ុន OPPO បានរៀបចំនូវសន្និសីទសារព័ត៌មានមួយ ស្តីពីការប្រកាសសម្ពោធជាផ្លូវការនូវស្មាតហ្វូន OPPO Find X នៅក្នុងប្រទេសកម្ពុជា។ ពិធីនេះរៀបចំធ្វើឡើងសណ្ឋាគារ The Great Duke ដែលមានការអញ្ជើញចូលរួមពីសំណាក់ Brand Ambassador របស់ខ្លួនទាំងបីរូប កញ្ញា ពេជ្រ សោភា កញ្ញា រ៉េត ស៊ូសាណា និងលោក Step រួមជាមួយនឹងភ្ញៀវកតត្តិយស និងអ្នកសារព័ត៌មានជាច្រើនរូប។
តាមការបញ្ជាក់របស់ក្រុមហ៊ុន OPPO បានអោយដឹងថា Find X គឺជាស្មាតហ្វូនជំនាន់ថ្មី និងមានលក្ខណះសម្បត្តិប្លែកពីស្មាតហ្វូនដទៃ ត្រូវបានក្រុមហ៊ុនរចនាឡើងជាមួយនឹងអេក្រង់បែប Panoramic មានទំហំ 93.8% ធៀបនឹងតួខ្លួនទាំងមូល ដែលគឺជាកំរិតធំជាងគេដំបូងបង្អស់ក្នុងឧស្សាហកម្មទូរស័ព្ទ។ Find X មានបំពាក់នូវបច្ចេកវិទ្យាសាកថ្មលឿន VOOC, 3D Light Structure, រួមនឹងបច្ចេកវិទ្យា AI Beauty ដែលជាបច្ចេកវិទ្យាច្នៃប្រឌិតថ្មីបំផុត និងបានបង្កើតឡើងដោយ OPPO ផ្ទាល់តែម្តង។ ស្មាតហ្វូន OPPO Find X រចនាឡើងដើម្បីបំពេញតម្រូវការឲ្យលើសពីការរំពឹងទុករបស់អតិថិជន។
OPPO Find X ដំណើរការដោយបន្ទះឈីប Snapdragon 845 និងមានអង្គចងចាំទំហំ 8GB មេម៉ូរីទំហំ 128GB ដែលនេះ គឺជាកម្លាំងចលករដ៏សំខាន់ដែលជួយអោយស្មាតហ្វូននេះកាន់តែខ្លាំង។ ស្មាតហ្វូននេះ ប្រើប្រាស់នូវប្រព័ន្ធកាមេរ៉ាភ្លោះទំហំ 16MP+20MP sensors នៅខាងក្រោយជាមួយនឹងមុខងារ OIS និង AI ផងដែរ។ សម្រាប់កាមេរ៉ាខាងមុខរបស់ស្មាតហ្វូននេះមានទំហំ 25MP ហើយនិងមានការប្រើប្រាស់ជាមួយនឹងមុខងារ 3D portrait lighting និង Omoji ទៀតផង។ ស្មាតហ្វូន Oppo Find X ដំណើរការនូវ ColorOS 5.1 AI Smart custom UI នៅលើប្រព័ន្ធប្រតិបត្តិការ Android 8.1។
នៅក្នុងសន្និសីទថ្ងៃនេះ ក្រុមហ៊ុន OPPO បានប្រកាសថា ខ្លួនគ្រោងនឹងដាក់លក់ OPPO Find X ជាផ្លូវការនៅក្នុងទីផ្សារនៃប្រទេសកម្ពុជានៅថ្ងៃទី 5 ខែសីហា ឆ្នាំ 2018 ខាងមុខនេះ នៅក្នុងតម្លៃ 899$ ដែលមានពីរពណ៌សម្រាប់ជ្រើសរើស គឺ Bordeaux Red (ពណ៌ក្រហម)និង Glacier Blue(ពណ៌ខៀវ) ហើយក្រុមហ៊ុន ក៏នឹងបន្ថែមការដូជាស៊ុមរូបថតឌីជីថលដ៏ទាន់សម័យមួយផងដែរ។
ជាមួយគ្នា ក្រុមហ៊ុន OPPO ក៏បានប្រកាសនូវម៉ូដែល OPPO Find X Automobili Lamborghini Edition ផងដែរ ស្មាតហ្វូនមួយនេះ ត្រូវបានសហការណ៍ក្នុងការផលិតរវាងក្រុមហ៊ុន OPPO និងក្រុមហ៊ុនរថយន្តស្ព័រដ៏ល្បីគឺ Automobili Lamborghini។ សម្រាប់OPPO Find X Automobili Lamborghini Editionនេះ លក្ខណៈពិសេសរបស់វាគឺស្រដៀងទៅនឹង Find X ធម្មតាដែរ អ្វីដែលខុសគ្នានោះ គឺការឌីហ្សាញ ដែលវាមានបញ្ចូលនូវរចនាបទនៃ OPPO និង Lamborghini ហើយវាថែមទាំងបានភា្ជប់ជាមួយនូវបច្ចេកវិទ្យាសាកថ្មលឿន Super VOOCដែលអាចសាកថ្មឲ្យពេញក្នុងរយៈពេលតែ៣៥នាទីប៉ុណ្ណោះ។ បន្ថែមលើនេះទៀត Find X Lamborghini Edition មានមេម៉ូរីទំហំរហូតដល់ 256GB។ អ្វីដែលគួរអោយស្តាយនោះ OPPO Find X Automobili Lamborghini Edition គឺមិនមានលក់នៅក្នុងទីផ្សារប្រទេសយើងឡើយ។
