បើយោងទៅតាមរបាយការណ៍ប្រាក់ចំណូលត្រីមាសទី 4 បានឱ្យដឹងថា ក្រុមហ៊ុន Apple បានចំណាយទឹកប្រាក់ 2.8 ពាន់លានដុល្លារ (ប្រហែលជា 2.2 ពាន់លានផោន) នៅក្នុងការស្រាវជ្រាវ និងការអភិវឌ្ឍនៅក្នុងត្រីមាសចុងក្រោយនេះ ហើយការចំណាយដូចគ្នានៅក្នុងឆ្នាំ 2016 គឺមានរហូតដល់ទៅ 10.39 ពាន់លានដុល្លារ (ប្រហែលជា 8.36 ពាន់លានផោន) ។ បើវិភាគទៅលើប្រាក់ចំណូលប្រចាំត្រីមាសរបស់ក្រុមហ៊ុន Apple បានបង្ហាញថា ការចំណាយប្រចាំឆ្នាំនេះមានកម្រិតខ្ពស់បំផុតដែលមិនធ្លាប់មានពីមុនមកនោះទេ។
បើយោងទៅតាមលោក Luca Maestri ដែលជាប្រធានផ្នែកហិរញ្ញវត្ថុបានឱ្យដឹងថា ការចំណាយទៅលើការស្រាវជ្រាវ និងការអភិវឌ្ឍគឺជាភាពខុសគ្នាធំបំផុតរបស់ក្រុមហ៊ុន Apple ជាមួយនឹងដៃគូប្រកួតប្រជែងរបស់ខ្លួនដើម្បីពង្រីកខ្លួនចូលទៅក្នុងរបកគំហើញថ្មីមួយទៀត។ នៅក្នុងសន្នីសីទមួយជាមួយនឹងក្រុមអ្នកវិនិយោគរបស់ Goldman Sachs កាលពីថ្ងៃអង្គារិ៍ លោក Maestri បានបញ្ជាក់ថា ក្រុមហ៊ុន Apple កំពុងតែធ្វើការទៅលើរឿងមួយដែលមិនទាន់អាចរកប្រាក់ចំណូលបាននៅថ្ងៃនេះនៅឡើយទេ ប៉ុន្តែវានឹងតបស្នងមកវិញនាពេលខាងមុខ។ យ៉ាងណាមិញ លោក Maestri មិនបានបញ្ជាក់ថាវាជាការស្រាវជ្រាវទៅលើអ្វីឱ្យប្រាកដនោះទេ ប៉ុន្តែពាក្យចចាមអារ៉ាមបានឱ្យដឹងថា ការចំណាយនេះគឺទៅលើគម្រោងជាច្រើនដែលក្នុងនោះផ្តោតទៅលើ Apple Car និងការប្រើប្រាស់នូវវ៉ែនតាបច្ចេកវិទ្យាថ្មីពី Apple ។
លោក Maestri បន្ថែមទៀតថា “យើងបានបង្កើតនូវទូរស័ព្ទ iPhone ដល់ទៅ 3 ស៊េរីម៉ូដែលដែលកាលពីមុនមានតែមួយតែប៉ុណ្ណោះ។ យើងបានផលិតនូវ iPods, Apple Watch, Airpods, Beat Headphones ហើយយើងនឹងត្រៀមក្នុងការបង្ហាញនូវផលិតផលអស្ចារ្យជាច្រើនទៀត។” ក្រុមហ៊ុន Apple បានចំណាយទឹកប្រាក់យ៉ាងច្រើនក្នុងការពង្រីកនូវសេវាកម្មអាជីវកម្មរបស់ខ្លួនដែលមានដូចជា App Store និង iTunes ជាដើម។ លោក Maestri បន្តទៀតថា “សេវាកម្មជាច្រើនរបស់យើងកំពុងតែមានការកើនឡើងខ្លាំង។ យើងត្រូវការវិនិយោគទៅលើសេវាកម្មជាច្រើនទៀតដូចជា iCloud, Siri, Maps ជាដើម។ ការចំណាយទៅលើមជ្ឈមណ្ឌលស្រាវជ្រាវ និងអភិវឌ្ឍ គឺខ្ពស់ជាងអ្វីដែលយើងធ្លាប់ចំណាយ។”
គួរបញ្ជាក់ផងដែរថា ក្រុមហ៊ុន Apple បានបើកនូវមជ្ឈមណ្ឌលស្រាវជ្រាវ និងអភិវឌ្ឍនៅក្នុងប្រទេសអ៊ីស្រាអែលដោយផ្តោតសំខាន់ទៅលើការអភិវឌ្ឍបន្ទះឈីបនៅក្នុងឆ្នាំ 2015 ហើយមជ្ឈមណ្ឌលស្រាវជ្រាវ និងអភិវឌ្ឍនេះក៏គ្រោងនឹងបង្កើតនៅទីក្រុង Yokohama ប្រទេសជប៉ុន ទីក្រុង Jakarta ប្រទេសឥណ្ឌូនេស៊ី និងប្រទេសចិនផងដែរ៕
