ពាក្យចចាមអារ៉ាមជាច្រើនបាននិយាយអំពីទូរស័ព្ទ iPhone 8 ប៉ុន្តែលក្ខណៈសម្បត្តិពិសេសៗរបស់វានៅមិនទាន់បានក្រុមហ៊ុន Apple ទម្លាយឱ្យដឹងនៅឡើយទេ។ មុខងារសំខាន់មួយដែលត្រូវបានគេដឹងថានឹងបំពាក់ទៅលើទូរស័ព្ទស៊េរីថ្មីនេះគឺនឹងប្រើប្រាស់នូវប្រព័ន្ធស្កែនក្រយ៉ៅដៃបង្កប់នៅក្រោមអេក្រង់ដែលនេះជាប៉ាតង់ថ្មីដែល Apple ទទួលបាននៅថ្ងៃច័ន្ទនេះ។ ការប្រើប្រាស់នូវប្រព័ន្ធស្កែនក្រយ៉ៅដៃបង្កប់ក្រោមអេក្រង់នេះអាចធ្វើឱ្យការប្រើប្រាស់ប្រព័ន្ធ Touch ID នៅលើប៊ូតុង Home ជាន់គ្នា ហេតុនេះក្រុមហ៊ុន Apple ប្រហែលជាដកចេញនូវប៊ូតុង Home ចេញពីទូរស័ព្ទ iPhone ស៊េរីថ្មីនេះជាក់ជាមិនខាន។
ការដកចេញនូវប៊ូតុង Home នេះមានន័យថា ក្រុមហ៊ុន Apple លែងប្រើប្រាស់នូវស៊ុមព័ទ្ធអេក្រង់ធំទៀតហើយនៅលើទូរស័ព្ទ iPhone ស៊េរីថ្មីនេះដែលរឿងនេះបង្ហាញថាក្រុមហ៊ុន Apple ប្រហែលជាប្រើប្រាស់នូងកញ្ចក់អេក្រង់កាន់តែធំជាងមុន។ ការកែប្រែនូវបន្ទះអេក្រង់ថ្មីដែលមានទំហំធំជាងមុននេះប្រហែលជាអាចប្រើប្រាស់នូវបច្ចេកវិទ្យា Edge-To-Edge ថែមទៀតផង។ សរុបមក ប៉ាតង់ថ្មីនេះបានបញ្ជាក់ថា មុខងារសំខាន់ៗទាំងនេះនឹងដំណើរការនៅលើទូរស័ព្ទ iPhone ស៊េរីថ្មីជាក់ជាមិនខាន។
នៅក្នុងឆ្នាំ 2014 ក្រុមហ៊ុន Apple បានទិញយកក្រុមហ៊ុន LuxVue ដែលជាក្រុមហ៊ុនបច្ចេកវិទ្យាមួយមានជំនាញឯកទេសក្នុងការផលិតនូវអំពូល micro-LEDs ដែលពិតជាតម្រូវការដ៏ធំក្នុងការផលិតនូវបន្ទះអេក្រង់ OLED Edge-To-Edge ។ ក្រុមហ៊ុន LuxVue ក៏គ្រប់គ្រងទៅលើប៉ាតង់ជាច្រើនផងដែរដែលក្នុងនោះក៏មានការផលិតនូវបន្ទះអេក្រង់ដែលអាចបត់បានផងដែរ។ បន្ទះអេក្រង់ Edge-to-Edge Display គឺជាជម្រើសដ៏ល្អបំផុតសម្រាប់ស្មាតហ្វូនស៊េរីថ្មីហើយក្រុមហ៊ុន Samsung ប្រហែលជាប្រើប្រាស់នូវបន្ទះអេក្រង់នេះសម្រាប់ស្មាតហ្វូន Galaxy S8 របស់ខ្លួនផងដែរ៕
ប្រភពពី ibtimes.com