Rovio ដែលជាក្រុមហ៊ុនបច្ចេកវិទ្យាធំមួយដែលផលិតនូវហ្គេមដ៏ល្បីល្បាញ “Angry Birds” កំពុងតែកាត់បន្ថយនូវកម្លាំងពលកម្មបុគ្គលិករបស់ខ្លួនប្រមាណជា 10% ចេញ នេះបើតាមការបញ្ជាក់របស់សារព័ត៌មាន The Wall Street Journal ។ នាពេលបច្ចុប្បន្ននេះ ក្រុមហ៊ុនបច្ចេកវិទ្យារបស់ហ្វាំងឡង់មួយនេះមានបុគ្គលិកចំនួន 400 នាក់ ប៉ុន្តែបុគ្គលិក 35 នាក់ប្រហែលជាត្រូវបាត់បង់ការងារដោយសារតែការធ្វើរចនាសម្ព័ន្ធថ្មី។
លោក Kaisu Karvala ដែលជាអ្នកនាំពាក្យរបស់ក្រុមហ៊ុនRovio បានប្រាប់សារព័ត៌មាន The Wall Street Journal ថា បុគ្គលិកជាច្រើននាក់ដែលបានរងការប៉ះពាល់ក្នុងការបាត់បង់ការងារនេះមានដូចជាបុគ្គលិកដែលកំពុងតែធ្វើការនៅក្នុងផ្នែកគំរូជីវចល និងបុគ្គលិកដែលស្ថិតនៅក្នុងផ្នែកគ្រប់គ្រង និងសម្តែងផងដែរ។ ចំនែកបុគ្គលិកដែលកំពុងតែធ្វើការនៅក្នុងផ្នែកផលិតហ្គេម Rovio គឺមិនមានការប៉ះពាល់នោះទេ។
ហ្គេមដ៏ល្បីល្បាញ “Angry Birds” ដែលលោកអ្នកត្រូវប្រើប្រាស់នូវសត្វចាបដើម្បីកំទេចនូវសត្វជ្រូកជាច្រើនដែលបានលួចស៊ុតនោះនៅតែជាប់ចំណាត់ថ្នាក់កំពូល (កម្មវិធីដែលត្រូវទិញ) គ្រប់ពេលទាំងអស់។ គួរបញ្ជាក់ផងដែរថានៅពេលដែលក្រុមហ៊ុន Rovio នៅមិនទាន់ផលិតបាននូវហ្គេមដែលល្បីល្បាញថ្មី ប្រាក់ចំណេញរបស់ក្រុមហ៊ុនមានការធ្លាក់ចុះខ្លាំងដែលធ្វើឱ្យក្រុមហ៊ុនត្រូវកាត់បុគ្គលិកចោលដល់ទៅ 300 នាក់នៅក្នុងឆ្នាំ 2014 និង 2015 ៕
