កាលពីពេលមុន ក្រុមហ៊ុនបច្ចេកវិទ្យាយក្ស Samsung បានបញ្ជាក់យ៉ាងច្បាស់ថា ក្រុមហ៊ុននឹងមិនប្រកាសបង្ហាញនូវស្មាតហ្វូនត្រកូល Galaxy S8 នៅឡើយទេនៅក្នុងព្រឹត្តិការណ៍តាំងពិពរណ៍ MWC 2017 ដោយក្រុមហ៊ុនសម្រេចចិត្តក្នុងការប្រកាសបង្ហាញនូវថេប្លេត Galaxy Tab S3 ស៊េរីថ្មីវិញនៅក្នុងព្រឹត្តិការណ៍នេះ។ ក្រុមហ៊ុន Samsung បានរាយការណ៍ថា ខ្លួនមានគម្រោងក្នុងការប្រកាសបញ្ជាក់អំពីកាលបរិច្ឆេទនៃការសម្ភោធស្មាតហ្វូនត្រកូល Galaxy S8 នៅក្នុងព្រឹត្តិការណ៍ MWC ។
យោងទៅតាមសារព័ត៌មាន The Korea Economic Daily (ដែលជាប្រព័ន្ធផ្សព្វផ្សាយធំមួយនៅក្នុងប្រទេសកូរ៉េខាងត្បូង) បានឱ្យដឹងថា ក្រុមហ៊ុន Samsung នឹងទម្លាយឱ្យដឹងអំពីកាលបរិច្ឆេទនៃការប្រកាសបង្ហាញវត្តមាន Galaxy S8 នៅថ្ងៃទី 27 ខែកុម្ភៈដែលជាថ្ងៃប្រារព្ធបើកកម្មវិធីតាំងពិពរណ៍ MWC 2017 ។ ថ្មីៗនេះផងដែរ យើងបានដឹងដំណឹងមួយចំនួនថា ក្រុមហ៊ុន Samsung នឹងធ្វើការប្រកាសសម្ភោធបង្ហាញស្មាតហ្វូន Galaxy S8 នៅថ្ងៃទី 29 ខែមីនា ហើយការចាប់ផ្តើមលក់ស្មាតហ្វូននេះគឺនៅថ្ងៃទី 21 ខែមេសាខាងមុខនេះ។ ពេលនេះ យើងត្រូវធ្វើការរង់ចាំសម្រាប់ព្រឹត្តិការណ៍ MWC ចាប់ផ្តើមសិនថាតើកាលបរិច្ឆេទដែលជាដំណឹងក្តៅៗទាំងនេះត្រឹមត្រូវឬអត់នោះ។
ស្មាតហ្វូន Galaxy S8 ត្រូវបានគេរំពឹងថានឹងបំពាក់នូវមុខងារពិសេសៗជាច្រើន រួមជាមួយនឹងលក្ខណៈសម្បត្តិថ្មីៗដ៏អស្ចារ្យ។ ពាក្យចចាមអារ៉ាមចុងក្រោយបញ្ជាក់ថា ក្រុមហ៊ុន Samsung នឹងប្រកាសបង្ហាញនូវស្មាតហ្វូន Galaxy S8 ដែលមានអេក្រង់ទំហំ 5.8 អ៊ីង ជាមួយនឹងស្មាតហ្វូន Galaxy S8+ ដែលមានអេក្រង់ទំហំ 6.2 អ៊ីង។ អេក្រង់នៃស្មាតហ្វូនទាំងពីរគឺជាប្រភេទអេក្រង់គែមកោងដែលមានរូបរាងស្រស់ស្អាតបំផុត។ ស្មាតហ្វូនទាំងពីរនេះនឹងប្រើប្រាស់នូវបន្ទះឈីប Snapdragon 835 CPU ស៊េរីថ្មីចុងក្រោយរបស់ក្រុមហ៊ុន Qualcomm ហើយអ្វីដែលកាន់តែពិសេសនោះស្មាតហ្វូន Galaxy S8 នឹងដាក់លក់គ្រប់ក្រុមហ៊ុនចែកចាយទាំងអស់នៅអាមេរិចផងដែរ៕