ឆ្នាំទៅ Samsung បានប្រកាសចេញកំពូលស្មាតហ្វូនជំនាន់ Galaxy S7 និង S7 edge ដែលមានពីរម៉ូដែលផ្សេងគ្នាគឺមួយប្រើប្រាស់នូវបន្ទះឈីបផ្ទាល់ខ្លួនជំនាន់ Exynos 8 octa-core និងមួយទៀតប្រើប្រាស់ឈីប Snapdragon 820 របស់ Qualcomm ដែលអ្នកប្រើប្រាស់អាចជ្រើសរើសយកម៉ូដែលណាមួយតម្រូវតាមទីផ្សារក្នុងតំបន់របស់ពួកគេ។ ចំពោះឆ្នាំនេះវិញព័ត៌មានបែកធ្លាយជាច្រើនបានចុះផ្សាយពីកំពូលស្មាតហ្វូនជំនាន់ថ្មីគឺ Galaxy S8 ដែលបានផ្តោតសំខាន់ទៅលើការប្រើប្រាស់បន្ទះឈីបជំនាន់ថ្មីរបស់ Qualcomm គឺ Snapdragon 835 ប៉ុន្តែមិនទាន់មានព័ត៌មានស្តីពីបន្ទះឈីបដែលជាគូប្រគូតពី Samsung នៅឡើយទេ។
ព័ត៌មានបែកធ្លាយទាំងឡាយបានចុះផ្សាយថាឆ្នាំនេះ Samsung នឹងប្រកាសចេញស្មាតហ្វូនត្រកូល S ចំនួនពីរស៊េរីគឺ Galaxy S8 និង S8 Plus ដែលអាចនឹងមានពីរម៉ូដែលសម្រាប់ជ្រើសរើសជាមួយបន្ទះឈីប ពីរផ្សេងគ្នាផងដែរ។ គេជឿជាក់ថា Samsung Galaxy S8 នឹងមានម៉ូដែលប្រើប្រាស់ Snapdragon 835 និងម៉ូដែលប្រើ Exynos 9 ឬ Exynos 8895។ ទោះបីជាបែបនេះក្តីព័ត៌មានទាក់ទងនឹងឈីបExynos9 មិនទាន់ត្រូវបាន Samsung បង្ហើបព័ត៌មានជាក់លាក់ណាមួយនៅឡើយទេ ទើបតែពេលនេះបានលេចលឺ ព័ត៌មានមកថា Samsung កំពុងតែធ្វើការវិវត្តន៍លើបន្ទះឈីបជំនាន់ថ្មីសម្រាប់ប្រើនៅលើកំពូលស្មាតហ្វូន Galaxy S8 របស់ខ្លួន។
បន្ថែមពីនេះក៏មានរូបភាព teases បែកធ្លាយចេញពីគណនីមួយដែលគេដឹងច្បាស់ថាជាគណនីផ្លូវការណ៍របស់ក្រុមវិស្វករផលិតឈីបរបស់ Samsung ដែលវាបានបង្ហាញច្បាស់ណាស់ថាវាជាបន្ទះឈីបជំនាន់ថ្មី Samsung Exynos 9 ប៉ុន្តែប្រភពមិនបានបញ្ជាក់ច្បាស់ពីគុណសម្បត្តិ និងថ្ងៃប្រកាសចេញនោះទេគ្រាន់តែសរសេរថា “នឹងមកដល់ឆាប់ៗនេះ” “Coming Soon”។ មានប្រភពព័ត៌មានមួយចំនួនបានបង្ហើបប្រាប់ថា បន្ទះឈីបជំនាន់ថ្មីរបស់ Samsung នេះអាចនឹងបង្ហាញវត្តមាននៅក្នុងព្រឹត្តិការណ៍ Mobil World Congress 2017 ចុងខែកុម្ភះនេះ។ សម្រាប់ព័ត៌មានបឋមបានឲ្យដឹងថាឈីប Exynos 9 ឬ Exynos 8895 នឹងត្រូវផលិតដោយ Samsung ផ្ទាល់ដោយមានខ្នាតទំហំ 10 ណាណូម៉ែត្រដូច Snapdragon 835 ដែរ, ប្រើស៊ីភីយូ 8 គ្រាប់មាន 4 គ្រាប់ជាប្រភេទ M2-core និង 4 គ្រាប់ទៀតប្រភេទARM Cortex-A53 និងទ្រទ្រង់ដោយឈីបក្រាហ្វិក Mali G71៕