កាលពីឆ្នាំមុននេះ ស្មាតហ្វូន Xiaomi Mi Mix បានធ្វើការកែប្រែរូបរាងកាន់តែច្រើនជាមួយនឹងស៊ុមព័ទ្ធជុំវិញអេក្រង់កាន់តែស្តើង និងមានការរចនារូបរាងទំនើបទាន់សម័យបំផុត។ ពេលនេះ របាយការណ៍ថ្មីមួយអះអាងថា ក្រុមហ៊ុន Xiaomi កំពុងតែធ្វើការអភិវឌ្ឍទៅលើស្មាតហ្វូន Mi Mix 2 ដែលមានស៊ុមព័ទ្ធជុំវិញអេក្រង់កាន់តែស្តើងជាមុន និងប្រើប្រាស់នូវអេក្រង់ AMOLED Display ផងដែរ។
ក្រុមហ៊ុន Xiaomi ទើបតែប្រកាសបង្ហាញនូវស្មាតហ្វូន Mi Mix នៅក្នុងខែវិច្ឆិកា ឆ្នាំ 2016 ហើយស្មាតហ្វូននេះ ត្រូវបានដាក់លក់នៅក្នុងប្រទេសចិននៅក្នុងចំនួនជាក់លាក់មួយប៉ុណ្ណោះ។ ទោះជាយ៉ាងណាក៏ដោយ វាមិនអាចបញ្ឈប់អ្នកប្រើប្រាស់ជាច្រើននាក់នៅសហរដ្ឋអាមេរិចដែលចង់ប្រើប្រាស់ស្មាតហ្វូននេះនោះទេ។ ស្មាតហ្វូន Mi Mix មានអេក្រង់ Screen-To-Body Ratio ដល់ទៅ 91.3% ដែលពិតជាមានការរចនាស៊ុមព័ទ្ធជុំវិញអេក្រង់តិចមែនទែន។ ស៊ុមព័ទ្ធអេក្រង់ផ្នែកខាងលើ ខាងឆ្វេង និងខាងស្តាំពិតជាស្តើងណាស់ ខណៈពេលដែលផ្នែកខាងក្រោមមានកម្រាស់ក្រាស់ជាងសម្រាប់ទុកកន្លែងដាក់កាមេរ៉ាផ្នែកខាងមុខ។
មនុស្សជាច្រើនមើលឃើញថា ស្មាតហ្វូន Mi Mix គឺជាការរចនារូបរាងសម្រាប់ស្មាតហ្វូននាពេលអនាគត ហើយពេលនេះក្រុមហ៊ុន Xiaomi ក៏បានធ្វើការពង្រឹងកាន់តែប្រសើរទៅលើស្មាតហ្វូនរបស់ខ្លួន។ ប្រភពសុំមិនបញ្ចេញឈ្មោះមួយបានអះអាងថា ក្រុមហ៊ុន Xiaomi គ្រោងនឹងប្រើប្រាស់អេក្រង់ Screen-To-Boy Ratio ទំហំ 93% សម្រាប់ស្មាតហ្វូន Mi Mix 2 នេះបើតាមការរាយការណ៍របស់ Android Authority ។ ប្រភពដដែលនេះអះអាងទៀតថា ក្រុមហ៊ុន Xiaomi នឹងបោះបង់ចោលការប្រើប្រាស់បន្ទះអេក្រង់ LCD Panel ដោយផ្លាស់ប្តូរទៅប្រើប្រាស់បន្ទះអេក្រង់ AMOLED វិញ។ ប្រសិនបើវាជាការពិត ក្រុមហ៊ុន Xiaomi អាចនឹងប្រើប្រាស់អេក្រង់គែមកោងសម្រាប់លុបបំផុតស៊ុមព័ទ្ធអេក្រង់នៅផ្នែកខាងឆ្វេង និងខាងស្តាំសម្រាប់ស្មាតហ្វូន Mi Mix 2។
វាមិនមានទាន់មានសេចក្តីលម្អិតណាមួយដែលបញ្ជាក់ថាក្រុមហ៊ុន Xiaomi ពិតជាអាចប្រើប្រាស់នូវអេក្រង់ Screen-To-Body Ratio កម្រិត 93% ប៉ុន្តែវាមានន័យថាស្មាតហ្វូន Mi Mix 2 ពិតជាមានកញ្ចក់អេក្រង់ផ្នែកខាងមុខកាន់តែធំជាងមុន។ ស៊ុមព័ទ្ធអេក្រង់ផ្នែកខាងក្រោមរបស់ស្មាតហ្វូន Mi Mix ត្រូវបានគេដឹងថារក្សាទុកដដែល ប៉ុន្តែគ្រាន់តែវាមានទំហំតូចជាងមុន។ ប្រភពដដែលក៏អះអាងទៀតថា ក្រុមហ៊ុន Xiaomi ប្រហែលជាធ្វើការផ្លាស់ប្តូរនូវប្រព័ន្ធស្កែនក្រយ៉ៅដៃរបស់ខ្លួនពីផ្នែកខាងក្រោយមកដាក់នៅផ្នែកខាងមុខវិញសម្រាប់ស្មាតហ្វូន Mi Mix 2 ។ ពាក្យចចាមអារ៉ាម និងការប៉ាន់ស្មានមុននេះអះអាងថា ប្រព័ន្ធស្កែនក្រយ៉ៅដៃ (Fingerprint) របស់ស្មាតហ្វូននេះប្រហែលជាបង្កប់នៅផ្នែកខាងក្រោមអេក្រង់។ ទោះជាយ៉ាងណាក៏ដោយ វាត្រូវបានគេដឹងថាប្រហែលជាបង្កប់នៅផ្នែកខាងក្រោមនៃស្មាតហ្វូនស៊េរីថ្មីនេះ។
សម្រាប់ការរចនារូបរាងនៅលើស្មាតហ្វូន Mi Mix 2 វិញ របាយការណ៍ជាច្រើននិយាយថា ក្រុមហ៊ុន Xiaomi នឹងបន្តប្រើប្រាស់សេរ៉ាមិចសម្រាប់ការរចនារូបរាងរបស់ស្មាតហ្វូននេះ។ យោងទៅតាម Phandroid បានបញ្ជាក់ថា បច្ចេកវិទ្យានៃប្រព័ន្ធសំឡេងក៏ត្រូវបានបង្កប់នៅក្រោមអេក្រង់នេះផងដែរ។ វាហាក់ដូចជាលឿនពេកហើយដែលការរចនារូបរាងចុងក្រោយ និងលក្ខណៈសម្បត្តិរបស់ស្មាតហ្វូន Mi Mix 2 ត្រូវបានទម្លាយឱ្យដឹង ខណៈពេលដែលវានៅមានការមន្ទិលសង្ស័យជាច្រើនផងដែរ។ ប្រសិនបើក្រុមហ៊ុន Xiaomi ដើរតាមកាលបរិច្ឆេទនៃការប្រកាសបង្ហាញស្មាតហ្វូនស៊េរីថ្មីដូចឆ្នាំមុននោះ អ្នកគាំទ្រទាំងអស់ អាចនឹងមើលឃើញកាន់តែច្បាស់អំពីស្មាតហ្វូន Mi Mix 2 នៅក្នុងខែវិច្ឆិកាខាងមុខនេះហើយ៕