ពេលនេះ ការរចនារូបរាងរបស់ស្មាតហ្វូន Galaxy S8 និង Galaxy S8 Plus ជិតបង្ហាញខ្លួនជាផ្លូវការហើយ រូបភាពថ្មីជាច្រើនលេចឡើងដោយប្រៀបធៀបនូវរូបរាងរបស់ស្មាតហ្វូនស៊េរីថ្មីនេះជាមួយនឹងស្មាតហ្វូនជំនាន់មុនរបស់ក្រុមហ៊ុន Samsung និងក្រុមហ៊ុន Apple ។ គណនីទម្លាយដ៏ល្បីល្បាញ @OnLeaks បង្ហោះសាររូបភាពជាច្រើនសន្លឹកដែលធ្វើការប្រៀបធៀបរូបរាងរបស់ស្មាតហ្វូនស៊េរីថ្មី Galaxy S8 និង Galaxy S8 Plus ជាមួយនឹងស្មាតហ្វូន Galaxy S6, Galaxy S7 និងហ្វាប់ប្លេត Galaxy Note 7 រួមជាមួយនឹងទូរស័ព្ទ Apple iPhone 7 និង iPhone 7 Plus ផងដែរ។
ដូចអ្វីដែលអ្នកអាចមើលឃើញនៅក្នុងរូបភាពទាំងនេះ ស្មាតហ្វូន Galaxy S8 មានរូបរាងខ្លីជាងហ្វាប់ប្លេត Galaxy Note 7 តែបន្តិចនោះទេ ខណៈពេលដែលស្មាតហ្វូន Galaxy S8 Plus ខ្ពស់ជាងបន្តិច។ ព័ត៌មានហាក់ដូចជាផ្ទុយទៅនឹងពាក្យចចាមអារ៉ាមជាច្រើនបញ្ជាក់ថា ស្មាតហ្វូនស៊េរីថ្មីទាំង 2 ម៉ូដែលរបស់ក្រុមហ៊ុន Samsung នឹងខ្ពស់ជាងស្មាតហ្វូន Galaxy S6 និង Galaxy S7 ។
អ្វីដែលគួរឱ្យចាប់អារម្មណ៍ទៀតនោះ ស្មាតហ្វូន Galaxy S8 Plus មានកំពស់ប្រហាក់ប្រហែលទៅនឹងទូរស័ព្ទ iPhone 7 Plus ដែរគ្រាន់តែវាមានអេក្រង់ធំជាងបន្តិចប៉ុណ្ណោះ។ ក្រុមហ៊ុនបច្ចេកវិទ្យាយក្សកូរ៉េខាងត្បូង Samsung ព្យាយាមខិតខំប្រឹងប្រែងក្នុងការជ្រើសរើសទំហំអេក្រង់ដ៏សក្តិសមមួយសម្រាប់ស្មាតហ្វូនស៊េរីថ្មីដើម្បីផ្តល់នូវផាសុខភាព និងភាពទាន់សម័យនៅពេលដែលអ្នកប្រើប្រាស់កាន់តែវានៅក្នុងដៃ៕