ស្មាតហ្វូនស៊េរីថ្មីបំពាក់នូវបច្ចេកវិទ្យាកម្រិតខ្ពស់បំផុតដែលប្រកាសបង្ហាញវត្តមានកាលពីខែមុននេះនៅក្នុងព្រឹត្តិការណ៍តាំងពិពរណ៍ Mobile World Congress គឺ Sony Xperia XZ Premium គ្រោងដាក់លក់ជាផ្លូវការនៅលើទីផ្សារដំបូងបំផុតរបស់ខ្លួននៅដើមខែមិថុនា។ ទោះបីជាក្រុមហ៊ុនបច្ចេកវិទ្យាយក្ស Sony មិនបង្ហាញព័ត៌មានលម្អិតអំពីកាលបរិច្ឆេទនៃការទិញស្មាតហ្វូនស៊េរីថ្មីនេះក្តី ពេលនេះក្រុមហ៊ុនលក់រាយធំៗចំនួន 2 នៅចក្រភពអង់គ្លេសដាក់ឱ្យធ្វើការបញ្ជាទិញមុននូវស្មាតហ្វូនស៊េរីថ្មី Xperia XZ Premium ។ ស្មាតហ្វូនប្រភេទ Unlocked ក្លាយជាជម្រើសដ៏ល្អបំផុតសម្រាប់អតិថិជនរបស់ Xperia XZ Premium អាចរកទិញបាននៅតម្លៃ 640 ផោន។ ក្រុមហ៊ុនលក់រាយចំនួន 2 នៅចក្រភពអង់គ្លេសគឺ Amazon និង Clove ដាក់លក់ស្មាតហ្វូននេះនៅក្នុងតម្លៃ 650 ផោន។
ទោះជាយ៉ាងណាក៏ដោយ ស្មាតហ្វូន Unlocked មានពីរពណ៌សម្រាប់ធ្វើការជ្រើសរើសគឺពណ៌ខ្មៅ (Deepsea Black) និងពណ៌ប្រផេះ (Luminous Chrome) ខណៈពេលដែលក្រុមហ៊ុនលក់រាយ Amazon និង Clove ដាក់លក់តែពណ៌ខ្មៅតែប៉ុណ្ណោះ។ អតិថិជនជាច្រើនដែលកម្មង់ទិញស្មាតហ្វូន Xperia XZ Premium នេះនឹងមិនទាន់ទទួលបានស្មាតហ្វូននៅឡើយទេរហូតទាល់តែដើមខែមិថុនា។
Sony Xperia XZ Premium គឺជាស្មាតហ្វូនតែមួយគត់ប្រកាសបង្ហាញនៅព្រឹត្តិការណ៍តាំងពិពរណ៍ MWC 2017 ដោយបំពាក់បន្ទះឈីប Snapdragon 835 ចុងក្រោយបំផុតរបស់ក្រុមហ៊ុន Qualcomm ហើយវាមិនទាន់ដាក់លក់ជាផ្លូវការនៅឡើយទេរហូតទាល់តែដល់ខែមិថុនា។ បន្ថែមពីនេះទៀត ស្មាតហ្វូននេះភ្ជាប់ជាមួយនឹងកាមេរ៉ា Motion Eye Camera ដែលអាចថតវីដេអូដ៏អស្ចារ្យ ប្រភេទ Slow-Motion Videos (យឺតជាងស្មាតហ្វូនផ្សេងដល់ទៅ 4 ដង) ហើយលោកអ្នកក៏អាចថតរូបភាពបានជាច្រើនមុនពេលចាប់ផ្តើមថតផងដែរ។
ពាក់ព័ន្ធទៅនឹងកាលបរិច្ឆេទនេះ ស្មាតហ្វូន Xperia XZ Premium អាចនឹងក្លាយជាគូរប្រកួតប្រជែងដ៏ធំមួយជាមួយនឹងស្មាតហ្វូនស៊េរីថ្មី Samsung Galaxy S8 និង Samsung Galaxy S8+ ដែលរំពឹងថា ដាក់លក់នៅថ្ងៃទី 28 ខែមេសាខាងមុខនេះ។ តើលោកអ្នកជ្រើសរើសយកស្មាតហ្វូនស៊េរីថ្មីមួយណាដើម្បីប្រើប្រាស់ Sony Xperia XZ Premium ឬ Galaxy S8/ Galaxy S8+?