ក្រុមហ៊ុន Huawei និង AT&T កំពុងតែពិភាក្សាគ្នាលើកិច្ចព្រមព្រៀងនៅក្នុងការចែកចាយស្មាតហ្វូនស៊េរីថ្មីរបស់ខ្លួននៅសហរដ្ឋអាមេរិក

ប្រិយមិត្តជាច្រើននៅសហរដ្ឋអាមេរិកប្រហែលនៅមិនទាន់បានដឹងអំពីរឿងនេះនៅឡើយទេ ប៉ុន្តែក្រុមហ៊ុនបច្ចេកវិទ្យាយក្ស Huawei កំពុងតែពិភាក្សារកកិច្ចព្រមព្រៀងមួយបន្ទាប់ពីភាពជោគជ័យនៅក្នុងវិស័យឧស្សាហកម្មស្មាតហ្វូនស៊េរីថ្មីរបស់ខ្លួន។ ក្រុមហ៊ុន Huawei នៅមិនទាន់ស្វែងរកបានដៃគូចែកចាយស្មាតហ្វូននៅក្នុងសហរដ្ឋអាមេរិកបាននៅឡើយទេក្នុងចំណោមក្រុមហ៊ុនធំៗទាំង 4 ប៉ុន្តែសម្រាប់ដំណឹងចុងក្រោយនេះបញ្ជាក់ថា ក្រុមហ៊ុន Huawei កំពុងពិភាក្សាជាមួយនឹងក្រុមហ៊ុន AT&T ក្នុងភាពជាដៃគូជាមួយគ្នា។

យោងទៅតាមប្រភពព័ត៌មានទម្លាយនៅខាងក្នុងបញ្ជាក់ថា ក្រុមហ៊ុនទាំងពីរនេះកំពុងពិភាក្សាគ្នាអំពីការចែកចាយស្មាតហ្វូនស៊េរីថ្មីរបស់ក្រុមហ៊ុន Huawei នៅសហរដ្ឋអាមេរិក។ ការចចារគឺនៅមានការព្រួយបារម្ភនៅឡើយសម្រាប់ក្រុមហ៊ុនទាំងពីរ។ ទោះជាយ៉ាងណាក៏ដោយ ក្រុមហ៊ុន Huawei មិនមែនជាជនចម្លែកនោះទេនៅក្នុងទីផ្សារអាមេរិកនោះ។ ខណៈពេលដែលក្រុមហ៊ុនចែកចាយធំៗនៅសហរដ្ឋអាមេរិកមិនទទួលយកស្មាតហ្វូន Huawei ក្តី ក្រុមហ៊ុនបច្ចេកវិទ្យានេះនៅតែលក់រាយស្មាតហ្វូន Huawei Mate 9 ដដែលនៅលើទីផ្សារនៃប្រទេសនេះ។ ម៉ាកយីហោ Huawei មានកេរ្តិ៍ឈ្មោះទូលំទូលាយនៅទីនេះដែលធ្វើឱ្យក្រុមហ៊ុន Huawei ឈរនៅចំណាត់ថ្នាក់លេខ 3 ធំបំផុតនៅលើពិភពលោក។ ដូចនេះ ក្រុមហ៊ុនដែលចែកចាយស្មាតហ្វូនស៊េរីថ្មីរបស់ក្រុមហ៊ុនមួយនេះក៏ទទួលផលល្អច្រើនដែរ។

ស្មាតហ្វូនស៊េរីថ្មីចុងក្រោយបំផុត Huawei P10 របស់ក្រុមហ៊ុន Huawei នៅមិនទាន់ដាក់លក់នៅតាមក្រុមហ៊ុនចែកចាយធំណាមួយនៅសហរដ្ឋអាមេរិកនោះទេ។ ប្រសិនបើក្រុមហ៊ុនចែកចាយណាមួយព្រមទទួលយកសំណើរក្នុងភាពជាដៃគូជាមួយនឹងក្រុមហ៊ុន Huawei នោះកំណើនរបស់ស្មាតហ្វូនស៊េរីថ្មីនេះមានការកើនឡើងខ្លាំង។ យើងសង្ឃឹមថាស្មាតហ្វូនស៊េរីថ្មី Huawei P10 នឹងបង្ហាញខ្លួនឆាប់ៗនេះជាក់ជាមិនខាន៕