ត្រឡប់ទៅកាន់ឆ្នាំ 2016 វិញ ក្រុមហ៊ុនបច្ចេកវិទ្យាយក្ស Huawei ប្រកាសថា ក្រុមហ៊ុនលក់ដាច់សា្មតហ្វូនត្រកូល Huawei P9 និង Huawei P9 Plus ច្រើនជាង 10 លានគ្រឿង។ មកទល់ពេលនេះ វាមានការកើនឡើងច្រើនជាង 2 លានគ្រឿងថែមទៀត។ សរុបមក ក្រុមហ៊ុនលក់ស្មាតហ្វូន Huawei P9 និង Huawei P9 Plus ច្រើនជាង 12 លានគ្រឿង។ ទិន្នន័យនេះ មានប្រភពមកពីលោក Yu Cheng Dong អគ្គនាយករបស់ក្រុមហ៊ុន Huawei Consumer Business Group ដែលនៅអាមេរិកលោកត្រូវគេស្គាល់ឈ្មោះថា Richard Yu ។ អគ្គនាយកប្រតិបត្តិរូបនេះ និយាយថា ការដាក់លក់ស្មាតហ្វូន Huawei P10 និង Huawei P10 Plus នាពេលថ្មីៗនេះ អាចនឹងលក់ដាច់ច្រើនជាង 10 លានគ្រឿងផងដែរ។
ក្នុងនាមជាក្រុមហ៊ុនផលិតស្មាតហ្វូនធំជាងគេបំផុតចំណាត់ថ្នាក់លេខ 3 នៅលើពិភពលោក ក្រុមហ៊ុន Huawei លក់ចេញផលិតផលរបស់ខ្លួនបានចំនួន 139 លានគ្រឿងទៅកាន់ពិភពលោកទាំងមូលនៅក្នុងឆ្នាំ 2016 ។ វាមិនគ្រាន់តែជាតួរលេខដ៏គួរឱ្យភ្ញាក់ផ្អើលនោះទេ វាថែមទាំងពង្រឹងទៅលើចំនួននៃការលក់បើធៀបទៅនឹងស្មាតហ្វូនដែលចែកចាយនៅក្នុងឆ្នាំ 2015 ។ កំណើនពិតប្រាកដនៅក្នុងឆ្នាំ 2016 មានចំនួន 29% បើធៀបជាមួយឆ្នាំមុន។
លោក Yu បង្ហាញពីគោលដៅដ៏គួរឱ្យចាប់អារម្មណ៍ខ្លាំងបំផុតសម្រាប់ក្រុមហ៊ុន Huawei ផងដែរ។ នៅក្នុងខែកុម្ភៈឆ្នាំ 2016 លោកនិយាយថា នៅក្នុងរយៈពេល 2 ទៅ 3 ឆ្នាំទៀតនេះ ក្រុមហ៊ុន Huawei នឹងដណ្តើមយកតំណែងរបស់ក្រុមហ៊ុន Apple ដោយឈរជាក្រុមហ៊ុនផលិតស្មាតហ្វូនលំដាប់ទី 2 នៅលើពិភពលោក។ នៅក្នុងឆ្នាំ 2021 ក្រុមហ៊ុន Huawei នឹងវ៉ាដាច់ក្រុមហ៊ុន Samsung ដោយឈរនៅចំណាត់ថ្នាក់លេខ 1 ជាក្រុមហ៊ុនផលិតស្មាតហ្វូនធំបំផុតក្នុងពិភពលោក។ ទាំងនេះ ជាគោលដៅដ៏អស្ចារ្យ ក៏ប៉ុន្តែវត្តមានរបស់ស្មាតហ្វូន Huawei P10 និង Huawei P10 Plus នៅមិនទាន់គ្រប់គ្រាន់ ដែលអាចធ្វើឱ្យក្រុមហ៊ុន Huawei យកឈ្នះក្រុមហ៊ុន Apple នៅឆ្នាំ 2019 និងវ៉ាដាច់ក្រុមហ៊ុន Samsung នៅក្នុងឆ្នាំ 2021 នោះទេ៕
