ទូរស័ព្ទ Nokia 3310 (2017) បានបង្ហាញខ្លួននៅក្នុងព្រឹត្តិការណ៍តាំងពិពរណ៍ Mobile World Congress នៅដើមឆ្នានេះ ប៉ុន្តែក្រុមហ៊ុន HMD មិនមែនប្រកាសបង្ហាញតែទូរស័ព្ទមួយគ្រឿងនេះទេក្នុងព្រឹត្តិការណ៍ដ៏ធំនេះ ។ ក្រុមហ៊ុនបច្ចេកវិទ្យា HMD ប្រកាសបង្ហាញស្មាតហ្វូន 3 ម៉ូដែលទៀតដំណើរការប្រព័ន្ធប្រតិបត្តិការ Android នោះគឺ Nokia 6, Nokia 5 និង Nokia 3 ។ ពេលនេះ ក្រុមហ៊ុនបង្ហោះសារនៅលើបណ្តាញសង្គម Twitter ថា ស្មាតហ្វូនស៊េរីថ្មីទាំង 3 ម៉ូដែលនេះនឹងដាក់លក់នៅក្នុងទឹកដីសហរដ្ឋអាមេរិកឆាប់ៗនេះ។ ក្រុមហ៊ុនបច្ចេកវិទ្យា Nokia ធ្លាប់បង្ហោះសារនៅលើ Twitter រួចមកហើយថា ស្មាតហ្វូនជាច្រើនស៊េរីនេះនឹងដាក់លក់ជាផ្លូវការនៅចន្លោះខែមេសា និងខែមិថុនា។
ស្មាតហ្វូនម៉ូដែលថ្មីទាំងអស់នេះត្រូវរចនាម៉ូដដោយក្រុមហ៊ុន HMD Global ហើយក្រុមហ៊ុន Nokia ផ្តល់អាជ្ញាប័ន្ណផ្តាច់មុខទៅលើការប្រើប្រាសម៉ាកយីហោ Nokia សម្រាប់ក្រុមហ៊ុននេះ។ ស្មាតហ្វូនទាំងអស់សុទ្ធតែដំណើរការប្រព័ន្ធប្រតិបត្តិការ Android Nougat ។ ស្មាតហ្វូន Nokia 6 មានអេក្រង់ធំជាងគេទំហំ 5.5 អ៊ីងហើយវាមានតម្លៃ 247 ដុល្លារ ចំនែកស្មាតហ្វូន Nokia 5 មានតម្លៃ 200 ដុល្លារ និងស្មាតហ្វូន Nokia 3 មានតម្លៃ 147 ដុល្លារ៕