បន្ទាប់ពីលោកអ្នកបានលឺដំណឹងថា ក្រុមហ៊ុនបច្ចេកវិទ្យាយក្ស Apple នឹងនាំយកទូរស័ព្ទ iPhone ស៊េរីថ្មីដូចជា iPhone 7s, iPhone 7s Plus និង iPhone 8 វាមានរយៈពេលតែប៉ុន្មានខែទៀតប៉ុណ្ណោះដែលក្រុមហ៊ុន Apple រៀបចំព្រឹត្តិការណ៍ប្រចាំឆ្នាំរបស់ខ្លួន។ របាយការណ៍ថ្មីមួយចេញពីសារព័ត៌មានបោះពុម្ភផ្សាយជាភាសាចិន Economic Daily News និយាយថា ការចាប់ផ្តើមផលិតបន្ទះឈីប A11 ថ្មីសម្រាប់ទូរស័ព្ទត្រកូល iPhone នឹងដំណើរការនាពេលដ៏ខ្លីខាងមុខនេះ។
បន្ទះឈីបថ្មីនេះនឹងផលិតឡើងដោយដៃគូសហការរបស់ក្រុមហ៊ុន Apple នោះគឺក្រុមហ៊ុន Taiwan Semiconductor Manufacturing Company (TSMC) ហើយការចាប់ផ្តើមផលិតធ្វើឡើងនៅក្នុងខែមេសាដើម្បីឱ្យទាន់ការសម្ពោធទូរស័ព្ទស៊េរីថ្មីនៅក្នុងខែកញ្ញាខាងមុខនេះ។ បន្ទះឈីបថ្មីនេះនឹងប្រើប្រាស់បច្ចេកវិទ្យា 10 nm FinFET ដែលជាការ Upgrade ពីបន្ទះឈីប A10 Fusion ជំនាន់មុនដែលប្រើប្រាស់នូវបច្ចេកវិទ្យា 16 nm ។ក្រុមហ៊ុន TSMC ត្រូវគេរំពឹងថានឹងផលិតបន្ទះឈីប A11 ច្រើនជាង 100 លានឈីបមុនបញ្ចប់ឆ្នាំ 2017 នេះដែលមានចំនួនលើសពីការផលិតនៅក្នុងឆ្នាំមុននេះ។ ទោះជាយ៉ាងណាក៏ដោយ ការផលិតបន្ទះឈីបថ្មីនេះធ្វើឡើងចំពេលជាមួយនឹងការផលិតបន្ទះឈីបនៅឆ្នាំមុនដែរ ដែលមានន័យថាទូរស័ព្ទ iPhone ស៊េរីថ្មីពិតជាបង្ហាញខ្លួននៅជិតចុងឆ្នាំនេះជាក់ជាមិនខាន។
ចំនែកវត្តមានរបស់ទូរស័ព្ទ iPhone 7s និង iPhone 7s Plus វិញប្រហែលជាបង្ហាញនៅក្នុងថ្ងៃសម្ភោធន៍ជាផ្លូវការនេះជាមួយគ្នា។ នៅខណៈពេលនេះ យើងនៅមិនទាន់អាចដឹងអំពីលក្ខណៈសម្បត្តិរបស់ទូរស័ព្ទ iPhone 8 នៅឡើយទេ ប៉ុន្តែយើងគ្រាន់តែដឹងលក្ខណៈសម្បត្តិមួយចំនួនប៉ុណ្ណោះដូចជាការប្រើប្រាស់អេក្រង់គែមកោង (Edge-to-edge Display) ការដកចេញប៊ូតុង Home នៅផ្នែកខាងមុខ និងការប្រើប្រាស់ប្រព័ន្ធ Wireless Charging ផងដែរ៕
